ب هاریكارییا لاهۆر جه‌نگی ئیرانێ ئیرۆ «مسته‌فا سه‌لیمی» سێداره‌ دا

ب هاریكارییا لاهۆر جه‌نگی ئیرانێ «مسته‌فا سه‌لیمی» سێداره‌ دا

مسته‌فا سه‌لیمی، زیندانیێ سیاسیێ كورد، ئیرۆ رۆژا شه‌می ل زیندانا باژارێ سه‌قزێ یێ رۆژهلاتا كوردستانێ هات سێداره‌ دان، پشتی كو ئاساییشا یه‌كێتییا نشتیمانییا كوردستانێ و ده‌زگایێ زانیاری راده‌ستی ئیرانێ كری.

رێخستنا هه‌نگاو یا مافێن مرۆڤان یا رۆژهلاتا كوردستانێ، ئیرۆ رۆژا شه‌می11-4-2020ێ ته‌سبیت كر كو مسته‌فا سه‌لیمی زیندانیێ سیاسی یێ كورد پاش كو ژ ئالیێ ئاساییشا یه‌كێتییا نشتیمانی یا كوردستانێ ڤه‌ ل رۆژێن رابووری ب ئێتیلاعاتا ئیرانێ هاتییه‌ راده‌ست كرن، ئیرۆ حوكمێ سێدارێ ل سه‌ر هات بجی كرن.

رێخستنا هه‌نگاو ده‌ست نیشان كر، مسته‌فا سه‌لیمی ئیرۆ ل ده‌مژمێر 4:00 سه‌رێ سبێ ل زیندانا سه‌قزێ هات سێداره‌ دان.

مسته‌فا سه‌لیمی پاش كو شیایی ل حه‌فتیێن رابووری ئه‌و ل گه‌ل هنه‌ك هه‌ڤرێێن خوه‌ بره‌ڤیت، خوه‌ گه‌هاند باشوورێ كوردستانێ و ل گوندێ گه‌رمك یێ گرێدای پێنجوینێ ژ ئالیێ ئاساییشا یه‌نه‌كێ ڤه‌ تێ ده‌سته‌سه‌ر كرن، پشتره‌ و پاش مانا وی ب رۆژه‌كێ ل زیندانا ده‌زگایێ زانیاری ب ئیرانێ هات راده‌ست كرن.

رێخستنا هه‌نگاو یا مافێن مرۆڤان دبێژه‌: «ئاساییشا یه‌كێتیێ ب به‌هانه‌یا ڤایرۆسا كۆرۆنایێ سه‌لیمی راده‌ست كرییه»‌.

ل ڤێ ده‌ربارێ ده‌، عه‌لی جوانه‌مه‌ردی رۆژنامه‌ڤان و چالاكێ هه‌ری دیارێ رۆژهلاتا كوردستانێ دوپات كر كو ئاساییشا یه‌كێتییا نشتیمانییا كوردستانێ، سه‌لیمی راده‌ستی تیمه‌كا قه‌رارگه‌ها ره‌مه‌زانی یا سپایێ پاسدارێن ئیرانێ كربوو.

تێ زانین مسته‌فا سه‌لیمی، ده‌ما 17 سالانه‌ ب تومه‌تا ئه‌ندامبوونا وی د پارته‌كه‌ سیاسی یا وه‌لات پارێز ده‌، ل ئیرانێ ده‌سته‌سه‌ر كرییه‌ و دادگه‌ها شۆرشا ئیسلامی یا ئیرانێ، سزایێ سێداره‌دانێ ژ بۆ ده‌رخستییه‌، سه‌لیمی ل ناڤچه‌یا نه‌هاوه‌ندێ هاتبوو ده‌سته‌سه‌ر كرن، د 17 سالێن رابووری ده‌، ئه‌و ل زیندانێن كه‌ره‌ج، سنه‌ و سه‌قزێ ده‌ چاڤه‌رێیا بجی كرنا سزایێ سێداره‌دانا خوه‌ دكر، به‌را 2 حه‌فتییان ئه‌و كاری بوو ل گه‌ل هنه‌ك هه‌ڤالێن خوه‌ ژ زیندانێ بره‌ڤن و خوه‌ بگهینن باشوورێ وه‌لات، لێ به‌لێ ژ ئالیێ لاهۆر شێخ جه‌نگی ڤه‌ جار دن ب ئیرانێ تێ راده‌ست كرن.