سوپایێ ئه‌لمانیا كارێن خوه یێن مه‌شقا هێزێن پێشمه‌رگه‌ی جاره‌كا دی ده‌ست پێ كرن و ل سه‌ربازگه‌هه‌كا نێزیكی هه‌ولێرا پایته‌ختا هه‌رێما باشوور، به‌رده‌وامی ب ئه‌ڤێ مه‌شقێ دهێته كرن.
پشتی كو ل ده‌ما 3 حه‌فتیێن رابووری، سوپایێ ئه‌لمانیا به‌رنامه‌یا خوه یا مه‌شقا هێزێن پێشمه‌رگه‌یێ باشوورێ كوردستانێ ب ئاوایه‌كێ ده‌مكی راگرتی، ئه‌ڤرۆ جاره‌كا دی كارێن مه‌شقێ ل سه‌ربازگه‌هه‌كا نێزیكی باژارێ هه‌ولێرێ یێ پایته‌ختا هه‌رێما باشوورێ كوردستانێ ده‌ست پێ كرن.
ل گۆر ئاژانسا نووچه‌یێن ئه‌لمانیایێ، سوپایێ وی ولاتی ل هه‌ولێرێ ده‌ست ب مه‌شقا هێزێ پێشمه‌رگه‌ی كرییه، لێ به‌لێ كارێن مه‌شقێ ل ناڤه‌راستا ئیراقێ هاتنه راگرتن.
ولاتێ ئه‌لمانیایێ د چارچووڤه‌یا هه‌ڤپه‌یمانییا ناڤده‌وله‌تی یا دژی داعشێ دا، هه‌ڤكاریێن سه‌ربازی ژ بۆ هه‌رێما باشوورێ كوردستانێ دابین كرینه و مه‌شق ب هێزێن پێشمه‌رگه‌ی كرینه، هه‌موه‌خت هه‌ژماره‌كه شیره‌تكارێن سه‌ربازی شاندینه هه‌رێما باشوور.
چه‌كێ ب ناڤێ «میلانۆ» ژی دایه پێشمه‌رگه‌ی كو د جه‌نگا دژی ته‌رۆرێ دا ناڤوده‌نگیا ڤی چه‌كی د شكاندنا ئه‌ره‌به‌یێن مایینكری دا گه‌له‌ك به‌لاڤه‌بوو.
ئه‌لمانیایێ نێزیكی 300 سه‌رباز و شیره‌تكاران ل بنگه‌هه‌كا نێزی به‌غدا یا پایته‌ختا ئیراقێ و هه‌روها ل بنگه‌هه‌كا نێزی هه‌ولێرا پایته‌ختا هه‌رێما باشوورێ كوردستانێ هه‌نه.
