د كریزا قه‌ده‌غه‌یا ده‌ركه‌تنێ و به‌لاڤبوونا ڤایرۆسێ كۆرۆنایێ ده، ئیرۆ باله‌فرێن جه‌نگ یێن ده‌وله‌تا داگیركار یا تركیێ لڤینێن پارتییا كاركه‌رێن كوردستانێ په‌كه‌كێ، ل ناڤچه‌یێن به‌رواری بالا و نێروە و رێكان بۆرۆدمان كرن، خه‌لكێ وان ناڤچه‌یان ژی ژ نێزیكبوونا په‌كه‌كێ بۆ گۆندێن خوه دلگرانن.
چاڤكانیێن پێگه‌ها «داركا مازی» ل باشوورێ كوردستانێ دیار كرن، ئیرۆ رۆژا دوشه‌مبێ 23/3/2020ێ باله‌فرێن جه‌نگ یێن ده‌وله‌تا تركیێ بۆ چه‌ندین جارێن جودا، لڤینێن گه‌ریلایێن پارتییا كاركه‌رێن كوردستانێ په‌كه‌كێ، ل سینۆرێ پارێزگه‌ها دهۆكێ بۆرۆمان كرن، لێ به‌لێ هه‌یا نها نه‌هاتیە زانین چەند زیان ب په‌كه‌كێ گهیشتینە.
هه‌روه‌ها ده‌ست نیشان كر، بۆرۆدمانێ ل ده‌مژمێر 9:30 سپێدێ ل گه‌لیێ دێرا ل سنۆرێ گوندێ بێشیلێ ل ناڤچه‌یا به‌رواری بالا، ده‌ست پێ كر و پاش ژ ده‌مژمێر 10:00 هه‌تا 10:20 خوله‌ك بۆرۆدمان ل 5 گوند و ناڤچه‌یان هات كرن، ژ وان ناڤچه‌یا نهشکێ ناڤبه‌را گوندێن سیته و بێسه‌پێ دا ل ناڤچه‌یا رێكان، سه‌رێ چیایێ مام ره‌شا ل هنداڤی گوندێ سیته ل هه‌مان ناڤچه‌یێ، هه‌روه‌ها گوندێ سیته ب خوه.
چاڤكانیێن «داركا مازی» ل باشوورێ كوردستانێ هه‌روه‌ها ئاماژه كرن، چیایێ ئه‌لهێ یێ هنداڤی گوندێ ئه‌لهێ ل ناڤچه‌یا نێروه كه‌ت به‌ر بۆردۆمانا باله‌فرێن تركیێ هه‌روه‌ها گه‌لیێ ره‌شاڤه ل دڤه‌را نهێلێ.
ل ده‌مژمێر 11:30 سپێدێ ژی باله‌فرێن ده‌وله‌تا تركیێ مۆشكه‌كه ئاڤێته شكه‌فتا گه‌لیێ گوندێ سه‌رگه‌لا كه‌ڤن كر.
هه‌ر چه‌ند كو هه‌رێما باشوورێ كوردستانێ ل ڤان رۆژا د قه‌ده‌غه‌یا ده‌ركه‌تنێ دا ده‌رباس دبیت كو ب سه‌ده‌ما به‌لاڤبوونا ڤایرۆسا كۆرۆنایێ یه، لێ به‌لێ ئێریشێن باله‌فرێن تركیێ ل سه‌ر گوند و ناڤچه‌یێن باشوور نه‌هاتنه راوه‌ستاندن، خه‌لكێ ناڤچه‌یێن كه‌تین به‌ر بۆردۆمانێ ژ نێزیكبوونا گه‌ریلایێن په‌كه‌كێ بۆ ناڤ گوند و ئاقارێن خوه نه‌رازینه و داخواز دكه‌ن كو ژ بۆ كو گوند و مه‌ر و مالاتێ وان ژ ده‌ست درێژیێن تركیێ پاراستی بن، باشتره گه‌ریلا خوه نێزی سینۆرێ گوندێن وان نه‌كه‌ن.
په‌كه‌كێ ژ هاڤینا ئیسالی لڤینێن خوه ب ئاوایه‌كی دكه‌ت كو ب مه‌به‌ست خوه نێزی گوندێن باشوورێ كوردستانێ دكه‌ت، ژ بۆ كو باله‌فرێن تركیێ وان گوندان بۆردۆمان بكه‌ت، هه‌وره‌ها چه‌ندین جاران خوه نێز وان ناڤچه‌یێن كو پالاوگه‌هێن په‌ترۆلێ لێ نه و كه‌تبوون به‌ر بۆردۆمانێ.
