كۆنگره‌یا یه‌كێتیێ ب یاریا شه‌تره‌نجێ ده‌ستپێكر 

كۆنگره‌یا یه‌كێتیێ ب یاریا شه‌تره‌نجێ ده‌ستپێكر 

یه‌كێتیێ ئه‌نجوومه‌نا بلند یا سیاسی و 3 ئه‌ندامێن ئه‌نجوومه‌نا سه‌ركرداتیێ ده‌ست نیشان كرن

یه‌كێتی یا نشتیمانی یا كوردستانێ، ئیرۆ كۆنگره‌یا خوه‌ یا 4مین ده‌ستپێكر، لێ پشتی كو كارێن یه‌كه‌م رۆژ ب داوی بووین، ئه‌شكه‌ره‌ بوو، كۆنگره‌ وه‌كه‌ یاریا شه‌تره‌نجێ یه‌، لێ یاریكه‌ر ل ده‌رڤه‌ی هۆلێ برێڤه‌ دبه‌ن و ئاراسته‌ دكه‌ن، هه‌ژماركه‌ سه‌ركرده‌یێن وێ پارتیێ ژی ب خوه‌ ئه‌ڤ ئاماژه‌ كرن و گۆتنه‌: «كۆنگره‌ یا 4مین بجیكرنا پیلانه‌كه‌ ژێر ب ژێر یا د ناڤبه‌را بالێن جودا یێن یه‌كێتی یێ یه»‌.

ئیرۆ رۆژا شه‌می 21/12/2019ان كارێن رۆژا یه‌كه‌مین یا كۆنگره‌یا 4ان یا یه‌كێتی یا نشتیمانی ل باژارێ سلێمانیێ ب رێڤه‌چوون، كۆسره‌ت ره‌سوول عه‌لی، جێگرێ یه‌كه‌مێ سه‌كره‌ته‌رێ گشتی ب پرانیا ده‌نگێن ئه‌ندامێن كۆنگره‌ی ژ بۆ سه‌رۆكتیا ئه‌نجوومه‌نا بلند یا سیاسی یا یه‌كێتیێ هات ده‌ست نیشان كرن.

ئه‌نجوومه‌نا بلند یا سیاسی یا یه‌كێتیێ ژ 8 ئه‌ندامان پێك تێ و ئیرۆ هه‌ر هه‌موو هاتن ده‌ست نیشان كرن كو پرانیا وان ئه‌ندامێن پۆلیتبیرۆیا به‌رێ یا یه‌نه‌كێ نه‌.

هه‌ر د به‌رنامه‌یا ئیرۆ یا كۆنگره‌یا 4ان ده‌، هه‌ر یه‌ك ژ د. به‌رهه‌م سالح، جێگرێ دووه‌مین یێ سه‌كره‌ته‌رێ گشتی و قوباد تاله‌بانی كورێ جه‌لال تاله‌بانی و هه‌ر وها رێواز فایق سه‌رۆكا پارلمه‌نتۆیا كوردستانێ ل سه‌ر هه‌سابا یه‌كێتیێ، وه‌كه‌ ئه‌ندامێن سه‌ركرداتیێ هاتن ده‌ست نیشان كرن.

كۆنگره‌ ل ده‌رڤه‌ی هۆلێ تێ ب رێڤه‌برن

هه‌ر سه‌ركرده‌یه‌كێ نه‌رینه‌كه‌ جودا هه‌به‌ ژ هۆلا كۆنگره‌ی تێ ده‌رخستن

سه‌ركرده‌یێ یه‌كێتیێ شێخ جه‌عفه‌ر شێخ مسته‌فا كو ژ بۆ ئه‌نجوومه‌نا گشتی یا یه‌كێتیێ كاندید بوو خو ژ كۆنگره‌ی ڤه‌كێشا، هه‌موه‌خت مه‌هاباد شێخ محه‌مه‌د ئه‌مین كو یه‌ك ژ ئه‌ندامێن هه‌ری دیار و به‌رچاڤ یێن كۆنگره‌یه‌، رێ پێ نه‌هات دایین به‌شدار ببه‌ و سه‌ده‌ما سه‌ره‌كی ژ بۆ وێ یه‌كێ ڤه‌دگه‌ره‌ كو هه‌ڤژینێ وێ یێ ب ناڤێ فایق شێخ عه‌لی نه‌ دگه‌ل یه‌كێتیێ یه‌.

فه‌ره‌یدوون عه‌بدولقادر، ئه‌ندامێ به‌رێ یێ پۆلیتبیرۆ یا یه‌كێتیێ خوه‌ ژ هۆلا كۆنگره‌ی ڤه‌كشاند، هه‌ر چه‌ند كو پشتی ده‌ركه‌تنا وی ژ هۆلێ داخوه‌یانی دا و گۆت كو ئه‌و ب خوه‌ ده‌ركه‌تیه‌، لێ به‌لێ گۆمان ل ئاوایێ ده‌ركه‌تنا وی هه‌نه‌، ژ به‌ر كو یا راست ئه‌و ژی ژ وان سه‌ركرده‌یان بوو كو ژ نوو د هۆلا كۆنگره‌ی ده‌ هه‌ست ب وێ یه‌كێ كر كو كۆنگره‌ یێ ل ده‌رڤه‌ی هۆلێ تێ ب رێڤه‌برن و ئه‌وێن به‌رهه‌ڤی كۆنگره‌ی بوون، بریارا وان نه‌ د ده‌ست وان ده‌یه‌.

هه‌ر ئیرۆ پارلمه‌نته‌رێ یه‌كێتیێ فه‌یسه‌ل عه‌باس كو رێ پێ نه‌هات دایین به‌شداری كۆنگره‌وی ببه‌، جودابوونا خوه‌ ژ پارتیا خوه‌ راگهاند و ئه‌شكه‌ره‌ كر، ئه‌ڤ كۆنگره‌ نه‌شه‌رعی یه‌ ژ به‌ر كو هه‌موو پۆست به‌روه‌خت بالێن جودا یێن یه‌كێتیێ لهه‌ڤهاتن ل سه‌ر كرنه‌ و ئه‌ڤا تێ كرن ده‌نگدانه‌كه‌ شه‌كلی یه‌.

یه‌كیتیا نشتیمانی یا كوردستانێ ده‌ست ب كۆنگره‌یا خوه‌ یا 4مین كر، لێ به‌لێ نه‌ خوه‌یایه‌ دێ چه‌ند رۆژان ڤه‌كێشیت و چ سه‌ركرده‌یه‌كێ یه‌كێتیێ دێ ببه‌ سه‌كره‌ته‌رێ گشتی یێ وێ پارتیێ، ناڤێ د. به‌رهه‌م سالح ژ بۆ سه‌رۆكتیا یه‌كێتیێ تێ گۆتن، لێ به‌لێ سه‌ركرده‌یێن یه‌كێتیێ ل وێ باوه‌رێ نه‌ كو ل هه‌ر ده‌مێ موحته‌مه‌له‌ ره‌وش بێ گوهه‌رین و كه‌سه‌كێ دن ببه‌ سه‌كره‌ته‌رێ گشتی.

كۆنگره‌یا یه‌كێتیێ ب ناڤێ «كۆنگره‌یا نووبوونێ» یه‌ و تێده‌ دێ ئه‌ندامێن ئه‌نجوومه‌نێن گشتی، سه‌ركرداتی، پشتره‌ سه‌كره‌ته‌رێ گشتی و جێگرێ سه‌ركره‌ته‌ری دێ بهێن هلبژاردن، واته‌ یه‌كێتی بانگا وێ یه‌كێ كریه‌ كو پارتیا وان دێ ب فۆرمه‌كه‌ نوو ده‌ركه‌ڤه‌ هۆلێ.