یه‌كگرتوو یا ئیسلامی یا كوردستانێ ئیرۆ كۆنگره‌یا خوه یا 8ێ ل دارخست و سه‌لاحه‌ددین به‌هائه‌ددین ژ بۆ 4 سالێن دن وه‌كه ئه‌میندارێ ئه‌ڤێ پارتییا ئیسلامی هات ده‌ست نیشان كرن، د كۆنگره‌ی ده ئه‌ندامێن ئه‌نجوومه‌نا سه‌ركرداتیێ وێ وه‌رن ده‌ست نیشان كرن، هه‌ر وها په‌یره‌وا ناڤخوه یا حزبێ دێ بهێت په‌ژراندن.
یه‌كگرتوو یا ئیسلامی یا كوردستانێ كو وه‌كه پارتییه‌كه ئیسلامی یا میانره‌و ل باشوورێ كوردستانێ تێ ناس كرن، كۆنگره‌یا خوه ل ژێر ناڤێ «داهێنان و پێشه‌نگی» ل دارخست، 902 ئه‌ندامێن كۆنگره‌ی هه‌نه، 22% ژ وان ژنن.
د كۆنگره‌ی ده دو نامزه ژ بۆ پۆستا ئه‌میندارێ گشتی هه‌بوون، (ئه‌بو به‌كر كاروانی و سه‌لاحه‌ددین به‌هائه‌ددین)، د ئه‌نجامێ ده، سه‌لاحه‌ددین به‌هائه‌ددین پرانیا ده‌نگان ب ده‌ست خستن و بۆ 4 سالێن دن دێ ل پۆستا رێبه‌رییا یه‌كگرتوویێ به.
هه‌ر ژ ده‌ستپێكا ئاڤابوونا خوه ل سالا 1994ێ، یه‌كگرتوو یا ئیسلامی وه‌كه هیزه‌كه سیاسی كاری رێیا خوه ل قادا باشوورێ كوردستانێ ببینه، خه‌باتا سیاسی ژ بۆ ئامانجێن گه‌لێ كورد كر، لێ به‌لێ ب رێیه‌كه جودا، ئه‌و دبینه كو گه‌لێ كورده پشكه‌كه ژ ئومه‌تا ئیسلامێ و چاكسازی سلۆگان و سۆته‌مه‌نیا ته‌كۆشینا وێ بوو.
یه‌كگرتوو وه‌كه هێزا 4ێ بوو د رێزبه‌ندا پارتیێن به‌شدار د پارلمه‌نا كوردستانێ ده، لێ به‌لێ ل ڤێ داویێ پێگه‌ها خوه ژ ده‌ست دا و پارتیا دن یا ب ناڤێ كۆمه‌لا ئیسلامی كاری جیێ وێ بگره.
ئه‌ڤێ شكه‌ستنێ سه‌رانێن یه‌كگرتوویێ خستن به‌ر هه‌ژماره‌كا پرسان و وان له‌كۆلین و شیرۆڤه ژ بۆ سه‌ده‌مێن شكه‌ستن و پاشڤه‌زڤرینا پارتییا خوه ل همبه‌ر هێزه‌كه دن یا ئیسلامی كر، ده‌رئه‌نجام ژی ده‌ركه‌تنا هه‌ڤركیه‌كه دژوار ل ناڤبه‌را سه‌ركرده و كه‌سێن یه‌كه‌م یێن یه‌كگرتوویێ بوو كو نها ل سه‌ر دو نه‌رینان دابه‌شبوونه، لێ به‌لێ كۆنگره‌یا 8ێ بریار دا كانێ سه‌ركێشێن كیژان نه‌رینێ رێبه‌راتییا ڤێ پارتییا ئیسلامی بكن.
هه‌ڤركییا كو نها د ناڤ یه‌كگرتوویێ ده سه‌رهلدایه نه ل سه‌ر ده‌ستهلاتێ، پاره و چاوانیا برێڤه‌برنا پارتیێ یه، به‌لكو گرێدای فكرێن جودایه یێن دۆمدرێژه.
ئه‌بو به‌كر كاروانی كو سه‌ركێشێ فكر و نه‌رینا یه‌كێ یا یه‌كگرتوویێ یه و دبێژه: پێویسته ئیسلامه‌كا خۆمالی دروست ببه و به‌ر ب سۆفیگه‌ریێ به و مفای ژ بنگه‌ها كولتوورێ ئۆلدارێن كورد وه‌ربگره وه‌كه سۆفیگه‌رییا سه‌ركرده‌یێن كورد شێخ عه‌بدولسه‌لامێ بارزانی و قازی محه‌مه‌د.
نه‌رینا دویه‌مین یا د ناڤا یه‌كگرتوویێ ده كو ئه‌میندارێ وێ یێ نها سه‌لاحه‌ددین به‌هائه‌ددین سه‌ركێشییا وێ دكه، ئه‌ڤ نه‌رین دبێژه: پێویسته یه‌كگرتوو ل سه‌ر ئیسلاما بیانی به و خه‌باتا خوه بدۆمینه، ئیسلاما كو بنگه‌ها خوه ژ ته‌ڤگه‌را ئێخوانان و وه‌هابیێن ئه‌ره‌بستانێ دستینه، ئه‌ڤ هه‌ڤركییا ل ناڤ یه‌كگرتوویێ كو ل ڤێ داویێ سه‌رلهدایه، نها كه‌تییه ناڤ ته‌ڤ ئۆرگان و كۆمیته‌یێن وێ پارتیێ ده، لێ به‌لێ هه‌یا نها كادرۆیێن ئه‌ڤێ پارتیێ ب باشی فێهم نه‌كرنه.
خوه‌دی و سه‌ركێشێ نه‌رینا یه‌كه‌م كو ئه‌بو به‌كر كاروانی یه و د كۆنگره‌یا 8ێ ده خوه ژ بۆ پۆستا ئه‌میندارێ یه گشتی نامزه‌د كربوو، لێ نه‌كار سه‌ركه‌تنێ ب ده‌ست بێخه، ئه‌و د بێژه: شكه‌ستنا پشتی هلبژارتنا ڤێ داویێ یا باشوورێ كوردستانێ راستی یه‌كگرتوویێ هاتی، ب سه‌ده‌ما وێ ئیسلاما هاورده كری بوو، هه‌موه‌خت دبێژه پێویسته ئه‌م ئێدی ڤێ قه‌بوول نه‌كن و پێویسته ئه‌م مفای ژ ئه‌زموونا پارتییا نه‌هزه یا تۆنسی و پارتییا داد و گه‌شه‌پێدانێ ئاكه‌پێ وه‌ربگرن ژ به‌ر كو وان ل گۆری خوه و به‌رژه‌وندییا جڤاكا خوه ئیسلام وه‌زیفه‌دار كریه.
لێ به‌لێ ب سه‌ده‌ما كو پرانیا هه‌ری زۆر یا كادرۆیێن یه‌كگرتوویێ بنگه‌ها فكرا وان ژ ژ فكرا حه‌سه‌ن به‌نا و سه‌ید قوتبی یه، رێیا خوه‌دیێ فكرا سۆفیگه‌ریێ هێسان نه‌بوو، له‌و كۆنگره‌یا 8ێ سه‌لاحه‌ددین به‌هائه‌ددین ژ بۆ رێبه‌راتییا پارتییا خوه ب ئێختیاره‌كه ئه‌وله‌تر دیت و ژ بۆ رێبه‌راتیێ ده‌ست نیشان كر.
