حكوومه‌تا باشوورێ كوردستانێ، ئیرۆ بریار دا پێدانا ڤیزایێ ب ولاتیێن 5 ولاتان قه‌ده‌غه بكه‌ت، وه‌كه رێیه‌كێ ژ بۆ به‌رهنگاربوونا ڤایرۆسا كۆرۆنایێ كو ب ناڤێ كۆڤید 19 تێ ناسكرن.
ل گۆر فه‌رمانه‌كه وه‌زاره‌تا ناڤخوه یا حكوومه‌تا باشوورێ كوردستانێ، ئیرۆ رۆژا چارشه‌می 26/2/2020ێ هات راگهاندن كو پێدانا ڤیزایێ ب ولاتیێن هه‌ر یه‌ك ژ ولاتێن تایله‌ند، كۆریایا باشوور، ژاپۆن، ئیتالیا و سه‌نگاپۆرایێ ژ بۆ هاتنا ناڤا هه‌رێما باشوور هاتنه قه‌ده‌غه كرن.
هه‌موه‌خت، وه‌زاره‌تا ناڤخوه بریار دا كو ئه‌ڤ ولاتیێن ئیراقێ ژی كو سه‌ردانا وان ولاتان كرنه، ئێدێ رێ پێ نه‌هێته دایین بهێنه ناڤا هه‌رێما باشوورێ كوردستانێ.
وه‌زاره‌تا كارێن ناڤخوه یا باشوورێ كوردستانێ راگهاند، وه‌لاتیێن باشوورێ كوردستانێ ژی كو سه‌ره‌دانا وان ولاتان كرنه، ل ده‌ما ڤه‌گه‌رینا وان، ل گۆر رێنمایێن ساخله‌میێ دێ سه‌ره‌ده‌ری ل گه‌ل هێته كرن.
ڤایرۆسا كۆرۆنایێ به‌ری دو رۆژان گه‌هشته ئیراقێ و یه‌كه‌م حاله‌ت ل باژارێ نه‌جه‌فێ هات تۆماركرن، پشتره دوهـ رۆژا سێشه‌می 4 حاله‌ت ل كه‌ركووكێ هاتن راگهاندن.
