ویلایه‌تێن یه‌كبوویی یێن ئه‌مه‌ریكایێ، ب ده‌هان ئه‌ره‌به‌یێن بارهه‌لگر یێن چه‌كان ده‌رباسی رۆژئاڤا كوردستانێ كرن، لێ به‌لێ نه‌خوه‌یایه كانێ ئه‌ڤ چه‌ك ژ بۆ هێزێن وانه یان شه‌رڤانێن هه‌سه‌دێ.
چاڤكانیێن پێگه‌ها «داركا مازی» ل رۆژئاڤا كوردستانێ ده‌ست نیشان كرن، ل شه‌ڤا ده‌رباسبوویی پێتر ژ 35 ئه‌ره‌به‌یێن بارهه‌لگر یێن چه‌كان و هه‌روه‌ها ئالیكاریێن لۆجستی یێن ئه‌مه‌ریكایێ ژ بۆ رۆژئاڤا كوردستانێ، هاتن ده‌رباس كرن.
هه‌روه‌ها ئه‌شكه‌ر كرن، ئه‌ڤ كاروانێ ئه‌ره‌به‌یێن ئارته‌شا ئه‌مه‌ریكایێ د سینۆرێ باژارێ حه‌سه‌كێ ره ده‌رباس بوون، لێ به‌لێ زه‌لال نه‌بوو هه‌گه‌ر ئه‌ڤ چه‌ك ژ بۆ هێزێن سووریایا ده‌مۆكراتیك هه‌سه‌دێ هاتبن شاندن.
چاڤكانیێن پێگه‌ها «داركا مازی» ژ شاهدحالێن ناڤچه‌یێ ئاگاهی ستاندن و ل گۆر وان ئاگاهییان، كاروانێ ئه‌ره‌به‌یێن ئه‌مه‌ریكایێ ژ بۆ سه‌ربازگه‌ها ل نێزی باله‌فرخانه‌یا (جوبه‌یر) ل ناڤچه‌یا مالكیێ هاتن جێگیر كرن.
پاش ئێریشا داگیركارییا تركیێ ل سه‌ر رۆژئاڤا كوردستانێ، ئارته‌شا ئه‌مه‌ریكایێ ته‌ڤ هێزێن خوه ژ باكوریێ سووریێ و رۆژهلاتا فراتێ ڤه‌كشاندن، لێ به‌لێ پاش ده‌رباسبوونا دو مه‌هان، ب ده‌هان له‌شكرێن خوه جار دن شاندن و دۆنالد ترامپ سه‌رۆكێ ئه‌مه‌ریكایێ ده‌ست نیشان كربوو كو ئه‌ڤ هێز ئه‌ركا وان دێ پاراستنا سازیێن په‌ترۆلێ به ل باكورێ سووریێ.
