«مسته‌فا سه‌لیمی» زیندانییه‌كێ سیاسی یێ رۆژهلاتا كوردستانێ یه و حوكمێ سێدارێ ل سه‌ره، به‌را 2 حه‌فتییان كاری ژ زیندانا سه‌قزێ بره‌ڤیت و خوه بگه‌هینیت باشوورێ كوردستانێ، لێ ژ ئالیێ «ده‌زگایێ زانیاری» ڤه تێ ده‌سته‌سه‌ر كرن و راده‌ست كرن ب «ئیتیلاعاتا ئیرانێ، ئیرانێ ئیرۆ رۆژا شه‌مبی 11/4/2020ێ حوكمێ سێدارێ ل سه‌ر بجی كر»
«مسته‌فا سه‌لیمی» كو زیندانییه‌كێ سیاسی یێ رۆژهلاتا كوردستانێ یه و ل ڤێ داویێ پاش شۆرشا ل زیندانا سه‌قزێ چێبوویی، كاری ئه‌و ل گه‌ل هنه‌ك هه‌ڤالێن خوه بره‌ڤیت و خوه بگه‌هینیت باشوورێ كوردستانێ، لێ به‌لێ ژ ئالیێ «دژه تیرۆرا لاهۆر شێخ جه‌نگی» تێ ده‌سته‌سه‌ر كرن و راده‌ست كرن ژ بۆ سازییا «ئتیلاعاتا ئیرانێ».
مسته‌فا سه‌لیمی كوردێ ناڤچه‌یا ب ناڤێ «تیله‌كۆ» یا گرێدایی باژارێ سه‌قزێ یێ رۆژهلاتا كوردستانێ یه، ته‌مه‌ن 51 ساله، زیندانیێ سیاسی یه و حوكمێ سێدارێ ل سه‌ره، به‌را 2 و پاش وێ شۆرشا ل زیندانا سه‌قزێ چێبوویی، ئه‌و كاری ل گه‌ل 72 زیندانیێن دی یێن كورد ژ زیندانێ بره‌ڤن، مسته‌فا سه‌لیمی ب رێیا سینۆرێ هه‌ڤبه‌شێ ل ناڤبه‌را رۆژهلات و باشوورێ كوردستانێ، كاری خوه رزگار بكه‌ت و ده‌رباسی باشوورێ كوردستانێ ببیت.
سه‌لیمی رۆژه‌كێ ما د زیندانا ده‌زگایێ زانیاری ڤه و پشتره ب ئیتیلاعاتێ هات راده‌ست كرن
ل گۆر چاڤكانیێن پێگه‌ها «داركا مازی» ل باشوورێ كوردستانێ، مسته‌فا سه‌لیمی، به‌را 2 حه‌فتییان گهیشتبوو باشوورێ كوردستانێ، لێ به‌لێ ژ ئالیێ خاله‌كا ئاساییشا یه‌كێتییا نشتیمانی یا كوردستانێ یه‌نه‌كێ ڤه، ل ناڤچه‌یا «گه‌رمك» یا گرێدای باژارێ پێنجوینێ تێ ده‌سته‌سه‌ر كرن، پشتره تێ راده‌ست كرن بۆ «ده‌زگایێ زانیاری»، هه‌روه‌ها پاش مانا سه‌لیمی ب رۆژه‌كێ ل زیندانا ده‌زگایێ زانیاری ل سه‌ربازگه‌ها ب ناڤێ «كانی گۆمه»، ب فه‌رمانا لاهۆر شێخ جه‌نگی، به‌رپرسێ ده‌زگایێ زانیاری و هه‌ڤسه‌رۆكێ یه‌كێتییا نشتیمانی یا كوردستانێ، ژ بۆ ئیتیلاعاتا ئیرانێ تێ راده‌ست كرن.
چاڤكانیێن پێگه‌ها «داركا مازی» ل رۆژهلاتا كوردستانێ، ئه‌ڤ مژارا سه‌لیمی شۆپاندییه و ئه‌شكه‌ره كرن كو پاش راده‌ست كرنا مسته‌فا سه‌لیمی ب ئیرانێ، جار دن ژ بۆ زیندانا سه‌قزێ هات ڤه‌گوهاستن، هه‌موه‌خت هێزێن ئه‌وله‌هییا زیندانێ ژی مالباتا سه‌لیمی هایدار كربوو ژ بۆ كو بهێن بۆ داوی جار مسته‌فا سه‌لیمی ببینن، چونكه دێ سزایێ سێدارێ ل سه‌ر هێته بجی كرن.
مسته‌فا سه‌لیمی ب 2 رۆژان پاش راده‌ستكرنا وی ب ئیرانێ هات سێداره دان
رێخستنا هه‌نگاو یا مافێن مرۆڤان یا رۆژهلاتا كوردستانێ ئه‌شكه‌ره كر، ئیرۆ رۆژا شه‌میێ 11/4/2020ێ سزایێ سێدارێ ل زیندانا سه‌قزێ ل سه‌ر مسته‌فا سه‌لیمی و هنه‌ك زیندانیێن دن یێن كورد هات بجی كرن.
تێ زانین مسته‌فا سه‌لیمی، ده‌ما 17 سالانه ب تومه‌تا ئه‌ندامبوونا وی د پارته‌كه سیاسی یا وه‌لات پارێز ده، ل ئیرانێ ده‌سته‌سه‌ر كرییه و دادگه‌ها شۆرشا ئیسلامی یا ئیرانێ، سزایێ سێداره‌دانێ ژ بۆ ده‌رخستییه، سه‌لیمی ل ناڤچه‌یا نه‌هاوه‌ندێ هاتبوو ده‌سته‌سه‌ر كرن، د 17 سالێن رابووری ده، ئه‌و ل زیندانێن كه‌ره‌ج، سنه و سه‌قزێ ده چاڤه‌رێیا بجی كرنا سزایێ سێداره‌دانا خوه دكر، به‌را 2 حه‌فتییان ئه‌و كاری بوو ل گه‌ل هنه‌ك هه‌ڤالێن خوه ژ زیندانێ بره‌ڤن و خوه بگهینن باشوورێ وه‌لات، لێ به‌لێ ژ ئالیێ لاهۆر شێخ جه‌نگی ڤه جار دن ب ئیرانێ و دارێ سێدارێ تێ راده‌ست كرن.
مسته‌فا سه‌لیمی خێزانداره، كوره‌كێ ته‌مه‌ن 25 سال ب ناڤێ «ئه‌شكان سه‌لیمی» هه‌یه، ئه‌شكان سه‌لیمی به‌را نها و ژ بۆ شۆپاندنا پرسا باڤێ خوه، ل سازیێن ده‌وله‌تا ئیرانێ ل سه‌قزێ، راستی سڤكاتی و بێ حورمه‌تیێ ژ ئالیێ به‌رپرسێن ئیرانێ ڤه هاتبوو.
