سه‌رۆكێ هه‌رێما باشوورێ كوردستانێ ئه‌ڤرۆ ل گه‌ل ئالیێن سیاسی و فراكسیۆنێن كوردستانی ل په‌رله‌مانێ ئیراقێ كۆمبوو، یه‌كخستنا هه‌لوه‌ستێ ئالیێن سیاسی، پێشهاتێن سیاسی ل ئیراقێ و گاڤێن پێكئینانا حكوومه‌تا فه‌ده‌رال گۆتوبێژ كرن.
ئه‌ڤرۆ رۆژا سێشه‌مبێ ل بارەگەھێ سەرۆکاتییا ھەرێما کوردستانێ ل ھەولێرێ، ب سەرپەرشتییا نێچیرڤان بارزانی، سەرۆکێ ھەرێما کوردستانێ و ب ئامادەبوونا ھەردوو جێگرێن سەرۆک، كۆمبوونا ھەڤپشکا ئالیێن سیاسی، جێگرێ سەرۆکێ په‌رله‌مانێ ئیراقێ و فراکسیۆنێن کوردستانی ل په‌رله‌مانێ ئیراقێ ھات ئەنجام دان.
د كۆمبوونێ دا، رەوشا ئیراقێ و گاڤێن یەکخستنا ھەلوێستێ ئالیێن سییاسی، فراکسیۆن و سازیێن فەرمی یێن ھەرێما کوردستانێ ژ بۆ چاوانییا رەفتار کرنێ د گەل پێشھاتێن سیاسی ل ئیراقێ و کوردستانێ، ھەروەھا گۆتوبێژ ل دەربارێ گاڤێن پراکتیکی ژ بۆ پێکئینانا ھەڤپەیمانییا کوردستانی ھاتن كرن.
پشتی گۆتوبێژان، نەرین و تێبینیێن فراكسیۆنێن کوردستانی ل دەربارێ چاوانییا رەفتار کرنێ ل گەل سازیێن حكوومه‌تا فه‌ده‌رال ل بەغدایێ و بەحسکرنا نه‌خشه‌رێیا رەفتار کرنێ ل گەل پێشھاتێن ئیراقێ هاتن لهه‌ڤ گوهارتن.
تەڤایا ئالییان ل سەر وێ یەکێ رژد بوون کو پێدڤییه ب یەکھەلوه‌ستی رەفتار ل گەل تەڤایا پرسان بھێته کرن و گاڤێن پراکتیکی ژی ژ بۆ پێکانینا ھەڤپه‌یمانیێ و پەیرەوەکێ گشتگیر ژی بۆ بھێت ئامادە کرن کو جھێ پەسندکرنا تەڤایا فراکسیۆنان بیت.
كۆمبوونێ ب گرنگی ڤە، رەوش و پێشھاتێن ئیراقێ گۆتوبێژ كرن و دوپاتی ل سەر پێدڤییا ڤەگەراندنا ئارامی و ئەولەھیێ ژ بۆ وەلات و بكارنه‌ئینانا توندوتیژیێ ل دژی خوەپێشاندەرێن سڤیل.
د ته‌وه‌ره‌كێ دی یێ كۆمبوونێ دا، گاڤێن پێکئینانا کابینەیا نوو یا حكوومه‌تا ئیراقێ، هاتن به‌حس كرن و د ڤێ دەربارێ دا ئالیێن ئامادە رژد بوون کو بەرژەوەندیێن بلند یێن ھەرێما کوردستانێ، پاراستنا قەوارەیا دەستووری و سیاسی یا وێ و مافێن دەستووری یێن گەلێ کوردستانێ و دەڤەرێن کوردستانی یێن دەرڤەی ئیداره‌یا ھەرێما کوردستانێ، بنەمایا سەرەکی و ھەڤپشکا ئالیێن سیاسی بیت.
هه‌روه‌ها دیار كرن، ھەر گاڤەک ژی ژ بۆ پێکئیانا کابینەیا نوو ب هه‌ماهه‌نگی د ناڤبەرا ئالیێن سیاسی و سازیێن فەرمی یێن ھەرێما کوردستانێ پێدڤییه ب ئاوایەکی بن کو مافێن ھەرێما کوردستانێ تێدا پاراستی بن و تەڤایا ئالییا، پشکدارییا کارا د دروستکرنا بریارێ دا هه‌بیت.
