پشتی شەڤا رابووری تەرۆریستێن دائشێ ئێریشی سەر لیوایا سێ ئا هێزێن پێشمەرگە یێن کوردستانێ کری و هەژمارەک پێشمەرگە ژ ئەگەرا ڤێ ئێریشا تەرۆریستێن دائشێ شەهید و بریندار بوون، وەزارەتا پێشمەرگە داخوەیانی لسەر ڤێ یەکێ دا، پشترە نێچیرڤان بارزانی سەرۆکێ هەرێما کوردستانێ و فەرماندارێ گشتی ئێ هێزێن پێشمەرگە و چەکدارێن کوردستانێ داخوەیانیەک بەلاڤ کر.
ئەڤ ژی ناڤەرۆکا داخوەیانیا نێچیرڤان بارزانی سەرۆکێ هەرێما کوردستانێ یە:
ئێریشا دائشێ بۆ سەر لیوایەکا هێزێن پێشمەرگە ئێن کوردستانێ ل خانەقینێ، پشتی ئەنجامدانا هەژمارەکە کریارێن تەرۆریستی ئێن یەک ل پەی یەک ئێن چەند هەیڤێن رابووری ل ناڤچەیێن دردووری کەرکۆک و گەرمیانێ، ئەڤ رستیە تێ ئیسبات کرن کو دائش ب داوی نەهاتیە و هێژان خەتەرەیە لسەر ئەولەهی و ئارامیا ناڤچەیێ، شەرێ ژناڤبرنا ئەڤ دوژمنێ مرۆڤاتیێ هێژان ددومە.
ئەم د دەمەکێ دە کو سلاڤان ژ بۆ گیانێ پاکژێ وان شەهیدێن نەمر دشینین کو د تێکشکاندنا ئێریشا دائشێ دە جانێ خوە ژ دەست دایە و داخوازا چاک بوونا لەزگین ژ بۆ برینداران دکین و دەستخوەشیێ ل پێشمەرگەیێن قارەمان دکین، ولاتیێن کوردستانێ پشت راست دکین کو هێزێن پێشمەرگە و هێزێن دن ئێن چەکدارێن کوردستانێ وەکە هەرتم د ئامادەباشیێ دانە ژ بۆ بەرهنگاربوون و تێکشکاندنا هەر لڤینەکا تەرۆریستان و پاراستنا گەل و خاکا کوردستانێ ژ هەر خەتەرەیەکە دن.
جاردن تەکەزیێ لسەر ڤێ یەکێ دکین کو دائش هێژان ب داوی نەهاتیە و هێژان خەتەرەیە بۆ سەر ئاشتی و ئاسایشا کوردستان و یراقێ و ناڤچەیێ و جیهانێ، ئەم پشت راستین ئەڤ رەکخراوا تەرۆریستی جارەکە دن مژۆلی خوە رێکخستن و مفا وەرگرتن ل رەوشا نهایە ژ بۆ بەرفرەهکرنا کارێن خوە ئێن تەرۆریستی، ژبەر ڤێ یەکێ پێتڤی دکە هەڤپەیمانیا ناڤدەولەتی ئا دژی دائشێ ب وێ گەرماتیا بەرێ بەردەوام ببە و رێ نەدە تەرۆریست رەوشا خەراب ئا یراقێ و ناڤچەیێ ب دەلڤیە وەرگرن، تەکۆشین ژی وەرە کرن ژ بۆ وێ یەکێ کو زووتر داوی ب رەوشا تەڤلیهەڤ ئا یراقێ بێت و سەقامگیری ڤەگەرە یراقێ.
نێچیرڤان بارزانی
سه‌رۆكێ هەرێما كوردستانێ
