جیگرێ وەزیرێ کارێن دەرڤەیێ رووسیایێ سەردانا ھەولێرێ کر
سەرۆکێ هه‌رێما باشوورێ كوردستانێ نێچیرڤان بارزانی ل ھەولێرێ پێشوازی ل جیگرێ وەزیرێ کارێن دەرڤە یێ رووسیایێ میخایل بۆگدانۆڤ کر.
سەرۆکێ ھەرێما باشوورێ کوردستانێ نێچیرڤان بارزانی ل ھەولێرێ پێشوازی ل نوونەرێ تایبەتێ سەرۆکێ فەدەراسیۆنا رووسیایێ ڤلادمیر پووتین ژ بۆ کاروبارێن رۆژھلاتا ناڤین و ئافریقایێ و جیگرێ وەزیرێ کارێن دەرڤە میخایل بۆگدانۆڤ کر.
ل گۆری داخویانیا نڤیسینگەھا سەرۆکاتیا هه‌رێما باشوورێ كوردستانێ، نێچیرڤان بارزانی ل قەسرا سەرۆکاتیێ پێشوازی ل بۆگدانۆڤ، نوونەرێن گازپرۆما رووسی و ھەژمارەک دیپلۆماتێن پێرە کر.
ھات راگھاندن کو بارزانی و بۆگدانۆڤ تەکەزی ل وێ یەکێ کرن کو پێدڤییه ئیراق ژ بۆ ئالیێن ھەرێمی و ناڤدەولەتی نەبە قادا پەڤچوونان و دەربارێ پێنگاڤێن ژ بۆ کێمکرنا ئالۆزیێ ئاخڤین.
سه‌رۆكێ هه‌رێما باشوور و رایەدارێ رووسی مژارێن وەکە ل ئیراقێ ھەولێن جیگیر کرنا سەرۆکوەزیرێ نوو، خوەپێشاندانێن ل دژی حکوومەتێ، پرسگرێکێن د ناڤبەرا ھەولێرێ و به‌غدایێ دا د گەل ھەڤکارییا د ناڤبەرا ئارته‌شا ئیراقێ و پێشمەرگە دا ھاتن گۆتو بێژ کرن.
بارزانی و بۆگدانۆڤ ھەروھا ل سەر مژارێن وەکە رەوشا سووریێ، رۆلا رووسیایێ ل وێ دەرێ، پرسا کوردی ل سووریێ و سبەرۆژا کوردێن ل وی وەلاتی ئاخڤین.
