هه‌موو بزاڤان دكه‌ین ره‌وش ل ئیراقێ بهێت ئارام كرن
سه‌رۆكێ هه‌رێما كوردستانێ د كۆربه‌ندا ئابوورییا داڤۆسێ دا به‌شداری پانێله‌كێ بوو و تێدا ل ده‌ربارا ره‌وشا داوین یا ئیراقێ ئاخڤی و گۆت:«ئه‌مێ هه‌موو هه‌ولێن خوه د ده‌ین كو ره‌وش ل ئیراقێ بهێت ئارام كرن».
سەرۆکێ ھەرێما کوردستانێ، نێچیرڤان بارزانی د دەما پشکدارییا خوە دا ل پانێله‌كێ كۆربه‌ندا ئابوورییا داڤۆسێ دا ل وه‌لاتێ سویسرایێ ل دەربارا رەوشا ئیراقێ، راگەھاند: «نھا نەوەیەکێ نوو ھاتییە کو ماندی یە و ھەست دکەت دەستھەلات نه‌شێت پێدڤێن ڤی سەردەمی ژ وان را دابین بکەت».
گۆت ژی: «چار سالان جارەکێ ھەلبژارتن برێڤە دچن و ئەڤ نەوەیێ نوو پشکدارییێ د وان ھەلبژارتنان دا دکه‌ن، لێ د ئەنجامێ دا، ئەوێن د ھەلبژارتنان دا دەردکەڤن ل گۆر ڤیانا وان نینن».
ره‌وشا ئیراقێ ناڤه‌گه‌ریته پێش وه‌ختا خوه‌پێشاندانان
سه‌رۆكێ هه‌رێما باشوورێ كوردستانێ بەحسا وێ یەکێ ژی کر كو رەوشا ئیراقێ جودایە ژ قۆناغا بەری دەستپێکرنا خوەنیشاندانان ل ئێكێ ئۆکتۆبەرێ، نھا رەوشەک دی یە و ئێدی رەوش ناڤەگەریته قۆناغا بەرێ.
ل ده‌ربارا رۆلا ھەرێما کوردستانێ د ناڤ ئەڤێ رەوشێ دا، نێچیرڤان بارزانی ده‌ست نیشان كر كو هه‌رێما كوردستانێ هه‌موو هه‌ولێن خوه دده‌ت كو ره‌وش ل ئیراقێ بهێت ئارام كرن، ل دەربارا ھەبوونا ھێزێن ئەمەریکایێ ژی ل ئیراقێ راگەھاند، گەفا تەرۆرێ ل ئیراقێ جدی یە و ل سالا 2014ێ ل سەر داخوازا به‌غدایێ ئەڤ ھێز ھاتینە د ئیراقێ دا.
نێچیرڤان بارزانی: مه پێ باشه هێزێن ئه‌مه‌ریكایێ بمینن
هه‌ر وها گۆت: ئەرکێ ھێزێن ئەمەریکایێ راھینانە ب ھێزێن ئیراقی و ھەڤکاریکرنە د شەرێ دژی داعشێ دا و ژ ئەڤی چارچووڤه‌ی، مە ھەبوونا وان پێ باشە و ب پێویست دزانین ھێزێن ئەمەریکایێ ل ئیراقێ بمینن و ئەوا پەرلەمانا ئیراقێ کری، ب نەرینا مە کارەکێ نەدورست بوو.
سەرۆکێ ھەرێما کوردستانێ نێچیرڤان بارزانی د چارچۆڤەیا پانێلەکێ دە ل داڤۆسێ راگەھاند، کو پرسا سووریێ گەلەکی ئالۆزە، و دا زانین کو ھەتا نھا سیاسەتا وەلاتێن ئەورۆپا و ئه‌مەریکایێ ل دەربارێ سووریێ، نە زەلالە و پشتگرییا هه‌رێما باشوور ژی ژ بۆ رۆژئاڤا كوردستانێ دیاركر ل پێناڤێ گه‌هشتن ب چاره‌سه‌رییه‌كا گونجای ژ بۆ ره‌وشا وێ پارچه‌یا وه‌لات.
