ئیسماعیل قائانی و جه‌میل باییک ل قەندیلی جڤییان

فەرماندارێ فەیلەقا قودس یا سپایێ پاسدارێن ئیرانێ، ل گەل سەرکرداتییا پارتییا کارکەرێن کوردستانێ جڤیا، قۆناغا نوو یا پەیوەندیێن پەکەکێ ل گەل ئیرانێ، ھەموەخت ئەرکێن نوو یێن پەکەکێ ل ئیراقێ نیقاش كرن.

ل گۆر ئاگاھیێن ھەری تایبەت یێن چاڤکانیێن پێگەھا «دارکا مازی» ل باشوورێ کوردستانێ، ل رۆژا ئینی یا رابووری 10/4/2020ێ، ئیسماعیل قائانی، فەرماندارێ فەیلەقا قودسێ یا سپایێ پاسدارێن ئیرانێ، سەردانا قەندیلی کرییە و ل گەل کەسێن یەکەم یێن پەکەکێ جڤیاییە.

ھەروەھا دەست نیشان کرن، قائانی و فەرماندارێن پێره‌، ل گوندێ لیفجی ل گەل جەمیل باییک ھەڤسەرۆکێ كونسه‌یا برێڤه‌بر یا کۆما جڤاکێن کوردستانێ كه‌جه‌كێ و 17 سەرکردەیێن دن یێن پەکەکێ جڤیاییه‌.

تێ زانین ئەڤ دبە یەکەم جڤینا ئیسماعیل قائانی ل گەل سەرکرداتییا پەکەکێ، پاش کو ئەرکێ فەرماندارێتییا فەیلەقا قودسێ وەرگرتی، بەرا کوشتنا قاسم سولەیمانی، ئیسماعیل قائانی کو جێگرێ سولەیمانی بوو، بەرپرسیارێ مەلەفا ھێزێن کوردی یێن سپایێ پاسداران بوو.

جڤینا قائانی و سەرکردەیێن پەکەکێ، قۆناغا نوو یا پەیوەندیێن پەکەکێ و ئیرانێ، بەلاڤەبوونا ڤایرۆسا کۆرۆنا و ھەروەھا ئەرکێن نوو یێن پەکەکێ ل ئیراقێ نیقاش کرنە.

یەک ژ فەرماندارێن سپایێ پاسداران کو بەرھەڤی کۆمبوونێ بووی، ب عەمید سیرھاد تێ ناسکرن و نھا ئەو بوویە بەرپرسیارێ مەلەفا یەکینەیێن کوردی د سپایێ پاسداران ده‌،عەمید سیرھاد برازایێ ئیمامێ گۆتارا ئینیێ یێ باژارێ تەبرێزێ یە و زمانێ ترکی ب باشی دزانیت ژ بەر کو ب نه‌ژاد ئازەری یە، ل ناڤچەیێ ئەو ب کۆد ناڤێ «حاجی» تێ ناسکرن.

مەدیایا ترکیێ ب تایبەت رۆژنامەیا خەبەر ترک ل دەربارا عەمید سیرھاد دبێژە: «وی رۆلەکا مەزن د رزگار کرنا موراد کارایلان، ئەندامێ کونسەیا برێڤه‌بر یا کەجەکێ ل سالا 2011ێ ژ ئۆپەراسیۆنەکا میتێ دە ھەبوو، وەختا کو كارایلان دەرباسی ئیرانێ کری».

خەبەر ترک ل دەربارا جڤینا ئینی یا قائانی و باییک ژی ئەشکەرە کر کو وێ جڤینێ دەما 5 دەمژمێران ده‌وام کربوو، ھەروەھا دەست نیشان کر کو تشتا سەیر ئەڤ بوو کو موراد کارایلان بەرھەڤی وێ جڤینێ نەببوو.

هه‌ر ل ده‌ربارا ده‌ركه‌تنا مه‌یدانی یا قائانی، مه‌دیایا ئیرانێ ئه‌شكه‌ره‌ كرنه‌ پاش وێ جڤینا ل گه‌ل په‌كه‌كێ، قائانی سه‌ردانا سووریێ كر و ل گه‌ل هێزێن گرێدای ئیرانێ ل وی ولاتی جڤیاییه‌، ئاژانسا جوان یا ئیرانێ وێنه‌یێن قائانی ل سووریێ ل گه‌ل چه‌كدار و فه‌رماندارێن جزبوللا وه‌شاندنه‌.