هنه‌كی مایه‌ سلێمانی سه‌ركه‌تنا سه‌ر كۆرۆنایێ رابگه‌هینیت

هنه‌ك مایه‌ سلێمانی سه‌ركه‌تنا سه‌ر كۆرۆنایێ رابگه‌هینیت

دو كه‌سێن دن یێن تووشبوویێن ڤایرۆسا كۆرۆنا یا نوو (كۆڤید-19) ل باژارێ سلێمانیێ یێ باشوورێ كوردستانێ چاره‌سه‌ر بوون و ڤه‌گه‌رین مالێن خوه‌، ب ڤێ یه‌كێ ته‌نێ 21 كه‌س مانه‌ ل بن چاڤدێرییا دختۆران.

چاڤكانیێن پێگه‌ها «داركا مازی» ل باشوورێ كوردستانێ ده‌ست نیشان كرن كو ئیرۆ رۆژا شه‌می 28/3/2020ێ وه‌زاره‌تا ته‌ندروستیێ یا هه‌رێما باشوورێ كوردستانێ ئه‌شكه‌ره‌ كر كو 2 كه‌سێن دن ل باژارێ سلێمانیێ ژ ڤایرۆسا كۆرۆنایێ چاره‌سه‌ر بوونه‌ و ژ بۆ مالێن وان هاتنه‌ ڤه‌گه‌راندن.

هه‌روه‌ها ئه‌شكه‌ره‌ كر، هه‌یا نها 50 هه‌موه‌لاتیێن سلێمانیێ ژ ڤایرۆسا (كۆڤید-19)ێ ساخ بوونه‌ و ته‌نێ 21 كه‌س مان ل بن چاڤدێری و ته‌دبیرێن دختۆران، ته‌ندروستییا سلێمانیێ زه‌لال كر كو ره‌وشا 19 نه‌خوه‌شان باشه‌ و ته‌نێ 2 ژ وان هنه‌كی خه‌رابه‌.

سلێمانی یه‌كه‌م باژارێ باشوورێ كوردستانێ بوو كو ڤایرۆسا كۆرۆنایێ لێ ده‌ركه‌تی و پشتره‌ ل هه‌ولێرا پایته‌ختا باشوور و باژارێ دهۆكێ به‌لاڤه‌بوو.