هێزێن ئه‌وله‌هیێ ل هه‌رێما باشوورێ كوردستانێ، بانده‌ك د ناڤا ئاواره‌یان دا ده‌سته‌سه‌ر كر كو پیلان هه‌بوو چه‌ندین په‌قینان ل باشوور بكه‌ن، ل گۆر چاڤكانیێن تایبه‌ت یێن داركا مازی، «ئه‌و باند PKK ب رێیا ده‌ستهلاتا رۆژئاڤا د ناڤا ئاواره‌یان دا شاندیه باشوور».
دژاتییا پارتیا كاركه‌رێن كوردستانێ ژ بۆ باشووری كوردستانێ به‌رده‌وامه و داوی جار پشتی بزاڤا تێكدانا ره‌وشا ناڤا هه‌رێمێ ب رێیا كوشتنا مه‌زنه دیبلۆماتكارێ تورك، PKK پشتی هێرشا داگیركاریا توركیا ل سه‌ر رۆژئاڤا، ژێر ب ژێر پیلان ژ بۆ تێكدانا ره‌وشا ناڤخوه یا هه‌رێما باشوور دانان و ب فه‌رمانا وێ، بانده‌ك د ناڤا ئاواره‌یان دا شانده باشوور ژ بۆ كو چه‌ندین كریارێن تیرۆرستی و كوشتنان بكه‌ن.
باندێ ده‌سته‌سه‌ركری 10 كه‌سن و ژ ئیستخباراتا ده‌ستهلاتا رۆژئاڤایێ كوردستانێ نه
چاڤكانی و ژێده‌رێن تایبه‌ت یێن پێگه‌ها داركا مازی ده‌ست نیشان كرن كو هێزێن ئه‌وله‌هیێ ل هه‌رێما باشوور بانده‌ك ده‌سته‌سه‌ر كرییه كو ل ڤێ داویێ دگه‌ل ئاواره‌یێن رۆژئاڤا گه‌هشتنه هه‌رێمێ.
چاڤكانیان ته‌كه‌ز كر، باندێ كو هاتییه ده‌سته‌سه‌ر كرن ژ 10 كه‌سان پێكهاتیه و هه‌ر هه‌موو كادر و زه‌لامێن ده‌ستهلاتا رۆژئاڤا و سازیێن وێ یێن ئه‌وله‌هی و ئیستخباراتی نه و گرێدای پارتییا یه‌كیتییا ده‌مۆكراتیك PYD و بالێ وێ یێ سه‌ربازی YPG و سازییا ب ناڤێ «ئاساییشا رۆژئاڤا» نه.
چاڤكانیێن داركا مازی ئه‌شكه‌ره كرن، سازیێن ئه‌وله‌هیێ ل هه‌رێما باشوور، لێپرسین دگه‌ل باندێ ده‌سته‌سه‌ركری كرنه و وان دانپێدان كریه كو ئه‌و ژ بۆ ئه‌نجام دانا چه‌ندین كریار و په‌قینان هاتینه هه‌رێما باشوور.
پیلان هه‌بوو ژ بلی په‌قینان چه‌ندین به‌پرس و كه‌ساتیان تیرۆر بكه‌ن
هه‌روه‌ها، ل گۆری دانپێدانێن وێ باندێ، وان پیلان هه‌بوو چه‌ندین په‌قینان ل سازیێن گشتی و بازرگانی بكه‌ن، هه‌روه‌ها چه‌ندین كه‌ساتی و به‌رپرسیارێن «هه‌رێمێ، ENKS و هه‌موه‌خت دیبلۆماتكارێن توركیا» تیرۆر بكه‌ن، ژ بۆ كو ره‌وشا هه‌رێما باشوور بهێته تێكدان و فه‌وزا بكه‌ڤیتێ.
پارتیا كاركه‌رێن كوردستانێ ل سه‌ر هه‌ولێن خوه ژ بۆ تێكدانا ره‌وشا باشوورێ كوردستانێ به‌رده‌وامه ب تایبه‌ت ل ئاستا دیبلۆماسی كو دخوازیت په‌یوه‌ندیێن ل ناڤبه‌را توركیا و هه‌رێما كوردستانێ تێكبده‌ت، كوشتنا جێگرێ كونسلێ گشتیێ توركیا ل هه‌ولێرێ ل 17 خزیرانا ئیسالێ ژی باشترین میناك و به‌لگه‌یه كو ل وی ده‌می PKK و بالێ وێ یێ سه‌ربازی HPG هه‌ر د زوو دا راگه‌هاندبوو، وان په‌یوه‌ندی ب بوویه‌رێ ڤه نینه، لێ پشتی تاوانبارێن وێ هاتینه ده‌سته‌سه‌ر كرن، ئه‌شكه‌ره بوو كو وان فه‌رمان راسته راست ژ PKK وه‌رگرتنه و پلانا كوشتنێ PKK ب هه‌موو هووركاتیێن وێ ڤه ئاماده كربوو.
