كۆرۆنایێ مه‌شقا پێشمه‌رگه‌ی راگرت

ژ بۆ به‌رهنگاربوونا ڤایرۆسا كۆرۆنایێ و زێده‌تر خوه‌پاراستنێ ژ به‌لاڤنه‌بوونا وێ، مه‌شقا هێزێن پێشمه‌رگه‌ یێن باشوورێ كوردستانێ ژ بۆ ده‌مه‌كی هات راگرتن.

پێگه‌ها فه‌رمی یا وه‌زاره‌تا پێشمه‌رگه‌ ئیرۆ رۆژا پێنجشه‌می 27/2/2020ێ راگهاند كو بریار هاتییه‌ دان مه‌شقا هێزێن پێشمه‌رگه‌یی ژ بۆ ده‌مه‌كی بهێته‌ راگرتن، وه‌كه‌ رێیه‌كێ ژ بۆ به‌رهنگاربوونا ڤایرۆسا كۆرۆنایێ و زێده‌تر خوه‌پاراستنێ ژ به‌لاڤنه‌بوونێ.

لیوا قاره‌مان كه‌مال، سه‌رۆك ئه‌ركان ژ بۆ ئه‌ركێن مه‌شق و ئۆپه‌راسیۆنان راگهاند، ب لبه‌رچاڤ گرتنا وێ ره‌وشا نه‌ئاسایی یا ساخله‌میێ كو ل ولاتێن ده‌ردوور هه‌یه‌، وه‌زاره‌تا پێشمه‌رگه‌ ب پێویست زانی رێكارێن رێگریكرنێ ل به‌لاڤبوونا ڤایرۆسا كۆرۆنایێ بگریته‌ به‌ر.

هه‌روه‌ها ده‌ست نیشان كر، ژ بۆ ڤێ مه‌به‌ستێ ژی پرۆسه‌یا مه‌شقا هێزێن پێشمه‌رگه‌ی ل سه‌نته‌رێ مه‌شقا هه‌ڤپه‌یمانێتییا ناڤده‌وله‌تی ل هه‌رێما باشوورێ كورستانێ ب ته‌مامه‌تی هات راگرتن، هه‌روه‌ها مه‌شقا هێزێن پێشمه‌رگه‌ی ل ته‌ڤاهییا بنگه‌هـ و فێرگه‌هێن مه‌شقێ یێ گرێدای وه‌زاره‌تێ ژ بۆ ده‌ما یه‌ك حه‌فتی و ل ده‌ما پێویست و ل گۆر ره‌وشێ بریارێن نوو دێ هێن وه‌رگرتن.

وه‌زاره‌تا پێشمه‌رگه‌ رادگهینیت، ئه‌ڤ بریار ژ بۆ پاراستنا سه‌لامه‌تییا پێشمه‌رگه‌ی و رێگریكرنێ یه‌ ل به‌لاڤبوونا ڤایرۆسا كۆرۆنایێ هاتنه‌ وه‌رگرتن.