دوبارەبوونا دیرۆکێ و نەراسته‌خۆ قەبوولکرنا چالاکی یا پاسوورێ

په‌كه‌كه‌ ب رێیا سۆتنا دارستانان، کارگەھان و په‌قاندنا ترومبێلان دخوازیت بێژیت شه‌ر ل باكور یێ به‌رده‌وامه‌

دوھی سپێدێ تەقینا بۆمبەکێ ل گوندێ شاویشا «گولەچێ» یێ گرێدایی باژێرێ «پاسوورێ» ببوو مژارا نووچەیان، ئەم ھەموو ل هیڤیا داخویانییەکێ بووین، ھەر چ نەبیت پێدڤی بوو باسکێ پەکەکێ تشتەک لسەر تەقینێ گۆتبا. ژ بەر ڤێ چەندێ ژی مە چ شرۆڤە نەکرن، لێ بەلێ پەکەکێ چ داخویانی نەدان، مه‌دیایا سەر ب پەکەکێ ڤە، نەراستەوخۆ ئەڤ روودانه‌ قەبوول کر، د  ھەمان دەم دا ژ بۆ وان کەسێن ژیانا خوە ژ دەست دایی ژی «کو بشێن بێژن حەقێ ڤانا مرنە» کەفتنە د ناڤ ھەولێن گه‌له‌ك مەزن دا.

مه‌دیایا سەر ب پەکەکێ ڤە «ئۆزگوور پۆله‌تیکا و نووچە جوان» دخواستن ناسنامەیێن کەسێن ژیانا خۆ ژ دەست دایی ئاشکرا بکەن، دگۆتن ئەو کەسێن مرین جەردەڤانێن خانەنشینن و میتێن دەولەتێ نە، وەک ھەرجار ژ زارێ چاڤکانیێن نەدیار خواستن خۆ مافدار ببینن و دەست ب چێکرنا نووچەیێن درەو کرن.

 «نووچە جوان» وه‌ھا د نڤیسیت: «ل گۆر زانیاریێن ھەرێمی یێن ب دەست مە کەفتی، د ڤان ھەیڤێن بوھارێ دا، ھندەک کۆمێن خۆفرۆشا خۆ رێكئێخستبوو«.

«نووچە جوان» بوویەرێ د وارێ دیرۆکی دا ژی ژبیر ناکەت و وەھا دبێژیت: «ئەڤ خۆفرۆشه‌ د سالێن 1990ێ دا ھاتبوونه‌ رێکخستن وان کارێ سیخۆریێ دكر، هه‌روه‌ها بەشداری د ئۆپەراسیۆنا، ژن کۆژی و لەش فرۆشیێ دا د کرن» و ھەروەھا ل سەر مالپەرێن تۆرێن جڤاکی ژی دگۆتن: «ئەڤ کەسه‌ چەتەنە، جەردەڤانن حەقێ وان کوشتنە و مە تۆلا خۆ ڤەکر».

ھەرچەنده‌ پەکەکێ ب فەرمی ئەڤ روودانه‌ قەبوول نەکربیت ژی، لێ دیار بوو کو ئەڤ بوویەرە پەکەکێ ئەنجام دا یە، ئەڤ بوویەرە نەلێکدانا د ناڤبەرا کوردان و دەولەتا ترکیێ دا یە، به‌لكو کوشتنا کورد و کوردی یه‌، مه‌دیایا پەکەکێ ب ڤێ چه‌ندێ دخوازیت شه‌رعیه‌تێ بده‌ته‌ کوشتنا کوردان.

ھەلبەت ل سەر شاشییا کو «کورد کوردی» بکوژیت، «مەلا مستافا بارزانی» یێ نەمر ب کورتی وەھا دگۆت: «کوردێن باش دوژمنان دکوژن، گەر کوردێن نەباش ژی ئەم بکوژین، چ کورد نامینن«.

بۆچی کورد ژ بۆ دیمۆکراتیکرنا ترکیێ بمرن؟

د ڤی شەری دا کی باشە کی خرابە، بابەتەکە دانوستاندنه‌كا درێژ بۆ دڤێت، د ناڤا شەرێ پەکەکێ یێ 42 سالی دا یێن پتری هه‌موویان مرین، یێن پتری هه‌موویان مال و مولکێ خۆ ژ دەست دایی، یێن پتر ئێتیم و سێوی ماین و بێ زارۆک ماین ئەم کورد ب خۆ بووینە، یێن گوندێن وان وێران بووین کورد بووینه‌، د ناڤا باژارێن وان دا خەندەک ھاتینه‌ کۆلان، ئەم کورد بووینه‌، د چالاکیێن برسیبوونێ دا دیسا ئەم کورد دمرین، یێن ب مینان پارچە دبن، هه‌ر ئەم کورد بووینه‌ و یێن گوند و رەزێ وان دھێنە بۆردومان کرن دیسان هه‌ر ئەم کورد بووینه‌.

ژ بۆ خزمەتکرنا دەولەتا ترک ل دەستپێکێ ئۆجالان و چەکدارێن ب وی ڤە گرێدایی، ھەر رۆژ ده‌لیڤه‌یا خزمەتێ ژ دەولەتا ترکێ دخوازن، پاش ژی ھەر ئەو دلسۆزێن خزمەتکرنا دەولەتا ترک ئانکو پەکەکه‌، رادبیت ب تۆھمەتا خزمەتکرنا دەولەتا ترک، گوندیێن هەژار یێن کورد دکوژیت، مخابن تراژیدی د ڤێرە دا یە، ژ بەر کو ھەردو ئالی «پەکەکە و جاش» ژی د خزمەتا دەولەتێ دا نە، ھەردو ئالی ژی بەرەڤانیێ ژ ترکیێ دکەن، ھەتا ئۆجالان د سالا 2014ێ دا دەما پێڤاژۆیا ئاشتیێ دھاتە گەنگەشە کرن دگۆت: «ئەم دشێین گەریلایان د ناڤا سیستەمێ ترکیێ دا ب سپایێ ترک ڤە گرێدەین و ئەڤ چەندە ژی دێ دەولەتا ترکیێ گەلەک ب ھێز کەت».

ئەم دشێین بێژین کو جاشاتی یا گوندان و نه‌رینێن ئۆجالانی یێن ل بن سیبه‌را ترکیێ، ژێده‌را خۆ ژ ئێک هزرێ وەردگرن، ھەردو ژی خەباتێ دکەن کو ئێکەتییا دەولەتا ترکیێ پارچە نەبیت و بەلاڤه‌ نه‌بیت، جوداهییا د ناڤبەرا وان دا تنێ هزرا هه‌ڤپشكه‌ د باسکێ چەپ و راست دا، نە تشتەکێ دی یە.

کوشتنا 5 کوردان نەسەرکەفتنا پەکەکێ یە و پەکەکە ڤێ چەندێ ژ ھەموویان باشتر دزانیت

گەر وەک دھێتە باسکرن، ئەڤ کەسە جاش ژی بن، لێ کوشتنا 5 کوردان نەسەرکەفتنا پەکەکێ یە و پەکەکە ڤێ چەندێ ژ ھەموویان باشتر دزانیت. پەکەکە ڤێ ژ بۆ خۆ وەک ئامرازەکێ پرۆپاگاندێ ب کار دئینیت، ئەو چالاکییێن کو چ مه‌دیا ل سەر نائاخڤن، تیمێن تۆلڤەکەر دبێژن: مە ئەو چالاکی ئەنجام دا یە، سۆتنا دارستانان، کارگەھان و ترومبێلان، ھەمان ئه‌و تیم خۆ ب بەرپسیار ژێ دده‌نه‌ دیاركرن.

 پەکەکە دخوازیت ب ڤی شێوازی وەسا خۆ نیشان بدەت کو ل باکور شەر یێ بەردەوامە، لێ بەلێ ل ترکیێ و باکورێ کوردستانێ چ شەر نینە، ئارمانجا شەرێ پەکەکێ ھەم د وارێ ستراتیژی ھەم ژی د وارێ تەکتیکی دا بێ رامان بوویە، پەکەکە دا کو ڤێ بێ رامان بوونا خۆ ڤەشێریت، ب ناڤێ «چالاکیێن ئینتیحاری، چالاکی یێن برسیبوونێ»، کەسێن سڤیل ب ناڤێ خۆفرۆش و جاش دکوژیت، لێ دیسان نەشێت خۆ ژ بەرپرسیارەتیێ رزگار بکەت.

مرن دێ ھەموو دژبەران بێدەنگ کەت

ل رۆژا 31 ئادارێ ل دەڤەرا بازیدێ یا سەر ب ئاگریێ ڤە، گەریلایان ب ناڤێ «سەما کۆچەر» چالاکییەکا ئینتیحاری ئەنجام دا، ئەڤ چالاکی یە د مه‌دیایا ترکیێ دا نەھاتە باسکرن، لێ ھاتە گۆتن کو ئەڤ چالاکی یە گەریلایا ژن یا ب ناڤێ «سەما کۆچەر»، ئەنجام دا یە، دیسا مرن ھاتبوو پیرۆز کرن، لەورا ژی کەس نەشیا باسێ ڤێ مرنێ بکەت، مرن چێببوو و ھەر کەس بێدەنگ ببوو.

ژ بەر کو ئەگەر مرن هەبیت ل وێرێ بەدەل ھەیە، یێ بەدەلێ بدەت دشێت ھەموو بریاران بدەت، یێن ژ ھەموویان راستتر ئەون و پێدڤییە ھەر کەس گوهداریا وی بکەت، ئانکۆ مرن نە ژ بۆ شکاندنا دوژمنی دهێتە بکارئینان، بەلکو ئامرازەکە داکو کوردان پێ بێدەنگ بکەن، بەهرا پتر یا نڤیسەر، رۆشه‌نبیر و سیاسەتمەداران ژی، ژ بەر گۆمانێ و بەرژەوەندیێن خۆ نەشێن ل بەرانبەری ڤێ زڤرۆکا دەستھلاتداریێ و مرنێ راوەستن، بۆ نموونه‌ ئه‌و ل دەمێ خەندەکان بێدەنگ بوون، ل بەرانبەر سیاسەتا شاش یا ھەلبژارتنان، بێدەنگ بوون، ل بەرانبەر سەرۆک پەرەستیێ بێدەنگ بوون و ئەم دزانین کو ئه‌و دێ بەرانبەر ڤێ روودانا پاسوورێ ژی بێدەنگ مینن.

گەلۆ د دەمەکێ وەھا ھەستیار و مەترسیدار دا، چ رامان ژ بۆ کوشتنا کوردان ھەیە؟

ب راستی ژی ئەڤ بوویەرا پاسوورێ ژ بەر وان ئه‌گه‌رێن مە ئاماژه‌ پێ دایی بوویەرەکا نە د جهێ خۆ دا یە، یا راستی نەروودانە به‌لكو چالاکییا پەکەکێ یە، هه‌گەر مرۆڤ ب چاڤێ سیاسەتا رۆژانە ژی بەرێ خۆ بدەتێ، ئەڤ چالاکی یە دکەڤیتە د خزمەتا دەولەتا ترکیێ دا، د ڤی دەمێ ھەستیار دا گەل ل بەرانبەر «یاسایا ئینفازێ» یا پەرلەمانێ ترکیێ پەسەند کری، دخوازیت بکەڤیتە د ناڤا لێگەرەکێ رایا گشتی دا، ئەڤێ چالاکێ تنێ دەستێ دەولەتێ بهێز کر.

د دەمەکی دا کو ھەموو جیھان ل سەر ڤایرۆسا کۆرۆنا کەفتییە پارپارێ و پاشەرۆژەکا نەدیار دھێتە دیتن، ل باشوور و رۆژئاڤایا کوردستانێ ژی قەدەرا ھەموو کوردان کەفتییە بن مەترسییەکا مەزن، ل باکور و رۆژھەلاتێ کوردستانێ کورد ب تنێ ماینە، کورد ماینە ل سەر بەختێ دەولەتێ، بێ خۆدانن، بێ دەرفەتن و بێ سەمیانن، گەلۆ د دەمەکێ وەھا ھەستیار و مەترسیدار دا، چ رامان ژ بۆ کوشتنا کوردان ھەیە.