مه‌سروور بارزانی: «ئه‌و ل خه‌تا پێشیێ نه ژ بۆ كو هوون ب سلامه‌ت بن»
سه‌رۆك وه‌زیرێ حكوومه‌تا باشوورێ كوردستانێ ئیرۆ په‌یامه‌ك به‌لاڤكر و تێدا داخواز ژ گه‌لێ باشوورێ كوردستانێ كر، پابه‌ندی رێنمایان و قه‌ده‌غه‌یا ده‌ركه‌تنێ ببن ژ بۆ كو ژیانا هه‌وه و عه‌زیزێن هه‌وه و هه‌موو كوردستانییان پاراستی بیت.
ئه‌ڤ ژی ته‌كستا په‌یاما مه‌سروور بارزانی یه:
ب ناڤێ خودێ مه‌زن و دلۆڤان
كوردستانیێن خوه‌شتڤی
داخوازێ ژ هه‌وه دكه‌م كو خه‌ته‌را ڤایرۆسێ كۆرۆنایێ گه‌له‌ك ب جددی وه‌ربگرن، ژ بۆ كو ژیانا هه‌وه و عه‌زیزێن هه‌وه و هه‌موو خه‌لكێ كوردستانێ ب سلامه‌ت بیت، داخوازێ ژ هه‌وه دكه‌م پابه‌ندی رێنمایێن وه‌زاره‌تا ته‌ندروستیێ و وه‌زاره‌تا ناڤخۆ ببن، ئه‌ڤ به‌رێزه ژ پزیشك، فه‌رمانبه‌ر و پۆلیس و ئاساییشێ ل خه‌تا پێشیێ خزمه‌تێ دكه‌ن داكو هوو ب سلامه‌ت بن، داخوازێ ژ هه‌وه دكه‌م هوون ژی هه‌ڤكارێن وان بن.
حكوومه‌تا هه‌رێمێ چه‌ندین ته‌دبیر ل خالێن سینۆری و ل ناڤا كوردستانێ ژی گرتینه به‌ر ژبۆ كو هوون زێده‌تر د پاراستی بن، قه‌ده‌غه‌یا ده‌ركه‌تنێ هه‌تا 1/4/2020ێ هاتییه درێژ كرن، داخوازێ ژ هه‌وه دكه‌م ل مالێن خوه بمینن و په‌یوه‌ندیێن خوه سینۆر دار بكه‌ن.
هێڤی ژ هه‌وه دكه‌م سه‌رپێچییا رێنمایان نه‌كه‌ن، چونكه نه‌ته‌نێ دێ ژیانا هه‌وه به‌لكو دێ ژیانا هه‌موو عه‌زیزێن خوه و كوردستانییان ئێخنه د خه‌ته‌رێ دا، هێڤیدارم پێكڤه بكارین ل به‌ر سینگا ڤێ نه‌خوه‌شیێ ب راوه‌ستین و نه‌هێلین به‌لاڤ ببیت، هه‌ڤكارییا هه‌وه و پشته‌ڤانییا هه‌وه دێ بیته ئه‌گه‌ر كو رێ ل به‌لاڤبوونا ڤێ نه‌خوه‌شیێ بهێته گرتن.
ب پشته‌ڤانییا خودێ و مه هه‌موویان پێكڤه دێ كارین روو ب رووی ڤێ نه‌خوه‌شیێ ببین، هێڤیدارم هوون هه‌موو ب سلامه‌ت بن و كوردستان ژی ب سلامه‌ت بیت.
