سەرۆک مەسوود بارزانی ب ھەلکەفتا ٦٧ سالییا دامەزراندنا یەکیتیا قوتابیێن کوردستانێ و یەکیتیا لاوێن دەمۆکراتێن کوردستانێ پەیامەک بەلاڤ کر، ئەڤ ژی دەقا وێ پەیامێ یە:
ب ناڤێ خوەدایێ مەزن و دلۆڤان
ب ھەلکەفتا شێست و ھەفت سالیا دامەزراندنا یەکیتیا قوتابیێن(خوەندەکار) کوردستانێ و یەکیتیا لاوێن دەمۆکراتێن کوردستانێ، گەرمترین پیرۆزباھیان پێشکێشی لاوان و قوتابیێن خوەشدڤیێن کوردستانێ دکم و ھێڤیا سەرکەفتن و پاشارۆژەکە گەش ژ بۆ وان دخوازم.
لاوان و قوتابیان، ل دەستپێکا دامەزراندنا رێخستنێن خوە ڤە ھەتا نھا، رۆلەکە گرینگ و بەر ب چاڤ ل کارێ مەدەنی و رێخستنی دا دیتن و ژ بلی وێ یەکێ خوەندنگەھا پێگھاندنا سەرکردەیێن ب شیان و گەدەیێن ھشیار و ھەلکەتی بوونە، وەکی پێشمەرگە ژی بەشداریەکە ب باندۆر ل تەڤگەرا رزگاریخوازیا گەلێ مە دا کرنە و ل ڤێ رێیێ دا قوربانی و شەھیدان ژی گۆری کرنە.
قوتابیان و لاوان، ل قۆناخێن جوودا جوودا دە، خزمەتا گەل و وەلات کرنە و روھێ بەرگری و باوەری ب خوەبوونێ ل ناڤ لاوێن گەلێ مە دە پاراستنە. نھا و پاشارۆژێ ژی ئەڤ چاڤەرێیی ل خوەندەکار و لاوێن خوەشدڤی تێ کرن کو پارێزەرێ بھایێن بلندێ گەلێ خوە بن و ب مۆرالەکە بلند و چاڤ ڤەکریەکە زێدەتر، سوود ژ ئامرازێن نوویێن پەروەردە و فێرکرنێ وەربگرن و خوە ب زانست و زانیاریێ دەولەمەند بکن و کادیرێ ھشیار و ب شیان ژ بۆ خزمەتکرنا بەرژەوەندیێن خەلکێ کوردستانێ پەروەردە بکن.
دووبارە پیرۆزباھیێ ل وە دکم و ھێڤیا سەرکەفتنەکە زێدەتر ژ بۆ وە دخوازم.
مەسوود بارزانی
١٧.٠٢.٢٠٢٠
