سه‌رۆكێ پارتییا ده‌مۆكرات یا كوردستانێ و رێبه‌رێ ملله‌تێ كورد ئیرۆ ل گه‌ل شانده‌كه هه‌ڤبه‌شا پارێزگه‌رێن ئیراقێ و جێگرێن پارێزگه‌ران جڤیا، شاندا ئیراقێ داخواز كر ئه‌زموونا باشوورێ كوردستانێ ژ بۆ ئیراقێ بهێت ڤه‌گوهاستن.
ئیرۆ رۆژا چارشەمی 12/2/2020ێ ل سەلاحەددین سەرۆک مەسعوود بارزانی پێشوازیا شاندەکێ ھەڤبەش یێ پارێزگەر و جیگرێن پارێزگەرێن پارێزگەھێن نه‌ینه‌وا، کەرکووک، بەغدا، ئەنبار، دیوانیه، زیقار، سەلاحەددین، واست، میسان، نەجەف، کەربەلا، بەسرا، دیالی، هه‌روه‌ها موسەننا و ھەولێرێ کر.
د ھەڤدیتنێ دا کو رێبەر ئەحمەد وەزیرێ ناڤخوە یا حکوومەتا ھەرێما کوردستانێ و د. سەباح ئەل دلێمی وەزیرێ پلاندانانا ئیراقێ ئامادە بوون، شاندا میھڤان پێزانینێن خوە ژ بۆ ئارامی و گەشبوون و پێشکەتنێن ھەرێما کوردستانێ ھەبوو و داخواز کرن کو ئەزموونا سەرکەتیا ھەرێمێ ژ بۆ پارێزگەھێن دن یێن ئیراقێ ژی بێ ڤەگوھەستن، ھەر وھا سپاسی گەلێ کوردستانێ و حکوومەتا ھەرێمێ کرن کو د دەما ئێریشا تەرۆریستان و ل رۆژێن دژوار دا بوونە پەناگەھا سەدان ھەزار کۆچبەرێن ئیراقێ.
ئامادەبوویێن جڤینێ پەسنا رۆلا دیرۆکی یا سەرۆک بارزانی دان و ژ بلی وێ یەکێ بالکشاندن ل سەر قەیرانا نھایا ئیراقێ و داخواز کرن کو سەرۆک بارزانی رۆلا خوە یا ب باندۆر ل چارەسەرکرنا کێشەیێن ئیراقێ و ڤەگەراندنا ئارامی و ھێڤییا ئیراقێ دا ھەبێ.
ھەر د ڤێ ھەڤدیتنێ دا سەرۆک بارزانی گۆتارەک پێشکێشی ئامادەبوویێن جڤیێ کر و دیتن و نه‌رینێن خوە یێن د دەربارێ رەوشا سیاسی یا ئیراقێ خستەروو و رۆناھی ژی خستە سەر وان سەدەمان کو قەیران و کێشەیێن نھا یێن ئیراقێ پێکھاتنە.
سەرۆک بارزانی ژ بلی بالکشاندنا ل سەر ئەزموونا سەرکەتیا ھەرێما کوردستانێ، راگھاند کو ئەگەر ل ئیراقێ دا ئاشتەڤایی یا راستین هاتبا پەیرەو کرن و ھەموو ئالییەک پابەندی دەستوورێ بان نھا ئیراق دا د رەوشەکە باشتر دا بیت.
ل درێژاھیا ئاخفتنێن خوە دا سەرۆک بارزانی تەکەز ل سەر چاندا لێبۆرینی و پێکڤەژیانا د ناڤبەرا پێکھاتێن ئیراقێ کر و د دەربارێ پەیوەندیێن د ناڤبەرا ھەرێم و پارێزگەھێن ئیراقێ پشتەڤانییا خوە یا تەڤاھی ژ بۆ پێشخستنا وان پەیوەندییان و کارێ ھەڤبەش ل وارێ گەشەپێدان و ئاڤادانکرنا وان دا راگھاند.
