مه‌سروور بارزانی هنده‌ك بریارێن گرنگ ده‌ركرن

سه‌رۆكێ حكوومه‌تا باشوورێ كورستانێ، ئیرۆ سه‌رپه‌رشتییا جڤینه‌كا تایبه‌ت ب هه‌لسه‌نگاندن و جێبه‌جێكرنا رێكارێن رووبرووبوونا ڤایرۆسا كۆرۆنایێ كر، پلانێن حكوومه‌تێ ژ بۆ دابینكرنا پێدڤیێن سه‌ره‌كی یێن خه‌لكی ژ خوارن، ده‌رمان و سۆته‌مه‌نیێ و هه‌روه‌ها ره‌وشا ئابوورییا هه‌رێما كوردستانێ دانوستاندن ل سه‌ر كرن.

كۆمبوونا ئیرۆ یا ئه‌نجوومه‌نا وه‌زیران ژ بۆ پابه‌ندبوونی ب رێنمایێن ته‌ندروستیێ، ب ئاوایی ڤیدیۆ كۆنفرانس هاته‌ ساز كرن و ل ده‌ستپێكێ مه‌سروور بارزانی سه‌رۆكێ وه‌زیران سوپاسییا خوراگرییا خه‌لكێ كوردستانێ كر و داخواز كر كو ژ بۆ پاراستنا ژیان و سلامه‌تیێ، د هاریكار بن و پابه‌ندیێ ب رێنمایان بكه‌ن.

مه‌سروور بارزانی هه‌روه‌ها سوپاسییا ته‌ڤ وه‌زاره‌ت، هێزێن ئاساییش و پۆلیس و پێشمه‌رگه‌یان كر، هه‌روه‌ها پزیشك و كارمه‌ندێن ته‌ندروستیێ د بابه‌تا رووبرووبوونا كۆرۆنایێ دا، هه‌روه‌ها سوپاسییا وان خودان مولك و سه‌رمایه‌داران كر كو ل دووڤ بانگه‌وازییا وی هاتینه‌ و ئاسانكار پشكێش كرین.

د كۆمبوونێ دا هه‌ژماره‌كا بریاران هاتنه‌ دان ژ وان هه‌وا كۆمكرنا هاریكاریێن دارایی كو هه‌وه‌كا نشتیمانی بیت و داهاتیێ وێ ب ئاوایه‌كێ دادپه‌روه‌رانه‌ ل سه‌ر پارێزگه‌هـ و قه‌زایێن كوردستانێ ل پێناڤێ به‌رهنگاربوونا كۆرۆنایێ بێ خه‌رج كرن.

مه‌سروور بارزانی هه‌ر ل ڤێ ده‌ربارێ دا داخواز ژ جڤاكا ناڤده‌وله‌تی و حكوومه‌تا فه‌ده‌رال كر كو هه‌ڤكارییا هه‌رێما كوردستانێ بكه‌ن.

ل ده‌ربارا مووچه‌یان، سه‌رۆكوه‌زیرێ هه‌رێما كوردستانێ داخواز ژ وه‌زاره‌تێن پێشمه‌رگه‌ و دارایی كر كو رێیه‌كا گونجای ژ بۆ دابه‌شكرنا مووچه‌یان ببینن ب وی مه‌رجی كو پابه‌ندییا ته‌مام ب رێنمایێن ته‌ندورستیێ بێ كرن.

مه‌سروور بارزانی ل ده‌ربارا داكه‌تنا بهایێ په‌ترۆلێ و رێخستنا داهات و خه‌رجیێ كه‌رتا په‌ترۆلێ و زیانێن داكه‌تنا بهایا ل سه‌ر ئابووریا هه‌رێما كوردستانێ، بریار دا ل وه‌خته‌كێ نێزیك ئه‌نجوومه‌نا بلند یا نه‌فت و غازێ كۆمبوونه‌كێ گرێده‌ت.