بارزانی په‌یامه‌كا گرنگ راگه‌هاند

باره‌گه‌ها بارزانی ئیرۆ ل ده‌ربارا به‌شدارییا ئالیێن كورد د كابینه‌یا حكوومه‌تا فه‌ده‌رال دا راگهاند، كاندیدێ راسپاردی ژ بۆ ئاڤاكرنا حكوومه‌تێ، تایبه‌تمه‌ندییا باشوورێ كوردستانێ ل به‌ر چاڤ نه‌گرتیه‌.

باره‌گه‌ها مه‌سعوود بارزانی سه‌رۆكێ پارتییا ده‌مۆكرات یا كوردستانێ و رێبه‌رێ ملله‌تێ كورد ئیرۆ رۆژا چارشه‌می 26/2/2020ێ راگهاندنه‌ك ل ده‌ربارا پێكئینانا كابینه‌یا نوو یا حكوومه‌تا فه‌ده‌رال به‌لاڤ كر و تێده‌ هاتییه‌: «سه‌رۆك بارزانی تێبینی ل سه‌ر ئاوا و به‌رنامه‌یا كارێ محه‌مه‌د عه‌لاوی و مه‌كانیزما دیار كرنا كاندیدێن وه‌زاره‌تان ژ بۆ حكوومه‌تا نوو هه‌نه‌، ئه‌ڤ شێواز داخوازیێن پێكهاته‌یان و تایبه‌تمه‌ندییا باشوورێ كوردستانێ ل به‌ر چاڤ نه‌گرتنه»‌.

ته‌كستا راگهاندنا باره‌گه‌ها بارزانی

پاش راسپاردنا به‌رێز محه‌مه‌د عه‌لاوی ژ بۆ پێكئینانا حكوومه‌تا نوو یا ئیراقێ، ل هه‌ژماره‌كه‌ مه‌دیا ئه‌ره‌بی و كوردی وها هات به‌لاڤ كرن كو جه‌نابێ سه‌رۆكێ بارزانی ژ به‌ر كێشه‌یێن كه‌سۆكی و دانانا هنه‌ك كه‌سێن نێزی خوه‌ ژ بۆ وه‌رگرتنا پۆستێن وه‌زاره‌تان، كێشه‌ ل گه‌ل به‌رێز عه‌لاوی ل سه‌ر پرسا پێكئینانا حكوومه‌تا نوو هه‌نه‌.

ل ڤێره‌ ب گشت ئالییان رادگه‌هینین كو ئه‌ڤ بابه‌ت چ بنه‌ما ژ بۆ نینه‌ و سه‌رۆك بارزانی تێبینی ل سه‌ر شێواز و به‌رنامه‌یا كارێ عه‌لاوی و مه‌كانیزما دیار كرنا كاندیدان ژ بۆ پۆستێن وه‌زاره‌تان هه‌یه‌، ئه‌و شێواز و مه‌كانیزم ماف و داخوازیێن پێكهاته‌یان و تایبه‌تمه‌ندییا باشوورێ كوردستانێ ل به‌ر چاڤ نه‌گرتنه‌ و ب دلنیایی ڤه‌ دێ بیته‌ ئه‌گه‌را كووركرنا قه‌یرانا سیاسی ل ئیراقێ.

ژ بۆ سه‌رۆك بارزانی ناڤێ كه‌سان ئه‌وله‌ویه‌ت نینه‌، به‌لكو پابه‌ندبوونا هه‌موو ئالیه‌كی ب بنه‌مایێن شه‌راكه‌ت و هه‌ڤسه‌نگی و ته‌وافقێ د پرۆسه‌یا سیاسی و حكوومه‌تێ دا گرینگه‌، دڤێت حكوومه‌تێ ئه‌ڤێ یه‌كێ ل به‌ر چاڤ بگریت، ل گه‌ل ڤێ یه‌كێ ژی هه‌ر وه‌ك چاوا هنه‌ك ئالییان به‌رێز عه‌لاوی ژ بۆ پۆستێ سه‌رۆك وه‌زیران كاندید كریه‌، هه‌رێما باشوورێ كوردستانێ ژی مافێ وێ یه‌ كاندید ژ بۆ پۆستێن وه‌زاری هه‌بیت و پێویسته‌ رێز ل وی مافێ هه‌رێما كوردستانێ بهێته‌ گرتن.

باره‌گه‌ها بارزانی

26/2/2020