کەجەکە کوشتنا قاسم سلێمانی دکە گرۆڤە ل سەر راستیا تێزێن ئۆجالان
هه‌ڤسه‌رۆكتیا كونسه‌یا رێڤه‌به‌ر یا كۆما جڤاكێن كوردستانی كه‌جه‌كێ، سه‌یوانا سیاسی یا په‌كه‌كێ، ل سه‌ر كوشتنا قاسم سوله‌یمانی، فه‌رماندارێ فه‌یله‌قا قودس یا ئیرانێ داخویانی دا و تێده گه‌له‌ك ب روو قایمی ئێریشی هزرا نه‌ته‌وه‌یی دكه و پشتگرییا خوه ژ بۆ ده‌وله‌تێن داگیركارێن كوردستانێ ئیعلان دكه.
ھەڤسەرۆکتیا کونسەیا رێڤەبەر یا کەجەکێ ل سەر کوشتنا قاسم سوله‌یمانی، فەرماندارێ فەیلەقا قودس یا سپایێ پاسدارێن ئیرانێ و ئەبۆ موهدی موهەندس، جێگرێ سەرۆکێ دەستەیا هەشدا شەئبی یا ئیراقێ، داخویانی دا و دەست نیشان کر کو ژ بلی رێیا ئۆجالان رێبەرێ زیندان کری یێ پەکەکێ، تو چارەسەریەکە دن نینە و پێویست دکە هەر کەس و ئالی تێزێن ئۆجالان ژ بۆ چارەسەرکرنا هەموو پرسگرێکێن د ناڤبەرا گەلێن جیهانێ دە ب بنگەهـ وەرگرە.
د داخویانیا کەجەکێ دە هاتیە: «ل جوگرافیایا کو سیستەما دەولەتپەرەستا 5 ھەزار سالی دەرکەتیە ھۆلێ، کریزەکە کوور دەست پێ کریە و ب دەستوەردانا ھێزێن مۆدەرنیتەیا کاپیتالیست ئەڤ کریز بێھتر تێ گران کرن، نەھێزێن ھەرێمی نەژی ھێزێن ناڤنەتەوەیی خوەدی نەخشەرێیەکە چارەسەریێ یا پرسگرێکێن بەرفرەھێن ل رۆژھلاتا ناڤینن».
کەجەکە بەردەوام دکە و دبێژە: «کوشتنا یەک ژ رێڤەبەرێن ھەری گرینگێن لەشکری و سیاسی یێن ئیرانێ قاسم سوله‌یمانی و جێگرێ سه‌رۆكێ ده‌سته‌یا ھەشدا شەئبی ئه‌بۆ مەھدی موھەندس ل بەخدایێ، ئەڤ راستی جارەکە دن راخست پێش چاڤان کو چارەسەریا مۆدەرنیتەیا دەمۆکراتیک، براتیا گەلان» یا کو ئۆجالان ئەڤ یەک پشتی تەسلیم بوونا خوە ب دەولەتا ترکیێ ره ل گراڤا ئیمرالیێ دەرخستیە هۆلێ، یەکانە ئالتەرناتیڤە کو پرسگرێکێن د ناڤبەرا گەلان دە وەرن چارەسەر کرن، لێ کەجەکە تو رێیەکە بنگەهین دەست نیشان ناکە ژ بۆ چاوانیا بنەجی کرنا براتیێ د ناڤبەرا گەلان دە، ژبەرکو ئەو باش فێم دکن بنەجیکرنا براتیا د ناڤبەرا گەلان ده، پر زەهمەت ترە ژ دامەزراندنا دەولەتان، ئەو ب تەنێ ئاخافتنا رێبەرێ خوە یاکو د ئیمرالیێ دە ژ وان رە دشینە باس دکن.
په‌كه‌كه پشتگریێ ل بریارا پارله‌مه‌نا ئیراقێ دكه، لێ هه‌موه‌خت ژبیر كر كو ئه‌و ژی هێزه‌كه بیانی یه ل سه‌ر خاكا باشوورێ ولات
کەجەکە د بەردەوامیا داخویانیا خوە دە دبێژە: «تەڤگەرا ئازادیێ یا کورد ل دژی وان پێکانین و پۆلیتیکایەنە کو چارەسەریا پرسگرێکێن ل رۆژھلاتا ناڤین د دەستوەردانا دەرڤە دە دبینن» ب ڤێ یەکێ ژی ژ ئالیەکێ کەجەکە پالپشتیا بریارا پارلەمێنتۆیا ئیراقێ دکە ژ بۆ دەرکرنا هێزێن بیانی د ناڤا خاکا ئیراقێ دە، لێ بەلێ کەجەکێ ژ بیر کریە کو ل گۆرەی یاسایا ناڤدەولەتی ئەو ب خوە ژی هێزەکە بیانی نە کو نها ل سەر خاکا هەرێما باشوورێ کوردستانێ کو بەشەکە ژ ئیراقێ چالاکیێن خوە ئەنجام ددن و گەر ل گۆر ڤێ یاسایێ بە، هەری زوو پێویست دکە ئەو ب خوە ژی خاکا ئیراقێ ب جی بهێلن و هەرن ل سەر خاکا خوە.
کەجەکە دبێژە: «رابوونا ل بەر دەستوەردانا دەرڤە کو مەبەست پێ هێزێن ئەمەریکی نە ل ئیراقێ دە ژ بۆ پێکھاتنا ئاشتی و ئارامیێ ل رۆژھلاتا ناڤین گرینگە، ئەڤ یەک ژی دچە خانه‌یا پالپشتی کرنا ستراتیجا دەولەتا داگیرکار ئا ئیرانێ کو نها دخوازە ل ئیراقێ و ناڤچەیێ پێک بینە».
کەجەکە زوور ب روو قایمی ئێریشێ دکە سەر هزرا نەتەوەیی و دبێژە «ب رێ چوون ل سەر خەتا نەتەوەیی یا دەمۆکراتیک پرسگرێک چارەسەر نابن»، ئانکو جارەکە دن ل ڤر دژاتیا خوە ژ بۆ داخوازا رەوا یا گەلێ کورد ژ بۆ دامەزراندنا دەولەتەکە سەربخوە مینا دەولەتێن دن دیار دکە کو بێ گۆمان ئەڤ یەک ژی دیسان دچە قادا پشتەڤانیکرنا هزرا دەولەتێن داگیرکارێن کوردستانێ ب تایبەتی دەولەتا ترکیێ و ئیرانێ.
كه‌جه‌كه ب وێ نه‌رینا خوه سته‌م و زۆرداریا ده‌وله‌تا داگیركارا ئیرانێ ل دژی گه‌لێ كورد، ب تایبه‌ت ل رۆژهلاتا ولات ب درێژاهیا دیرۆكێ ژبیر كر كو هه‌یا رۆژا مه یا ئیرۆ ئه‌ڤ سته‌م ده‌وام دكه.
کەجەکە د بەشەکە ئاخافتنێن خوە دە باس ل دیرۆکەک 5 هەزار سالی دکە، لێ بەلێ د بەشەکە دن دە باس ل 100 سالێن رابووری دکە و وەها دیار دکە کو ب تەنێ د ڤان سەد سالان دە شەر و کوشتن هەبوویە، کەجەکە دبێژە: «ئێدی مینا 100 سالێن دەرباسبوویی بێی ئیرادەیا گەلان، ب شەر ئان ژی لھەڤکرنا ھێزێن سەردەست ئاشتی و ئارامی پێک نایێ» لێ بەلێ ب تو ئاوا باس ل ئیرادەیەکێ ناکە کو ژ ئالیێ دەولەتەکێ ڤە هاتبه نیشاندان ژ بۆ براتیا گەلان، ژبەرکو ئەو باشتر ژ هەر ئالیەکە دن دزانە کو براتیا گەلان تشتەکە پر زەهمەتە، زەهمەت تر ژ هەر تشتەکە دن د ڤێ جیهانێ دە.
د بەشەکە دن ئا داخویانیا خوە دە کونسەیا رێڤەبەر ئا کەجەکێ باس ل دەولەتا ترک دکە و دبێژە: «دەولەتا ترک ھەول ددە ژ ئالۆزیێ سوود وەرگرە، لێ ب تو ئاوا باس ل دەولەتا ئیرانێ و وان تاوانان ناکە یێن کو رەژیما ئیرانێ ب رێیا قاسمێ سولەیمانی و ب درێژاهیا دیرۆكێ ب گەلێ کورد رە کرینە ب تایبه‌ت رۆژهلاتا كوردستانێ، کەجەکە دخوازە ب ڤێ یەکێ هەم نەرەهەتیا خوە ل همبەر کوشتنا قاسم سولەیمانی دیار بکە هەم ژی ب رۆکەش دژاتیا دەولەتا ترک بکە».
