سەرۆکێ ھەرێما باشوورێ کوردستانێ ئیرۆ به‌شداری فۆرما ئاشتی و ئه‌وله‌هیا رۆژهلاتا ناڤین كر و گۆ كو چاره‌سه‌ركرنا پرسگرێكا كوردان ژبۆ ئه‌وله‌هیا هه‌موو ناڤچه‌یێ هه‌ری گرینگه.
ئیرۆ رۆژا چارشه‌می و ل رۆژا دویه‌م ئا فۆرما ئاشتی و ئه‌وله‌هیا رۆژهلاتا ناڤین ئه‌وا زانكۆیا ئه‌مه‌ریكی ل باژارێ دهۆكێ ساز كری، نێچیرڤان بارزانی سه‌رۆكێ هه‌رێما باشوورێ كوردستانێ به‌شداری كر و گۆتاره‌ک ل ده‌ربارا ره‌وشا ئه‌وله‌هیا ناڤچه‌یێ پێشكێش كر.
سەرۆکێ ھەرێما کوردستانێ راگھاند، پرسگرێکێن رۆژھلاتا ناڤین نە تەنێ ئەولەھی و تێكلیێن وەلاتێن ناڤچەیێ راستی قەیرانێ کرنە، بەلکو ل ئاشتی و بەرژەوەندیێن وەلاتێن مەزن و جیھانێ ژی بوونە گەف، ئەوێ ل ناڤچەیێ روو ددە، ژ ئەنجاما شاشتیەکە کەڤن و نەخشەیا جۆپۆلیتیکیا پشتی شەرێ جیھانێ یێ یەکەمە، کو کۆمەک پرسگرێکێن سیاسی ل ناڤچەیێ بێ چارەسەری ھشتن، ژ وان ژی دۆزا کوردە.
هه‌موه‌خت گۆت: دۆزا کورد، پرسگرێکەکە مەزنە و چارەسەرکرنا وێ ژی، بەشەکە گرینگا ئاشتیێ یە ل ناڤچەیێ،ھەر وھا پرسگرێکا پێکھاتەیێن دن ژی ژ پشتی شەر دەرکەتن، ژ بلی ڤێ نەئارامیا رۆژھلاتا ناڤین ڤەدگەرە کۆمەک سه‌ده‌مان، کو د سالێن پاشین دە بوونە سەدەما گرفتێن زێدەتر ل ناڤچەیێ پەیدا ببن، ژ وان ژی تێکچوونا ھەڤسەنگیێ ل ناڤچەیێ.
نێچیرڤان بارزانی دبێژه: پشتی بوھارا ئەرەبی و رووخاندنا ره‌ژیمێن بەرێ، رۆلا ھن وەلاتان ل ناڤچەیێ ب شوون ڤە چوون، دەولەت کەتن هه‌ڤركیێ و ئەڤ بوونە سەدەما دروستبوونا شەرێ ب وەکالەت و هه‌ڤركیێن ناڤخوەیی. زەمینە ژ بۆ دەستوەردانا له‌شكریا ناڤدەولەتی ھات چێکرن.
ھەروھا بوو سەدەما گەرمبوونا شەر و کێمبوونا دەرفەتێن میانرەویێ، ژ بەر کو دەولەتان ل شوونا گرتنا رۆلا میانرەو، بوونە بەشەک ژ شەر.
ھەروھا گۆت: وێ یەکێ ژی، میکانیزما چارەسەرکرنا ئاشتیانە ب یەکجارێ کێم کریە. ناکۆکیێن مەزھەبی و نەبوونا کەلتورا لێبۆرین و پێکڤەژیانێ ژی، سەدەمێن دنن.
تێگھیشتنا دامارگیرییا مەزھەبی و باوەریا تۆلھلدانا کەڤن، بوونە زەمینەیەکە لبار کو شەر و ململانەیا ل سەر دەستھلاتێ ل ناڤچەیێ گەرم ببن.
راگھاند، تەرۆر ل ناڤچەیێ و ل جیھانێ، گەفەکە سەرەکە ل سەر ئاشتی و ئەولەھیێ یە، ریێن رووبرووبوونا تەرۆرێ ژی پرسگرێکان دروست دکە.
نێچیرڤان بارزانی هه‌ر وها ده‌ست نیشان كر، نەبوونا بنەمایا چاکسازیا ئابووری، سیاسی، پەروەردەیی و جڤاکی بۆ رووبرووبوونا تەرۆرێ و پشتبەستنا ب ریێن سەربازی بۆ ھشکرنا ژێدەرێن تەرۆرێ، بخوە پرسگرێکە و دبە ھۆکار بۆ بەرھەمانینا تەرۆرێ.
سەرۆکێ ھەرێما کوردستانێ گۆت: لاوازی و شکەستنا سیاسی و ئابووری، زۆر ل سیستەما ھکومرانیێ ل ناڤچەیێ کریە، نەبوونا سیاسەتا گەشەپێدانێ و نه‌رینا جڤاکی، بوونە سەدەما بێھێڤیا گەلێن ناڤچەیێ و ب تایبەت ژ ئالیێ خۆرتان ڤە، ئەڤ ھەستا ترسناک، بوویە ژێدەرا نەرازیبوونێ و زەمینەیەک کو ھەر دەم سەرپێچ ببن و راپەرن و ببە سەدەما بیرۆکەیا توندرەویێ.
ئاماژە ب وێ ژی کر، وەک نموونە، ل ئیراقێ ل شوونا فرەھیا سیاسی، فرەھیا ناڤەندا دەستھلاتێ ھەیە، ل شوونا دەستوور و یاسا بالادەست بن، گرووپ و بالادەستیا پارتی و چەکداری ھەیە، ئەنجاما وێ ژی ئیرۆ دبینن.
راگھاند، شەرێ ل دژی دایشێ، ھەڤپەیمانیەکە بھێزا ناڤدەولەتی دروست کر، لێ خوەندنا شاشا ئاماژەیان و بیرۆکەیا کو داش بداوی بوویە، کارێ ھەڤپەیمانیێ خاڤ کر و پرسگرێک گەرمتر کرن، د راستیێ دە دایش نە ل روویێ کولتوری و فەرھەنگی، بەلکو ل روویێ له‌شكی ژی بداوی نەبوویە و ژ ناڤچە و جیھانێ رە مەترسیەکە مەزنە.
نێچیرڤان بارزانی گۆت ژی: ب باوەریا مە، تاکە رێ بۆ چارەسەرکرنا پرسگرێکان، دانووستاندن و چارەسەریێن سیاسی یە، ئەوێ شەرێ ھەڤ دکن، ژ بۆ چارەسەریێ دڤێ ب ھەڤ رە روونن.
ل داویا گۆتنا خوه ژی گۆت: نکۆلیکرن و زۆر، داویێ ب ت پرسگرێکێ نایینە و خەلک ژ داخوازێن وان سار ناکە، شەر تو پرسگرێکەکێ چارەسەر ناکە، ل داویێ دڤێ ڤەگەرن سەر رێیا گۆتوبێژان و بگھن رێکكەفتنێ.
