بەرپرسەکێ ئێكه‌تیێ 3 کەسان دکوژیت و دره‌ڤیت

بەرپرسەکێ ئێكه‌تیێ 3 کەسان دکوژیت و دره‌ڤیت

به‌رپرسه‌كێ یه‌كێتییا نشتیمانییا كوردستانێ 3 كه‌سان ل سه‌ر پرسه‌كێ دكوژیت و پاش بوویه‌را كوشتنێ د ره‌ڤیته‌ باژارێ كه‌ركووكێ و خوه‌ ل جه‌م پارێزگه‌رێ سه‌پاندیێ وی باژاری راكان جبووری خۆ ئاسێ دكه‌ت.

ل رۆژا سێشەمبا بووری 3/3/2020ێ 4 کەس ژ ئالیێ پۆلیسێن باژارێ رانیێ ڤه‌ ب مەرەما دادگەهکرنا وان هاتن رەوانەکرن ژ بۆ دادگەها ناڤچەیا حاجیاوا، لێ بەلێ سێ کەس ژ وان ژ ئالیێ بەرپرسەکێ یه‌كێتییا نیشتیمانی ڤە دهێنه‌ کوشتن.

ل گۆر چاڤکانیێن تایبەت یێن پێگەها دارکا مازی ل باشوورێ کوردستانێ، دەستپێکا ڤێ بوویەرێ بۆ روودانه‌كا ترافیکی ڤه‌دگه‌ریت ده‌مێ زارۆیەک ب ئه‌گه‌رێ لێدانا ترومبێلێ هاتییه‌ کوشتن، پاش خودانێ ترومبێلێ دگەل 3 کەسێن دی ل سەر ڤێ بابەتێ ژ ئالیێ پۆلیسێن باژارێ رانیێ ڤه‌ هاتبوون دەستەسەر کرن و ل دەما برنا ڤان کەسان بۆ دادگەهکرنێ، بەرپرسەکێ یەنەکێ ب ناڤێ «سەمەد بێتواتەیی» کو بەرپرسەکێ سەربازی یێ یەنەکێ یە دهێن گۆللـەبارانکرن و دەملدەست سێ کەس ژ وان جانێ خوە ژ دەست ده‌دن.

سەمەد بێتواتەیی دگەل 3 کەسێن دی کو پێشمەرگەیێن یەنەکێ نە، پشتی ڤێ بوویەرێ دچنه‌ چیایێ «ماکۆک» و یاخیبوونا خۆ ژ یەنەکێ رادگه‌هینن و دبێژن ئێدی ئەم ناڤەگەرین، لێ رایەدارێن یەنەکێ دەست ب بزاڤێن خۆ ژ بۆ رازیکرنا ڤی رایەدارێ خۆ دکه‌ن و وان رازی دکه‌ن کو ڤەگەرن، لێ ڤەگەریانا وان نە ژ بۆ وێ یەکێ کو ل سەر تاوانا ئەنجامدای بهێن دادگەهکرن، بەلکو ژ بۆ وێ یەکێ کو ڤێ بوویەرێ پەردەپووش بکه‌ن.

چاڤکانیێن تایبەت یێن پێگەها «دارکا مازی» ئاشکرا دکه‌ن کو ئەڤه‌ بۆ دەمێ 3 رۆژانە سەمەد بێتواتەیی دگەل هەرسێ پێشمەرگەیێن وی ب رێیا یەنەکێ هاتینە هنارتن ژ بۆ کەرکووکێ و نها ئەڤ بەرپرسە دگەل هەرسێ پێشمەرگەیێن دی ل جەم «راکان جبۆری» پارێزگه‌رێ سه‌پاندی یێ کەرکووکێ نە ونها ئه‌و وان د پارێزیت.

ئەڤ بوویەر بوویە ئه‌گه‌را پەیدابوونا ترسەکا هەره‌ زێدە ل جەم گەلێ باشوور ژ بەرکو بوویەرێن ب ڤی ئاوایی جارا یەکەمینن روو دده‌ن، تشتێ هەره‌ بالکێش ئەڤەیه‌ کو هه‌تا نها ل باشوورێ کوردستانێ چ دەزگەهەکێ مەدیایی باس ل ڤێ جینایەتێ نەکریە، هەروەها چ رێکخراوەکا جڤاکا سڤیل ژی نەرازیبوونا خۆ ل همبەر ڤێ تاوانێ دەرنەبرییە و هەر کەس د بێدەنگیێ دانە.