سه‌رۆكێ پارتیا ده‌مۆكرات یا كوردستانێ ئیرۆ ل گه‌ل ئالیكارێ وه‌زیرێ كارێن ده‌رڤه یێ ئه‌مه‌ریكایێ ژ بۆ رۆژهلاتا ناڤین جڤیا و راگهاند كو ب نه‌مانا هێزێن هه‌ڤپه‌یمانێتییا ناڤده‌وله‌تی، وێ ته‌رۆرێ ل ئیراقێ و ناڤچه‌یێ خورت بكه.
رۆژا پێنچشەم 9/1/2020ان ل سەلاھەددین مەسعوود بارزانی سه‌رۆكێ پارتییا ده‌مۆكرات یا كوردستانێ و رێبه‌رێ ملله‌تێ كورد، پێشوازیا داڤد سچەنکەر ئالیكارێ وەزیرێ دەرڤە یێ ئه‌مەریکایێ ژ بۆ کاروبارێ رۆژھلاتا ناڤین و شاندەکی ل گەل کر کو ژ ستەڤەن فاگن كونسلێ ئه‌مەریکایێ ل ھەولێر و چەند شێورمەندێن وەزارەتا دەرڤە یا ئه‌مەریکایێ پێکھاتبوون.
ل ھەڤدیتنێ دە پێشھاتێن داوی یێن ئیراقێ و گرژی و ئالۆزیێن ڤێ داویێ یا ناڤچەیێ ھاتن نرخاندن، ئالیكارێ وەزیرێ دەرڤەیێ ئه‌مەریکایێ ژ بۆ كاروبارێ رۆژھلاتا ناڤین ته‌كه‌ز کر کو وەلاتێ وان پابەندە ب ئیراق و ھەرێما کوردستانێ و خوازیارێ ئه‌وێ یه‌كێ نه كو پرۆسەیا سیاسی یا ئیراقێ بکەڤێ سەر رێیەکی دروست و ئارامی ڤەگەرێ.
ھەر ل ڤێ جڤینێ دە بارزانی رۆناھی خستە ل سەر رۆلا گرینگ یا ھەڤپەیمانێتییا ناڤده‌وله‌تی ل یەک ئالیکرنا شەرێ تەرۆرێ و ھشیاریا ئەوێ یه‌كێ ژی دا کو ب نەمانا ھێزێن ھەڤپەیمانان ل ناڤچەیێ وێ ببه سەدەما وێ یەکێ کو جارەکە دن تەرۆر ل بن ناڤێن جور ب جور خورت ببێ.
پەیوەندیێن د ناڤبەرا ھەرێما کوردستانێ و ئه‌مەریکایێ و ھەنگاڤ و چارەسەریێن ژ بۆ باشتر کرنا پرۆسەیا سیاسی یا ئیراقێ و ب جی گھاندنا داخوازیێن خوەپێشاندەرێن پارێزگەھێن ناڤەند و باشوورێ یێن ئسراقێ مژارەکە دنا ڤێ جڤینێ بوون.
