باشوورێ كوردستانێ رێڤه‌به‌رێ ئاساییشا ئیبراهیم خه‌لیل لادا
حكوومه‌تا هه‌رێما باشوورێ كوردستانێ، ئه‌ڤرۆ و هه‌ر وه‌ك وه‌زیرێ ناڤخۆ یێ حكوومه‌تێ دوهی ب ناڤێ سه‌رۆكێ وه‌زیران سۆز دایه خه‌لكێ باژارێ دهۆكێ كو هه‌گه‌ر هه‌لگرێ ڤایرۆسێ كۆرۆنایێ ل دهۆكێ كو به‌رپرسه‌كێ ئێمناهیێ یه، خه‌مساری كربیت دێ هێته سزادان، ئه‌ڤرۆ نڤیسارا ژ كار لادانا وی هاته راگه‌هاندن.
رێڤه‌به‌رییا گشتی یا ئاساییشا هه‌رێما باشوورێ كوردستانێ، ئه‌ڤرۆ رۆژا شه‌مبی 21/3/2020ێ د نڤیساره‌كێ دا ده‌ست نیشان كر، كو «عه‌مید عه‌بدولوه‌هاب محه‌مه‌د عیسا» رێڤه‌به‌رێ ده‌روازه‌یا ئیبراهیم خه‌لیل ب مۆله‌تا فه‌رمی سه‌ره‌دانا وه‌لاتێ ئه‌لمانیایێ كربوو و ل رۆژا 14/3/2020ێ ڤه‌گه‌رییه و ل ده‌ما ڤه‌گه‌رینێ، ل باله‌فرخانه‌یا هه‌ولێرێ پابه‌ندی رێنمایێن حكوومه‌تێ یێن كه‌رنتینكرنێ نه‌بوویه.
رێڤه‌به‌رییا گشتی یا ئاساییشا هه‌رێما باشوور ده‌ست نیشان كرییه، وه‌كه هه‌نگاڤا ئێكێ وان له‌كۆلین كر و بریار دا ناڤبووری ژ وی پۆستی بهێته لادان و وه‌لاتی دلنیا كرینه كو چ كه‌سه‌ك د سه‌ر یاسایێ دا نینه.
«عه‌مید عه‌بدولوه‌هاب» به‌ری دو رۆژان ئه‌شكه‌ره بوو كو هه‌لگرێ ڤایرۆسێ كۆرۆنایێ یه، كه‌یسا وی ل تۆرێن جڤاكی ده‌نگڤه‌دا كو ناڤبری پێ ل رێنمایێن حكوومه‌تێ كرییه و خه‌لكه‌كێ زۆر داخوازا روهنكرنه‌كێ ژ حكوومه‌تێ كرن.
دوهی رۆژا ئه‌ینیێ و ل سه‌ر فه‌رمانا مه‌سروور بارزانی سه‌رۆك وه‌زیرێن حكوومه‌تا باشوورێ كوردستانێ، رێبه‌ر ئه‌حمه‌د وه‌زیرێ ناڤخۆ سه‌ره‌دانا باژارێن دهۆك و زاخۆ كر و د كۆنگره‌یه‌كێ رۆژنامه‌ڤانی دا سۆز دابوو كو ئه‌و دێ لێكۆلینێ ل سه‌ر ڤێ كه‌یسێ كه‌ن و ل گۆر یاسایێ هه‌ر كه‌سێ خه‌مساری كربیت دێ هێته سزادان.
عه‌مید عه‌بدولوه‌هاب ژ به‌را كو ژ بۆ وی ته‌سبیت ببیت كو ڤایرۆسا كۆرۆنایێ ل جه‌م هه‌یه، وی ب خوه په‌یوه‌ندی ب ساخله‌مییا پارێزگه‌ها دهۆكێ كرییه، ساخله‌میێ ژی ژ بۆ گارانتییا سلامه‌تییا وه‌لاتییان، هه‌موو كه‌سێن ده‌ردوورا وی و ژ ئه‌وێن ژ ده‌ما ڤه‌گه‌رینی وی په‌یوه‌ندی پێ كری، پشكنین بۆ كرن، لێ به‌لێ هه‌تا نها چ كه‌یس پۆزه‌تیڤ ده‌رنه‌كه‌تینه.
