پارتیا كاركه‌رێن كوردستانێ ده‌ست نیشان كر، یه‌كینه‌یێن پاراستنا گه‌ل یه‌په‌گێ، ره‌ژیما سووریێ پاراستیه و هه‌گه‌ر یه‌په‌گه نه‌بایه، به‌شار ئه‌سه‌د نه دما.
باهۆز ئه‌ردال ئه‌ندامێ فه‌رمانداریا به‌رگریا ناڤه‌ندیا هێزێن پاراستنا گه‌ل هه‌په‌گێ، بالێ له‌شكری یێ پارتیا كاركه‌رێن كوردستانێ په‌كه‌كێ، د نووترین داخوه‌یانیا خوه ده كو پێگه‌ها rojnews ئا نێزی پارتیا كاركه‌رێن كوردستانێ ڤه‌گوهاستیه، ده‌ست نیشان كر كو یه‌كینه‌یێن پاراستنا گه‌ل یه‌په‌گێ، ره‌ژیما به‌شار ئه‌سه‌دی ل سالێن شه‌رێ ناڤخوه پاراست و هه‌گه‌ر یه‌په‌گه نه‌بایه، ئه‌و ره‌ژیم وێ ژناڤچووبا.
باهۆز ئه‌ردال ده‌ست نیشان كر، پێویسته ره‌ژیما به‌شار ئه‌سه‌دی سپاسیا یه‌په‌گێ بكه، ژ بۆ كو هه‌یا نها سووریا یه‌كگرتی نه‌دما هه‌گه‌ر یه‌په‌گه نه‌بایه.
ئه‌ندامێ سه‌ركرداتیا هه‌په‌گێ ئاخفتنا خوه وها دۆماند، د وه‌ختا نها ده، به‌رپرسیارێن یه‌په‌گێ فكر ل هه‌ماهه‌نگی و لهه‌ڤهاتنێن ستراتیجی ل گه‌ل ره‌ژیما ئه‌سه‌د دكن.
ئه‌ڤ گۆتنا باهۆز ئه‌ردال ب دانپێدانه‌كه فه‌رمی تێ حه‌ساب كرن كو ل رۆژئاڤا كوردستانێ یه‌په‌گێ ت گۆتنه‌كا خوه نینه و ته‌نێ ئه‌و ئه‌جێندایێن په‌كه‌كێ و فه‌رمانێن قه‌ندیلێ بجی دكن.
په‌كه‌كێ 11 هزار خورتێن رۆژئاڤا ژ بۆ مانا ره‌ژیما سووریێ شه‌هید كرن
پارتیا كاركه‌رێن كوردستانێ ژ وه‌ختا دامه‌زراندنێ و هه‌یا نها ب پیلان و ستراتیجیه‌كه زه‌لال كار ژ بۆ به‌رژه‌وه‌ندیا ولاتێن داگیركار (تركیێ، ئیراقێ، ئیرانێ و سووریێ) دكه، لێ به‌لێ ل سووریێ هات سه‌لماندن كو په‌كه‌كێ به‌شه‌كا دیار ئا رۆژئاڤا پێشكێشی تركیێ كر وه‌ختا كو یه‌په‌گێ فه‌رمانا خوه ژ قه‌ندیلێ وه‌رگرتی و ب ڤێ یه‌كێ رێ ژ بۆ داگیركاریێ خوه‌ش كری.
هه‌موه‌خت په‌كه‌كێ پشتی ئێریشا داگیركاریێ یه‌په‌گه نه‌چار كر لهه‌ڤهاتنێ ل گه‌ل ره‌ژیما سووریێ بكه و هه‌موو ناڤچه‌یێن رۆژئاڤا ئێن كو ب خوینا 11 هزار شه‌هیدێن جوانێن كورد رزگاركرین، دانه ده‌ست ره‌ژیما سووریێ.
ئه‌سه‌د قه‌ردارێ په‌كه‌كێ یه ژبه‌ركو هه‌ر تشت نها ل گۆری نیزامێ یه
هه‌ر چه‌ند كو به‌رپرسیارێن رێڤه‌به‌ریا خوه‌سه‌ر و هێزێن سووریایا ده‌مۆكراتیك هه‌سه‌دێ ته‌سبیت كرنه كو لهه‌ڤهاتنا وان ب ره‌ژیما سووریێ ره ته‌نێ له‌شكری یه، لێ به‌لێ پێشنیازا رۆژێن رابووری ئا ره‌ژیمێ ژ بۆ رێڤه‌به‌ریا خوه‌سه‌ر تشتا عه‌كس نیشان دده و رژێمێ خوه‌ستیه رێڤه‌به‌ریا خوه‌جی ل شوونا رێڤه‌بریا خوه‌سه‌ر وه‌ره ئاڤاكرن و رایه‌دارێن رۆژئاڤا پێشوازی ل ڤێ پێشنیازێ كرنه، به‌لكو بێهتر ب ره‌ژیمێ ره گۆتنه: هه‌موو نیقاشێن مه وێ د چارچووڤه‌یا سووریایا یه‌كگرتی ده بن.
په‌كه‌كێ ئامانجا خوه ل رۆژئاڤا كوردستانێ ب ته‌مامی بجی كر، تشته‌ك ب ناڤێ رۆژئاڤا و ستاتۆیێ نه‌هشت، هینا ناڤێ رۆژئاڤا كوردستانێ ژی ئێدی نایێ گۆتن، به‌لكو باكورێ سووریێ و ل بن ئالایێ سووریێ، ئه‌ڤ ژی خزمه‌ته‌كه هه‌ری بچووكا په‌كه‌كێ و بالێ وێ ئێ رۆژئاڤا كوردستانێ یه ژ بۆ ره‌ژیما به‌شار ئه‌سه‌د كو باهۆز ئه‌ردال ژ نوڤه داخوازا سپاسیا ئه‌ڤێ خزمه‌تێ ژ ره‌ژیمێ دكه.
