حكوومه‌تێ بریارێن دارایی یێن گرنگ دان

سه‌رۆكوه‌زیرێ هه‌رێما باشوورێ كوردستانێ ئه‌ڤرۆ سه‌رپه‌رشتییا كۆمبوونا لژنه‌یا بلند یا به‌رهنگاربوونا ڤایرۆسا كۆرۆنایێ كر و هه‌ژماره‌كا بریارێن گرنگ دان.

مه‌سروور بارزانی د كۆمبوونێ گۆت: ڤایرۆسا كۆرۆنایێ نه‌ ته‌نێ كێشه‌یه‌كا ساخله‌میێ یه‌، به‌لكو كێشه‌یه‌كه‌ زیانێن وێ دێ ل سه‌ر ئابوورا جیهانێ هه‌بن، هه‌روه‌ها ئابوورا ئیراقێ و هه‌رێما كوردستانێ، ب تایبه‌ت پاش داكه‌تنا بهایێ په‌ترۆلێ د بازارێن جیهانێ دا.

د كۆمبوونێ دا، مه‌سروور بارزانی ئه‌ڤ خاله‌ دوپات كرن:

  • داخواز ئالیێن به‌شدار د حكوومه‌تێ دا، ئالیێن سیاسی و وه‌لاتییان كر، ب به‌رپرسیارانه‌ سه‌ره‌ده‌ریێ دگه‌ل ڤێ ره‌وشێ و قه‌یرانێ بكه‌ن، بۆ وێ چه‌ندێ ب كێمترین زیان بهێته‌ ده‌رباز كرن.

  • جێبه‌جێكرنا قانوونا چاكسازیێ دێ به‌رده‌وام بیت.

  • رێكارێن تایبه‌ت ژ بۆ كێمكرنا خه‌رجیێن نه‌پێدڤی یێن وه‌زاره‌ت و فه‌رمانگه‌هێن حكوومه‌تێ.

سه‌رۆكێ وه‌زیران دوپات كر كو هه‌ماهه‌نگییا حكوومه‌تا هه‌رێما باشوورێ كوردستانێ ل گه‌ل حكوومه‌تا فیدرال دێ به‌رده‌وام بیت ژ بۆ كو ئه‌ڤ ره‌وشا داراییا خرابا ب سه‌ر ئیراقێ و هه‌رێما كوردستانێ دا هاتی ب ئه‌گه‌را داكه‌تنا بهایێ په‌ترۆلێ، بهێته‌ ده‌رباز كرن.