سه‌رۆكێ هه‌رێما باشوورێ كوردستانێ ئیرۆ سه‌ردانا به‌خدا ئا پایته‌ختا ئیراقێ كر و ل گەل سەرۆکۆمار، سەرۆکوەزیر و سەرۆکێ پارله‌مه‌نا ئیراقێ جڤیا و پشتگریا ھەرێما کوردستانێ ژ بۆ سه‌قامگیریا ئیراقێ ژ هه‌موو روویه‌كی ڤه ته‌كه‌ز كر.
نێچیرڤان بارزانی ئیرۆ رۆژا چارشه‌می 13/11/2019ان ب هه‌ڤالبه‌ندیا جیگرێ سەرۆک و سەرۆکێ دیوانا سەرۆکتیا ھەرێما باشوور، سه‌ردانا به‌خدا ئا پایته‌ختا ئیراقێ كر.
نێچیرڤان بارزانی سه‌رۆكێ هه‌رێما باشوورێ كوردستانێ و شاندا پێره ل ده‌ستپێكێ ل گه‌ل سەرۆکۆمارێ ئیراقێ بەرھەم سالھ جڤیا، رەوشا سیاسی و ئه‌وله‌هیا ئیراقێ، تێكلیێن ھەرێما کوردستانێ و ھکوومەتا فەدەرال نیقاش كر و د جڤینێ دە تەکەزی ل سەر گرینگیا ئارامی و سەقامگریا ل وەلاتی و دابینکرنا ژیانەکە باشتر ژ بۆ ھەمولاتیان کرن.
پشتره نێچیرڤان بارزانی و شاندا پێره ل گه‌ل سه‌ر وه‌زیرێ ئیراقێ ئادل ئەبدولمەھدی هه‌ڤدیتن پێكانی و رەوشا ئیراقێ و رۆژه‌ڤا وێ نیقاش کرن.
سه‌رۆكێ هه‌رێما باشوور پشتگریا ھەرێما کوردستانێ ژ بۆ ئارامی و سەقامگریا ئه‌وله‌هی و سیاسی یا ئیراقێ و هه‌نگاڤێن ئەبدولمەھدی ژ بۆ چاکسازیان و بجیكرنا داخوازیێن خوه‌نیشانده‌ران ته‌كه‌ز كر.
نێچیرڤان بارزانی تەکەزی ل سەر پێویستی و گرینگیا ھلگرتنا بەرپرسیاری و پشتگریا ئالیێن سیاسی ژ بۆ کابینەیا فه‌ده‌رال ل دەربارێ چاکسازیان و چارەسەرکرنا پسگرێکان کر.
نێچیرڤان بارزانی و شاندا سه‌رۆكتیا هه‌رێما باشوور، مه‌له‌فێن تێكلیێن ھەولێر و بەخدایێ، چارسەرەرکرنا کێشەیان، رەوشا ئه‌وله‌هیا ئیراقێ ب گشتی و مەترسیێن خورتبوونا تەرۆرێ، هه‌موه‌خت چاوانیا رووبرووبوون و ھەماھەنگیا ھەرێما کوردستانێ و ھکوومەتا فەدەرال و چەند پرسێن کو پەیوەندیدارن ب ھەردو ئالیان نیقاش كرن.
پشتره سه‌رۆكێ هه‌رێما باشوور ل گه‌ل سه‌رۆكێ پارله‌مه‌نا ئیراقێ مهه‌مه‌د هه‌لبووسی جڤیا و بجیكرنا ده‌ستوورا ولات و پسگرێكێن سه‌راستكرنا ده‌ستوور بابه‌تا نیقاشا هه‌ردو ئالییان بوو، نێچیرڤان بارزانی ته‌كه‌ز كر كو هه‌ر سه‌راستكرن و گوهه‌رینه‌كه د ده‌ستوورا ولات ده وه‌ره كرن پێویسته د بەرژەوەندیا ئیراق ده به و هه‌موه‌خت مافێن دەستووری یێن ھەرێما کوردستانێ و تەڤاھیا پێکھاتەیێن ل ئیراقێ ب گشتی بپارێزە.
د جڤینا سەرۆکێ ھەرێما کوردستانێ نێچیرڤان بارزانی و سەرۆکێ پارله‌مه‌نا ئیراقێ مھەمەد ھەلبووسی ده، پێشھاتەیێن ل ئیراقێ ب گشتی، پرۆسەیا گوھەرتنا دەستوورێ ب تایبەتی ھاتن نیقاش كرن.
