ل ئدلبێ، ٤ سەربازێن ترکیێ د ئێریشەکە ئارتێشا سووریێ دا ھاتن کوشتن. ترکیە ژی گەفا تۆلڤەدانێ دکەت.
وەزارەتا بەرەڤانیێ یا ترکیێ ئاشکەرە کر، ئەڤرۆ دانێ سپێدێ ٤ سەربازێن وان د ئێریشەکا ئارتێشا سووریێ دا ل سەر خالەکا چاڤدێریێ یا ترکیێ ل دەردۆرا ئدلبێ ھاتن کوشتن و ٩ سەربازێن دی ژی بریندار بوون، برینا ئێکێ ژی گەلەک گرانە.
وەزارەتا بەرەڤانیێ یا ترکیێ ئاماژە ب وێ ژی دا، ئارتێشا وان بەرسڤا وێ ئێریشێ دا و شیان ھەژمارەک ژ ئارمانجێن ئارتێشا سووریێ تێک ببەن.
ل ئدلبێ ١٢ خالێن چاڤدێریێ یێن ترکیێ ھەنە، وەزیرێ بەرەڤانیا ترکیێ ھولوسی ئاکار بەری چەند رۆژان گۆتبوو، ئەو خالێن چاڤدێریێ تێرا خوە ھاتنە ئامادەکرن و ژ بۆ ھەر جورە ئێرشێ ژی د ئامادەباشیێ دا نە.
ژ ئالیەکی دی ڤە، رەوانگەھا سوورییا مافێن مرۆڤان بەلاڤ کر، ترکیا ل دەریێ سینۆرییێ کەفر لۆسینیێ ل باکورێ ئدلبێ، تەنێ دوھی ٣٢٠ بارھلگر چەک و پێویستیێن سەربازی و لۆژستی دەرباسی سووریێ کرن و بەر ب ئدلب و ھەلەبێ ڤە شاندن.
ئەڤ نووچە هەڤدەمە د گەل پێشڤەچوونێن سوپایێ سووریێ ل دەردۆرێن ئێدلبێ کو پشتی ڤان پێشڤەچوونان ترکیێ هێزەکە زێدە ژ بۆ پالپشتی کرنا هێزێن ئۆپۆزسیۆنا سووریێ دشینە ڤی باژێری.
هەرچەند ل ١٢ کانوونا دویێ یا ئەڤسال رێکەفتنەک د ناڤبەرا مۆسکۆ و ئەنقەرێ ژ بۆ ئاگربەستێ ل سووریێ هات ئەنجامدان لێ بەلێ رەژیما سووریێ بەردەوامە ل ئۆپەراسیۆنێن خوە و ئەڤ یەک ژی بوویە سەدەما نیگەرانیا ترکیێ.
