قەیوومێ ئێلھێ زمانێ کوردی قەدەغە کر

قەیوومێ شارەداریا ئێلھێ، د یەکەم کارێ خوە دە ل دژی زمان و چانندا کوردی دەرکەت و زمانێ کوردی ژ مالپەرا فەرمییا شارەداریێ راکر.

قەیوومێ شارەدارتیا باژارێ ئێلھێ ل باکورێ کوردستانێ وەکە ژ یەکەم کارێن دەستپێکێ ژ بۆ دژاتی کرنا کوردان و زمان و چاندا وان، زمانێ کوردی ژ مالپەرا فەرمییا شارەداریێ راکر.

پێش دانینا قەیووم مالپەرا فەرمی یا شارەداریا ئێلھێ، ب ھەردو زمانێن کوردی و ترکی زانیاری پێشکێش دکرن، لێ بەلێ ب دانینا قەیووم، زمانێ کوردی ژ مالپەرا شارەداریێ ھات راکرن و نھا زانیاری تەنێ ب زمانێ ترکی تێن بەلاڤکرن.

ھەروھا ل گەل زانیاریێن دەربارێ ھەڤشارەدارێن بەرێ دە، ھەموو نڤیسێن ب زمانێ کوردی ژی ل مالپەرا شارەداریێ ھاتن راکرن و گەلەک بریارێن ھەڤشارەدارێن بەرێ ژ ئالیێ قەیووم ڤە ھاتنە ھلوەشاندن.

رۆژا ٢٣ێ ئادارێ ھەڤشارەدارێن ئێلھا باکورێ کوردستانێ کو ل سەر لیستا پارتیا دەمۆکراتیکا گەلان (هەدەپێ) بوون ب بریارا وەزارەتا ناڤخوەیا ترکیێ، ژ کار ھاتبوون دوورخستن و ل شوونا وان قەیووم ھاتبوو دانین.