لێگەریانا تیمێن هاوارهاتنا هەیڤا سۆر و خەلکێ ژ بۆ دیتنا وی کۆلبەرێ کو پشتی بەرف و مژ و مۆرانێ ل بلنداهیێن چیایێن باژارێ سەقزێ ووندا بوویە بەرەدوامن. دوهی ژی کۆلبەرەک کورد یێ 50ی سالی ل ڤان بلنداهییان ب سەدەما سر و سەقەمێ قەرسی و جانێ خوە ژ دەست دا.
ل گۆر ئاخافتنا محمد باقر محمد، رێڤەبەرێ هەیڤا سۆر یا باژارێ کوردستانێ ل رۆژهلاتێ وەلات، دوهی سێ گرۆپێن کۆلبەران کو هەموو دبوون 23 کۆلبەر، ل بلنداهیێن پڕ بەرفێن سەرشیڤێ بەرزە ببوون هەموو هاتینە دیتن و د تەندروستیەکە باش دەنە.
لی بەرەڤاژی ل گۆر ئاخافتنێن کامل کریمان، فەرماندارێ تایبەتێ باژارێ سەقزێ تو زانیارییەک ل سەر دو کۆلبەرێن بەرزە بوویی نینە هەرچەند چاڤکانیێن لۆکالی و نەیێن فەرمی خەبەر دایە کو هەڤال و مالباتێن وان راگهاندیە “ئەو ب سەلامەتن و ژبەر رەوشا خەراب یا سەقای د جیەکێ ب ئەولەهی دە مانە”.
بابەتا کۆلبەران ل ئیرانێ ب تایبەتی ل باژارێنن هەڤ سینۆر یێن کوردستانا رۆژهلات دگەل کوردستانا باشوور د ڤان سالێن داویێ دە بوویە بابه‌تەکە هەری گەرم د ناڤا چاپەمەنییا ناڤدەوله‌تی ب گشتی و چاپەمەنییا لۆکالی ب تایبەتی.
کۆلبەرێن کورد، بەهرا پتر کالایێن وەکە پارچە قوماش، جگارە، تۆڤێ چایێ و ئامۆرێن ئەلێکتریکی یان ب پشتا خوە یان ل سەر پشتا دەواران ل چیایێن ئاسێ یێن کوردستانێ ل سینۆرێ د ناڤبەرا رۆژهەلات و باشوور ڤەدگوهێزن.
هەر سالا هەژمارەک ژ کۆلبەران د ڤێ رێیێ دە، کو ب تاکە رێیا خوەدیکرنا مالباتێن وان تێ زانین جانێ خوە ژ دەست دده‌ن، کۆلبەر راستی خەتەرەیێن پر مەزن وەکە رێیێن ئاسێ یێن چیا، تەقینا مایینان ل سەر سینۆر، خەتەرەیا گوللـەیێن پاسدارێن ئیرانی یان ژی بەرف و مژ و مۆرانێ و هنەک جاران خەتەرەیا هەیوانێن درندە دبن.
بێکاری، هەژاری و نەداری ل رۆژهلاتێ کوردستانی سەدەما سەرەکە یا کۆلبەریێ یە.
تێ زانین کو هەیڤ و نیڤان پێش نها ژی دو جوانێن کورد ژبەر سەدەما رەنیا بەفرێ جانێ خوە ژ دەست دابوو.
