حكوومه‌تا باشوورێ كوردستانێ زه‌نگا خه‌ته‌رێ لێدا

وەزیرێ ساخله‌میێ زەنگا خەتەرێ لێدا

هه‌ر هه‌ڤدیتنه‌ك ره‌نگه‌ ببیته‌ سه‌ده‌ما تووشبوونێ 

وەزیرێ ساخله‌مییا هەرێما کوردستانێ د. سامان بەرزنجی، پەیامەک بەلاڤ کر و تیدا راگه‌هاند، کۆرۆنا گه‌هشتییە ناڤا کۆلان و تاخان و نها گه‌هشتینە قۆناغەکا خەتەر و ڤایرۆس ب لەزگینی بەلاڤ دبیت، هەروەها داخواز دکەت گەلێ باشوور باشتر خوە بپارێزیت.  

د پەیاما خوە دا، د. سامان بەرزنجی، وەزیرێ ساخله‌مییا هەرێما کوردستانێ دوپاتی ل سەر ڤێ یەکێ کر کو نها ڤایرۆسا کۆرۆنایێ د ناڤا جڤاکی دا هەیە و هەموو هەڤدیتنەک دبیت ببیته‌ سەدەما پتر بەلاڤبوونا ڤایرۆسا کۆرۆنایێ، ژ بەر ڤێ یەکێ پێویستە باشتر خوە بپارێزن.

ئەڤ پەیاما وەزیرێ ساخله‌مییا هەرێما کوردستانێ پشتی وێ یەکێ هات کو ب هه‌لکەفتا جەژنا نەورۆزێ و سه‌رسالا كوردی، بەشەک ژ وه‌لاتیێن باشوورێ کوردستانێ سەرەرای قەدەغەیا چوون و هاتنێ، لێ بەلێ دیسا ژ مالێن خوە دەرکەتینە و پابەندی رێنمایێن وەزارەتا ساخله‌میێ نابن، وەزیرێ ساخله‌میێ داخواز دکەت خه‌لك پابەندی رێنماییان ببیت و ژ مالا خوە دەرنەکەڤن ژبەرکو نێزیكبوون ژ هەڤدو كاره‌كێ پڕ خەتەرە.

ل گۆرەی ئاخفتنا د. سامان بەرزنجی، نها ڤایرۆس بوویە تشتەکێ ناڤخۆ و هەموو کەسەک بەرهەڤە تووشی ڤێ ڤایرۆسێ ببیت، ژبەرکو ئەڤ ڤایرۆس نها ب تنێ د ناڤا رێڤینگان دا نینە، بەلکو د ناڤا هەرێمێ ب خۆ دا هەیە.

هه‌روه‌ها دبێژیت: «هێڤی دکه‌ین، هێڤی دکین ڤێ رەوشێ بپارێزن به‌ری كو ژ ده‌ست مه‌ ده‌ربكه‌ڤیت».

ل هەرێما کوردستانێ 47 کەس ب ڤایرۆسا کۆرۆنایێ کەتینە، 13 کەس ژ وان چارەسەر بووینە و کەسەکی ژی جانێ خوە ژ دەست دایە.