وه‌زیرێ پاراستنا ئه‌مه‌ریكایێ: «مه‌شقا پێشمه‌رگه دێ به‌رده‌وام بیت»
سه‌رۆكێ حكوومه‌تا باشوورێ كوردستانێ، پرسگرێكێن ئیراقێ و ناڤچه‌یێ ل گه‌ل وه‌زیرێ پاراستنا نه‌ته‌وه‌یی یا ئه‌مه‌ریكایێ گۆتوبێژ كرن.
مه‌سروور بارزانی، سه‌رۆكێ حكوومه‌تا باشوورێ كوردستانێ، ئیرۆ رۆژا شه‌می 15/2/2020ێ ل میونشنێ ل گه‌ل وه‌زیرێ پاراستنا نه‌ته‌وه‌یی یا ئه‌مه‌ریكایێ جڤیا، مارك ئێسپه‌ر وه‌زیرێ پاراستنا نه‌ته‌وه‌یی یا ئه‌مه‌ریكایێ پشتگری یا ولاتێ خوه ژ بۆ هه‌رێما باشوورێ كوردستانێ دوپات كر و گۆت: «كوردستان هه‌ڤپه‌یمانا ستراتیجی یا ئه‌مه‌ریكایێ یه».
ل گۆر راگهاندنه‌كا ئۆفیسا سه‌رۆكاتییا حكوومه‌تا باشوورێ كوردستانێ، مه‌سروور بارزانی و مارك ئێسپه‌ر و شاندا ئه‌مه‌ریكایێ، ئیرۆ رۆژا شه‌می ل په‌راوێزا كۆربه‌ندا ئه‌وله‌هییا ناڤنه‌ته‌وه‌یی یا میونشنێ ل ولاتێ ئه‌لمانیایێ جڤیان.
گوهه‌رین و پێشهاتێن ئیراقێ و ناڤچه‌یێ هاتن گۆتوبێژ كرن، وه‌زیرێ پاراستنا نه‌ته‌وه‌یی یا ئه‌مه‌ریكایێ ئاماژه ب وێ چه‌ندێ كر كو هه‌رێما باشوورێ كوردستانێ هه‌ڤپه‌یمانه‌كا گرینگ یا ئه‌مه‌ریكایێ یه ل ناڤچه‌یێ.
هه‌ر وها ئێسپه‌ر دوپات كر كو مه‌شقا هێزێن پێشمه‌رگه ژ بۆ به‌رهنگاربوونا ته‌رۆرێ ل سه‌ر ده‌ستێ ئه‌مه‌ریكایێ دێ به‌رده‌وام بیت.
ل به‌رانبه‌ر ڤێ، مه‌سروور بارزانی سه‌رۆكێ حكوومه‌تا باشوورێ كوردستانێ رۆلا ئه‌مه‌ریكایێ سپاس كر و دوپات كر كو هه‌ڤپه‌یمانێتیا ئه‌مه‌ریكا و هه‌رێما كوردستانێ ژ بۆ پاراستنا ئه‌وله‌هییا هه‌رێمێ و ئیراقێ گه‌له‌ك گرینگه.
