هێزێن سووریایا ده‌مۆكراتیك هه‌سه‌ده، نیقاشا ب ره‌ژیما سووریێ ره ده‌ست پێ كر و ئه‌و دخوازه لهه‌ڤهاتنا جۆتمه‌هێ ببه بنگه‌ها لهه‌ڤهاتنه‌كه سیاسی.
چاڤكانیێن داركا مازی ئێن رۆژئاڤا كوردستانێ ئه‌شكه‌ره كرن، شانده‌كه هێزێن سووریایا ده‌مۆكراتیك هه‌سه‌دێ و رێڤه‌به‌ریا خوه‌سه‌ر، ده‌ست ب نیقاشێ و گۆتوبێژان ل گه‌ل ره‌ژیما سووریێ كر، ئه‌ڤ نیقاش ل ده‌ربارا 2 خالێن سه‌ره‌كه تێن پێكانین، خالا یه‌كه‌مین باندۆرا دۆماندنا ئارته‌شا تركیێ ژ بۆ ئێریشێن ل سه‌ر ناڤچه‌یێن باكورێ سووریێ و هه‌موه‌خت گهیشتن ژ بۆ لهه‌ڤهاتنه‌كه سیاسی.
هه‌ر وها هات ده‌ست نیشان كرن، ئه‌ڤ نیقاش ژ دوهـ رۆژا چارشه‌می 20/11/2019ان ده‌ست پێ كرنه و نوونه‌رێ رووسیا فه‌ده‌رال ناڤگینی ژ بۆ جڤینان كرنه، ب ئارمانجا وێ یه‌كێ لهه‌ڤهاتنا له‌شكری ئا 13 جۆتمه‌ها ئیسالێ ببه لهه‌ڤهاتنه‌كه سیاسی.
هێزێن سووریایا ده‌مۆكراتیك ل 12 جۆتمه‌ها ئیسالێ ئانكو ب 3 رۆژان پشتی ده‌ستپێكرنا ئێریشا داگیركاریا تركیێ ل سه‌ر رۆژئاڤا كوردستانێ، ب ناڤگینیا رووسیا فه‌ده‌رال ب ره‌ژیمێ ره جڤیابوو، پشتره ل 13 جۆتمه‌هێ لهه‌ڤهاتن ئیمزه كر.
ل گۆر وێ لهه‌ڤهاتنێ ئارته‌شا سووریێ كه‌ت ناڤ رۆژئاڤا كوردستانێ ده و ل شوونا هێزێن سووریایا ده‌مۆكراتیك جی گرتن، ئه‌ڤ ل هه‌ڤهاتن ب یه‌ك ژ مه‌زنترین ده‌ربێن كو ب رۆژئاڤا كوردستانێ كه‌تنه تێ هه‌ژمارتن ژ بۆ كو ستاتۆ به‌ر ب تونه‌بوونێ بر.
