ئالیێن كوردی یێن نێزی ئیرانێ و شه‌رێ ب وه‌كاله‌تێ ته‌هران و واشنتۆنێ

ئالیێن كوردی یێن نێزی ئیرانێ و شه‌رێ ب وه‌كاله‌تێ ته‌هران و واشنتۆنێ

به‌نده‌كا لهه‌ڤهاتنا ناڤبه‌را ئیرانێ و په‌كه‌كێ به‌هسا شه‌رێ هه‌ڤبه‌شێ دژی ئیمپه‌ریالیزمێ دكه‌

جه‌سه‌دێ قاسم سوله‌یمانی ل ئیرانێ باژار ب باژار تێ گێراندن و چاڤدێر شەرێ ب وەکالەتێ ئیرانێ ب بهێزترین ئەگەرا بەرسڤدانا کۆمارا ئیسلامی یا ئیرانێ ل همبەر کوشتنا ناڤبری ددن ناساندن، هەڤدەم ئیران لهەڤهاتنا ناڤۆکی سڕ دکە و ئەورۆپا ژی دلگرانیا خوە نیشان ددە.

ئیرۆ رۆژا دوشەمی 6/1/2020ان جەسەدێ قاسم سولەیمانی ل باژارێ تەهرانێ و ژ ئالیێ عەلی خامەنەیی رێبەرێ کۆمارا ئیسلامی یا ئیرانێ ڤە نمێژ ل سەر هات کرن و بریارە جەسەدێ قاسم سولەیمانی بهێت هنارتن ژ بۆ باژارێ قوم و پاشان بگهینن باژارێ کرمانێ جیێ ژ دایکبوونا وی و ل ور بێ بن ئاخ كرن.

د مەراسیما ئیرۆ یا تەهرانێ دە، خامەنەیی د دەما کرنا نمێژا مەیتان ده‌ ل سەر جەسەدێ سولەیمانی، ب بەردەوامی دگریا کو ئەڤ یەک ژی دیار دکە رێبەرێ ئیرانێ ب کوشتنا سولەیمانی پر تۆرە بوویە یان هەری کێم وها خوەیا دکە کو مرنا سولەیمانی ئەو پر خەمگین کریە.

گریانا کەسەکێ ژ بۆ خوەشتڤیەکێ دبە نۆرمال بە، لێ بەلێ گریا خامەنەیی د دیرۆکا ئیرانێ دە هەرتم پەیامەک تێدە هەبوویە و سپایێ پاسداران ل همبەر وان کەسێن بوویە سەدەما گریانا خامەنەیی کارڤەدانێن توند هەبوویە. پرس ئەڤە گەلۆ جارەکە دن ژی وێ وها بە و وێ سوپا کارڤەدانەکە توند ل همبەر ئەمەریکایێ هەبە؟ هەرچەند هەیا نها تو تشتەک خوەیا نیە، لێ بەلێ دەستهەلاتدارێن بچووک و مەزن یێن ئیرانێ ل ڤان چەند رۆژان دە سۆزا تۆلهلدانەک مەزن دایە.

پرسا هەری گرنگ تر ئەڤە کو دبە ئاوایێ کارڤەدانا ئیرانێ چاوا بە؟

ل گۆرەی شرۆڤەیا چاڤدێران و بسپۆرێن رەوشا ئیرانێ، کۆمەکە بژاردەیان  ل همبەر تەهرانێ دە هەنە، ژ بۆ ڤێ یەکێ کو سلۆگانێن خوە بکن کریار و حەیفا فەرماندارێ خوە یێ پاسدار هەلینن،  ئێریشا مۆشەکی بۆ سەر بەرژەوەندیێن ئەمەریکا ل ناڤچەیێ، ئێریشا مۆشەکێ بۆ سەر ئیسرائیلێ، ئەنجامدانا تەقینان ل ئەمەریکایێ و ناڤەندێن ئەمەریکی ل سەرانسەری جیهانێ، دەرکرنا هێزێن ئەمەریکایێ ژ ناڤا ئیراقێ دە، شەرێ سایبری و هەر وها شەرێ ب وەکالەت ب رێیا میلیشیایێن سەر ب تەهرانێ ل ناڤچەیێ، بەشەکن ژ وان بژاردەیان.

هەر یەک ژ ڤان بژاردەیان پێدڤی ب شیان و تێچوویێن ماددی و مەعنەوی هەیە و هەر وها وێ باندۆرا خوە ل سەر رەوشا ئیران و ناڤچەیێ ژی هەبە.

 یاکو زەلالە هەیا نها بەرپرسێن ئیرانێ ناخوازن ب ڤێ رەوشا خوە یا شەپرزە یا ئابووری و هەر وها بۆ لاوازیا شەرعیەتا ناڤخوە کو د ڤان چەند سالێن رابووری دە ب ئاوایەکە بەرچاڤ روو ب روویێ وێ بوویە و ل دوماهی هەلچوونا جەماوەری دە ل چەند مەهێن رابووری گهان گۆپیتکێ، خوە تووشی شەرەکە مەزن دگەل ولاتەکە زلهێز مینا ئەمەریکایێ بکن. ئەو ب خوە باش دزانن کو ئەڤ شەر دبە ب رامانا داوی ئانین ب 4 دەهەیان ژ دەستهلاتداریا ئیسلامیان ل ئیرانێ و خوە پارچە، پارچە بوونا وی ولاتێ فرە نەتەوە و فرە ئۆل بینە.

 وەزارەتا دەرڤە و هنەک رایەدارێن دن یێن خوەدی پێگەهێن بلند ل ئیرانێ، ب ئەشکەرە تەکەز کریە کو هەز ل شەران ناکن، ئانکو ئەگەرا ئێریشا راستەراست یا مۆشەکی یا ئیرانێ ژ بۆ سەر بەرژەوەندیێن ئەمەریکایێ ل ناڤچەیێ دبە ئەگەرەک بهێز نەبە، ژبەرکو ئەمەریکا ب روونی تەکەز کریە کو تو ئێریشەکە راستە راست یا ئیرانێ بێ بەرسڤ ناهێلن و ئەڤ یەک ژی ب واتەیا دەستپێکا شەری تێ.

ئێریش بۆ سەر ئیسرائیلێ هەرچەند دبە د دەمەکە کورت دە بکارە د بەرژەوەندییا ئیرانێ دە بە و سیستەما بەرەڤانیا مۆشەکی یا ئیسرائیلێ “گونبەدا ئاسنین”، نەکارە هەموو وان مۆشەکێن کو هیزبوللا د ئێک دەم دە ئاراستەی وی ولاتی دکن ژناڤ ببە، دبە هنەک ژ وان ئارمانجا خوە بینن، لێ بەلێ کارڤەدانا وێ دبە ب بهایێ ژناڤچوونا وان پێگەهێن مۆشەکی یێن هیزبوللا بە کو ئیرانێ بۆ دەما سالێن دوور و درێژ ب خەرجکرنا تێچوونێن زۆر کاریە بگەهینە لبنانێ و وەکە کارتەکە بهێز ل سەرخستنا پرۆژەیا هیلالا شیعی بکار بینە. پرۆژەیەک کو قاسمێ سولەیمانی پێکۆلێن زۆر ژ بۆ ئەنجام دانە و دبە ئیرانێ نەڤێت ب کارڤەدانا خوە کارەکێ بکە کو پرۆژە ب تەمامی ژناڤ بچە.

ده‌رخستنا هێزێن ئه‌مه‌ریكی ژ ئیراقێ كاره‌كێ ئاسان نابه‌

ئەگەرا دەرکرنا هێزێن ئەمەریکی ژ ئیراقێ هەرچەند ل پارلەمێنتۆیا ئیراقێ کو پرانیا شیعەیێن نیزی ئیرانێ پێکئانیە، هاتیە پەژراندن لێ بەلێ ژ ئالیەکێ جێبەجێ کرنا بریارێ دبە ئاسان نەبە و ژ ئالیەکە دن کارڤەدانەک وها نابە کو هەم هەیبەتا شکەستی یا سوپایێ پاسداران و کۆمارا ئیسلامی ڤەگەرینە و لاوازیا ئەولەهی و سەربازیا ئیرانێ پێ ڤەشێرە.

رەوشا ئیراقێ ژ ڤێ یەکێ شەپرزەتر تێ بەرچاڤ کو بکارە ئەمەریکا ژ ناڤ ئیراقێ دەربکە. ترامپ گەفێن دۆرپێچێن ئابووری ل سەر ئیراقێ کرن و داخوازا وان تێچوویان دکە کو واشنتونێ ژ بۆ دامەزراندنا ناڤەندێن خوە یێن سەربازی ل ئیراقێ مەزاختنە کو ئەڤ یەک ژی د رەوشا نها یا ئیراقێ دە کارەکە پر زەهمەتە، هەڤدەم ژ بلی پرانیا سوننەیان، بەشەک بەرچاڤ ژ جاددەیا شیعەیان ب ده‌ستوەردانێن ئیرانێ د ولاتێ وان دە نەرازینە و ئامادە نینە ولاتێ وان ببە قوربانیا بەرژەوەندیێن کۆمارا ئیسلامی یا ئیرانێ و دخوازن هەیبەت و ئارامی و ئاڤەدانیا د وەلاتێ وان دە بنەجی ببە.

بهێزترین ئەگەر شەرێ ب وەکالەتە، ئانکو گرۆپێن نێزی کۆمارا ئیسلامی یا ئیرانێ ل شوونا تەهرانێ ئێریشی سەر ناڤەند و بەرژەوەندیێن ئەمەریکا ل ناڤچەیێ بکن و ب ڤێ یەکێ ئیران هەم وێ تەڤلیهەڤیان ل هوندرێ ولاتێ خوە دوور بکە هەم ژی وێ خوە ژ شەرێ راستە راست دگەل زلهێزەکە وەکە ئەمەریکا بپارێزە.

گرۆپێن ناڤچەیێ کو هەڤپەیمانێن ئیرانێ نە و تەهران دخوازە شەرێ ئەمەریکیان پێ بکە کینە؟

هیزبولاها لبنانێ گرۆپێن جودا یێن هەشدا شەئبی یا ئیراقێ، جیهادا ئیسلامی، هوسیێن یەمەنێ و خوە گرۆپێن توندرەوێن نێزی ژ قاعیدە و هەژمارەک ژ گرۆپێن دن ژ وان گرۆپانە کو چەندین سالە پەرەیان ژ ئیرانێ وەردگرن و کۆمارا ئیسلامی بەردەوام ژ بۆ پاراستنا بەرژەوەندیێن خوە وان بکار دئینە. ژ ڤان گرۆپان کیژان ژ وان ئامادەنە شەری ژ بۆ ئیرانێ بکن هەیا نها دیار نیە لێ بەلێ ئیرۆ کەچا قاسم سولەیمانی ل بەر جاڤێن هەزاران خەلکێ و د مەراسیما پێشوازی کرنێ ده‌ ل تەرمێ بابێ خوە دە داخواز ژ هەسەن نەسروللا کر کو تۆلا بابێ وێ هلینە.

لێ بەلێ یاکو پەیوەندی ب کوردستانێ ڤە هەی ئەڤە کو جیێ داخێ یە رەژیما داگیرکار یا ئیرانێ کاریە هەژمارەک ژ رێخستنێن کوردستانێ سەردا ببە و زۆر جاران د ئاراستا ئارمانجێن خوە یێن داگیرکاری ئەو رێخستن بکار ئانینە. دژاتیکرنا رەفەراندۆما خوەسەریا کوردستانێ و داگیرکرنا کەرکووکا هەرتم کوردستانی و درست کرنا تەڤلیهەڤیێن شنگالێ و ئێریش ژ بۆ سەر بارەگەهێن پارتیێن رۆژهلاتا کوردستانێ و تەرۆر کرنا دەهان سەرکردە و پێشمەرگەهێن وان پارتیان و تۆپبارانکرنا بەردەوام یا ناڤچەیێن سینۆری یێن باشوورێ کوردستانێ و…بەشەک ژ میناکێن ڤێ ئالیکاریێ نە.

په‌كه‌كێ سۆز دایه‌ ل ده‌ما پێویست ملێ خوه‌ بده‌ ئیرانێ و شه‌ری ژ بۆ بكه‌

پارتیا کارکەرێن کوردستانێ ب یەک ژ ستراتیژیترین هەڤالبەندێن کۆمارا ئیسلامی یا ئیرانێ د ناڤا کوردان دە تێ حه‌ساب كرن و ل گۆرەی لهەڤهاتنا وان دگەل ئیرانێ سۆز دایە ل دەما پێویست دە مل ب ملێ هەڤ ل دژی ئیمپریالیزمێ شەر بکن.

دبە نها دەما زەرووری و پێویست بە، رێبەرێن ئیرانێ د ڤان رۆژان دە باس ل ئەنیەکە بەرەڤانیا ناڤچەیی ل دژی ئیمپریالیزمێ دکن، گەلۆ پەکەکە وێ ئامادەبە د ڤێ زەمینێ دە بەشداربە؟ ئەڤ پرسە، پرسەکە پر گرینگە و چاڤدێرێن رەوشا کوردستانێ هێڤیدارن پەکەک جارەکە دن هەلویستەک وها نەگرە کو مفایێ وێ ژ بۆ داگیرکارێن کوردستانێ و زەرەر و مال وێرانیا وێ ژ بۆ نەتەوەیا ژێردەست و ستەملێکری یا کورد و خاکا داگیرکری یا کوردستانێ بە.

دبە دەما ڤێ یەکێ هاتبە ئەو لاینێن کو بەرانبەر بەرژەوەندیێن بەرتەنگ یێن حیزبی دە بوویە داردەستێ رەژیما داگیرکارا ئیرانێ و د زۆر پیلانێن وێ رەژیمێ دە بەشدار بووی کو ب تەنێ ئارمانجا وێ نەخوەشی و بەدبەختی یا زێدەتر ژ بۆ کوردان و بەردەوام بوونا پرۆسەیا داگیرکاریا کوردستانێ بوویە، چاڤخشاندنەکێ د وان پەیوەندیان دە بکن و ڤەگەرن ئالیێ نیشتیمانی و پێشەرۆژا خوە و نەتەوەیا خوە لسەر رەژیمەکا داگیرکارا کوردستانێ ئاڤا نەکن کو هنک مایە ژ بۆ مرنا وێ و رۆژێن داوی ژ تەمەنێ خوە ب شەپرزەیی د بۆرینە.

ب وێ هیڤیێ کو ئەو ئالی ل جیێ وێ یەکێ کو ببن داردەستێ ئاگرێ مالوێرانکەرێ کۆمارا ئیسلامی، ب تێهزرین د بەرژەوەندیێن نەتەویی و بلندێن کورد و کوردستانێ، د وێ راستیێ تێبگەهن کو ئارمانجا سەرجەم داگیرکارێن کوردستانێ کو رەژیما ئیرانێ ژی یەک ژ وانایە ئەڤە کو دژایەتیکرنا هزرا سەرخوەبوون خاز و رزگاریخازانەیا کوردان بکن.

«هێڤیدارین پەکەکە بۆ جارەکێ ب تەنێ هزر د بەرژەوەندیا گه‌لێ كورد ده‌ بكه‌»

سولەیمانی گەر ژ بۆ فارسەک فاشیست قارەمان بە ژ بۆ مە کوردان بیرهینەرێ خوینا شەهیدان و داگیرکرنا کەرکووکێ

 پێویست دکە د ڤێ راستیێ بگەهین کو قاسم سولەیمانی گەر ژ بۆ فارسەک فاشیست قارەمانەک بە ژ بۆ مە کوردان بیرهینەرێ خوینا شەهیدان و داگیرکرنا کەرکووکێ و دەهان برین و نەخوەشی و دەربەدەریێن دنە کو ل ژێر سیبەرا وی و سوپایێ وی دە ب سەرێ مە کوردان هاتن.

 هێڤیدارین پەکەکە و ئالیێن دن ئێن کوردستانێ یێن نیزی کۆمارا ئیسلامی یا ئیرانێ بۆ جارەک ب تەنێ ژی بە هزر د بەرژەوەندیا بلند یا نەتەوەیا مە دە بکن و شەرێ ب وەکالەتێ تەهرانێ و واشنتۆنێ نەکێشن ناڤا خاکا کوردستانا بریندار دە و د بەرژەوەندیا داگیرکاران دە نیشتیمانێ مە راستی نەهامەتیێن زێدەتر نەکن.