ته‌رمێ گرتیه‌كێ دنێ كورد ل رۆژهلاتا كوردستانێ هات دیتن

ته‌رمێ گرتیه‌كێ دنێ كورد ل رۆژهلاتا كوردستانێ هات دیتن

ده‌ست و پێ یێن وی ل ژێر ئه‌شكه‌نجێ هاتبوون شكاندن

كوشتن و وونداكرنا ده‌سته‌سه‌ركری یێن كورد یێن خوه‌پێشاندانێن رۆژهلاتا كوردستانێ یێن مه‌ها رابووری ژ ئالیێ سازیێن ئه‌وله‌هیا كۆمارا ئیسلامی یا ئیرانێ ڤه‌ به‌رده‌وامه‌ و ته‌رمێ گرتیه‌كێ دنێ كورد د به‌نداڤا ب ناڤێ گارانی یا مه‌ریوانێ هات دیتن.

رێخستنا هه‌نگاو یا مافێن مرۆڤان یا رۆژهلاتا كوردستانێ، دوهـ رۆژا دوشه‌می 15/12/2019ان ئه‌شكه‌ره‌ كر كو ته‌رمێ ولاتیه‌كێ رۆژهلاتا كوردستانێ ب ناڤێ (ئیرشاد ره‌حمانیان) كو ل مه‌ها رابووری د خوه‌پێشاندانێن باژارێ مه‌ریوانێ ده‌ ژ ئالیێ هێزێن ئه‌وله‌هییا ئیرانێ ڤه‌ هاتبوو ده‌سته‌سه‌ر كرن و زیندان كرن، د به‌نداڤا باژاری ده‌ هات دیتن.

ئیرشاد ره‌حمانیان خورته‌كێ ته‌مه‌ن 28 سالی یه‌ و خه‌لكێ باژاركێ (سەولاوا) یێ گرێدای باژارێ سنه‌یه‌ و ده‌رچوویێ به‌شا ئۆرژانسێ یێ زانینگه‌ها پزیشكی بوو.

ناڤبووری ل مه‌ها رابووری و ل وه‌ختا برێڤه‌چوونا خوه‌پێشاندانێن مه‌ریوانیێ، ب مه‌به‌ستا چاره‌سه‌رییا پزیشكی یا دایكا خوه‌ روو كربوو نه‌خوه‌شخانه‌یا مه‌ریوانێ و هه‌ر ل وێرێ هاتبوو بنچاڤكرن، ژ وه‌ختا بنچاڤكرنێ و هه‌یا رۆژا یه‌كشه‌ما رابووری 14/12/2019ان مالباتا وی چ زانیاری ل ده‌ربارا چاره‌نڤیسا وی نه‌بوون.

شاهدحالان به‌حسا وێ یه‌كێ كربوو كو شوونا ئه‌شكه‌نجه‌یێ ل سه‌ر جه‌سه‌دێ ئیرشاد ره‌حمانیان دیاربوو و ده‌ست و پێ یێن وی ل ژێر ئه‌شكه‌نجێ هاتبوون شكاندن.

سازیێن ئه‌وله‌هیێ ب مالباتا ئیرشاد راگهاندبوو كو نابه‌ ئه‌و نووچه‌یا كوشتنا خورتێ خوه‌ ب سازیێن مه‌دیایێ ببێژن و پێویسته‌ ئه‌و وها بدن خوه‌یا كرن كو خۆرتێ وان د كریاره‌كه‌ خوه‌كوژی ده‌، جانێ خوه‌ ووندا كریه‌.

ئه‌ڤ نه‌ جارا یه‌كه‌مینه‌ ته‌رمێ ده‌سته‌سه‌ركریه‌كێ كوردێ یێ خوه‌پێشاندانێن رۆژهلاتا كوردستانێ ل به‌نداڤ و جهێن ده‌رڤه‌ی باژاران تێن دیتن، پێشتر ته‌رمێ هه‌ژماره‌كه‌ كه‌سان ل سینۆرێ باژارێن سنه‌، ئیلامێ یێن رۆژهلاتا كوردستانێ هاتنه‌ دیتن كو ب به‌هانه‌یا به‌شداریكرنێ د خوه‌پێشاندانێن دژی ره‌ژیما ئیسلامی ده‌ هاتبوون بنچاڤ كرن.