كۆرۆنا گه‌هشته‌ هه‌رێما كوردستانێ

وه‌زاره‌تا ساخله‌مییا هه‌رێما كوردستانێ ئه‌ڤرۆ راگه‌هاند، 4 حاله‌تێن تووشبوونێ ب ڤایرۆسا كۆرۆنایێ ل هه‌رێما كوردستانێ هاتنه‌ تۆمار كرن.

وه‌زاره‌تا ساخله‌مییا هه‌رێما كوردستانێ د به‌یانه‌كا فه‌رمی دا راگه‌هاند، 4 حاله‌تێن تووشبوونێ ب ڤایرۆسا كۆرۆنایێ ئه‌ڤرۆ رۆژا ئێكشه‌مبێ ل باژارێ سلێمانیێ هاتینه‌ تۆمار كرن كو ژنه‌كه‌ و 3 زه‌لامن و ژ كۆمارا ئیسلامییا ئیرانێ ڤه‌گه‌ریایینه‌.

ئه‌ڤه‌ ژی ده‌قێ به‌یانا فه‌رمی یا وه‌زاره‌تا ساخله‌مییا هه‌رێما كوردستانێ یه‌

د به‌رده‌وامییا رێكارێن خوه‌پاراستنێ ژ نه‌خوه‌شییا ڤایرۆسا كۆرۆنا یا نوو (كۆڤید 19) ل هه‌رێما كوردستانێ، ب سه‌ده‌ما هه‌بوونا هه‌ژماره‌كا زۆر یا تووشبووویان ل جیهانێ و وه‌لاتێن ده‌ردوور و ڤه‌گه‌رینا هه‌ژماره‌كا زۆر یا وه‌لاتیێن گه‌شتیار ژ وان وه‌لاتان، تیمێن ساخله‌میێ و داموده‌زگه‌هێن په‌یوه‌ندیدار به‌رده‌وامن ل رێكارێن پێدڤی ژ بۆ خۆپارێزی و ڤه‌دیتنا گۆمانلێكرییان و ئاماده‌كاریێن كۆنترۆل كرنا ڤێ ڤایرۆسێ ل هه‌رێما كوردستانێ.

ئه‌م وه‌لاتیێن خۆشتڤی هایدار دكه‌ین كو ئه‌ڤرۆ رۆژا ئێكشه‌مبێ 1/3/2020ێ و د ده‌ما 24 ده‌مژمێرێن بۆری دا كو پشكنین بۆ 24 گۆمان لێ كریان هاتییه‌ ئه‌نجام دان كو د ناڤا وان دا 4 وه‌لاتی یێن باژارێ سلێمانیێ نه‌، ده‌رئه‌نجاما پشكنینا وان ده‌رچوو كو هه‌لگرێن ڤایرۆسێ كۆرۆنا یا نوو (كۆڤید 19) نه‌، ئه‌و ژی پێكهاتبوون ژ خێزانه‌كا 3 كه‌سی و ژنه‌كێ كو هه‌ر هه‌موویان پێش نها سه‌ره‌دانا وه‌لاتێ ئیرانێ كربوو و پشتی ڤه‌گه‌رینا وان كو ل بن چاڤدێریێ بوون پشكنین ژ بۆ هاتبوون ئه‌نجامدان و د ده‌ما نها دا ئه‌و ل نه‌خۆشخانێ هاتینه‌ جودا كرن و هاتینه‌ دانان د نه‌خۆشخانه‌یا تایبه‌ت دا ب ڤایرۆسێ كۆرۆنایێ ل سلێمانیێ و بارێ وان یێ ساخله‌میێ جێگیره‌.

وه‌زاره‌تا ساخله‌میێ ته‌كه‌ز دكه‌ت كو پێدڤییه‌ هه‌موو ئالییه‌ك پابه‌ندی بریارێن حكوومه‌تا هه‌رێما كوردستانێ و وه‌زاره‌تا ناڤخوه‌ و رێنمایێن وه‌زاره‌تا ساخله‌میێ ببیت و پالپشتییا تیمێن ساخله‌میێ بن ژ بۆ ڤه‌دیتنا هه‌ر گۆمان لێ كرییه‌كی یان گه‌شتیاره‌كێ دوور ژ چاڤێن ساخله‌میێ.

وه‌لاتییان پشت راست دكه‌ین كو دێ به‌رده‌وام بین بۆ كارێ پێدڤی ژ بۆ رێكارێن خۆپارێزیێ و ڤه‌دیتنا گۆمان لێ كرییان و رێگریكرنێ ل به‌لاڤبوون و دووڤچوونا چاره‌سه‌رییان.