بالەفرێن ترکیێ دەڤەرا بەرواری بالا بۆردۆمان کر

بالەفرێن جەنگی یێن دەولەتا داگیرکار یا ترکیێ ئیشەڤ ئێریشا دەڤەرا بەرواری بالا ل باشوورێ کوردستانێ کر.
چاڤکانیێن پێگەھا «دارکا مازی» ل باشوورێ کوردستانێ ئەشکەرە کرن، ئیرۆ رۆژا ئینی 27/3/2020ان بالەفرێن جەنگی یێن دەولەتا داگیرکار یا ترکیێ لڤینا چەکدارێن پەکەکێ ل دەڤەرا بەرواری بالا شۆپاندن و پاشان ئەو بۆردۆمان کرن.

ھەروەھا دەست نیشان کر، بالەفران ل دەمژمێر 7:00 شەڤ مۆشەکەک ل ئاقارێ گوندێ گیلکا دایە و ترس ژ سەدەما ڤێ ئێریشێ ژ بۆ خەلکێ ناڤچەیێ چێبوویە.

ڤێ حەفتیێ پارتییا کارکەرێن کوردستانێ پەکەکێ لڤینێن خۆ ل ناڤ و دەردوورا گوندێن باشوورێ کوردستانێ زێدەکرنە و ب ڤێ سەدەمێ دەولەتا داگیرکار یا ترکیێ ئێریشا ناڤچەیێ دکەت، دوھی ژی پەکەکێ بارەگەھەکا خۆ ل گوندێ ئاسەھێ یێ گرێدای کانی ماسێ دانایە و گەف ل موختارێ گوندی کرینە، ئەڤێ یەکێ خەلکێ دەڤەرێ نەرازی کریە.