د راستیێ دا رەوشا حکوومەتا ھەرێمێ گەلەک جودایە، دەستھلاتا حکوومەتا ھەرێمێ ژبەر ئەگەرێن ناڤخۆ و دەرڤە، ئێکگرتی نینە، ب تایبەتی ژی پشتی شەرێ داعشێ ئەڤ پارچەبوونا ھەیی کوورتر بوویە، ئەگەرێ ڤێ پارچەبوونێ یێ سەرەکی ژی ئەو ھێزن ئهوێن کو ل گەل ئیرانێ تەڤ دگەرن، ئانکو پالا خوە داینە دەولەتا ئیرانێ، مرۆڤ ڤێ راستییا حکوومەتا ھەرێمێ تێدا نەبینە و راستە راست تاوانبار بکەت، دێ گەلەک شاشییا ب خوە بینیت، ڤێ پارچەبوونێ ئەم نەشێین بەرچاڤ وەرنەگرین، لەورا ژی بوویەرێن کو ل سلێمانیێ رووددەن دبن بەرپرسیارییا ئێکەتیێ دا نە.
ئەو کەسێن ھێزا ئێکەتیێ ب ئیستخباراتی، ئاساییشی و لەشکری ب دەست خوە ئێخستی ئانکو سازییا لاھۆر شێخ جەنگی، بێ شک بەرپرسێ سێدارەدانا مستەفا سەلیمی یە، ئەو کەس و ئالیێن ڤێ راستیێ ب پەیڤ و ھەولێن ھەستیاری دخوازن شێلی بکەن، ئەو نەوهلاتپارێزن نەژی بێ ئالی نه، تەنێ ئەم دشێین ببێژین ئەو بێ وژدانن، دخوازن راستیێ ڤەشێرن.
پشتگرێن پەکەکێ داکو بەرپرسیارییا ئێکەتیێ د ڤێ بوویەرێ دا ڤەشێرن، ئەڤە دو رۆژە ھەموو ئاستێن راگەهاندنێ دا ب تایبەتی ژی تۆرێن جڤاکی دا کەفتینە ناڤا لڤین و تەڤگەران دا، ژ بەر کو ب سالانە ئێکەتی و پەکەکە و ئیران، د ناڤا پەیمانەکا ستراتەژیک دا نە، ئەرکێن ڤێ پەیمانێ ئێک ژی ئەوە کو د هەموو بابەتان دا پشتگرییا ئێکدو بکەن، سێدارەدانا مستەفا سەلیمی ژی ئەنجامێ ڤێ پەیمانا ئێکەتیێ، پەکەکێ و ئیرانێ یە، ل سالا 2012ێ حەتا نوكه پەکەکێ چ داخویانی ل دەربارێ دەولەتا ئیرانێ نە داینە.
ئەو بوویەرا کوشتنا دو سەرکردێن پهكهكێ ل سلێمانیێ دەمھات (سەیتخان ئایاز) و جەمیل ئامەد (ئەسەر ئیرماک) ژی یهنهكه نەھاتە تومەتبار کرن، ئەڤ ھەردو ئەندامێن پهكهكێ ھەردەم ل گەل لاھۆر د ناڤا پهیوهندییان دا بوون، لێ پهكهكێ ژ بەر رێکكەفتنن خوە یێن ستراتیژی، ل سەر ڤێ بوویەرێ نهخواست د ناڤبەرا خوە و یهنهكێ دا تێك بدهت، ل ھەمان دەم پهكهكه قهت جارهكێ ژی بهحسا خیانەتا کەرکووکێ ناكهت.
ههگەر حکوومەتا ھەرێما کوردستانێ بھێتە رەخنە کرن، دێ مژارا وێ ئەو بیت کو ههوه ژ بۆ چ مافێ ژیانێ دا وان کەسێن خیانەتا کەرکووکێ کری، پێدڤی بوو وان خائینان بێھن ل کوردستانێ نهكێشابا، پێدڤی بوو حکوومەتێ ئەڤ کەسە دادگەھ کر بان.
راستی ئەڤەیە: «بالهك د ناڤا یهنهكێ دا ھەیە کو ب سەرێ خوە رهفتارێ دکەت و پرسگرێکا ڤێ گرۆپێ کوور و بەرفرەھە، ئەم نکارین ب حکوومەتێ كۆنترۆلێ ل سهر بکەین، پەیوەندییێن یهنهكێ و ئیرانێ و ئیرانێ و پهكهكێ، یهنهكێ بنگەھ و پالپشتە ژ بۆ گرۆپا چەتە یا لاھۆر شێخ جەنگی، ل ھەمان دەمێ ھنەک پەیوەندییێن ناڤدەولەتی ژی ھەنە، لەورا حکوومەتا ھەرێمێ ل دژی ڤێ گرۆپا چەتە ب ھۆشیاری و حساب گاڤان د هاڤێژیت».
دەما کو کەرکووک ھاتییە داگیرکرن، گهلهك کەس ل ھێڤیێ بوون کو شەرەک د ناڤبەرا حكوومهتا ھەرێمێ و یهنهكێ دا روو بدهت، ھنەک ئالییان ب پیلان ئاگرێ ڤی شهری ههلدكرن، لێ سەرۆکێ ھەرێما کوردستانێ مهسعوود بارزانی ب ئهزموونا خوە یا دێرین نەھاتە د ڤێ یاریێ دا و ئەڤ پیلانە ژناڤ بر، ههگهر حکوومەتا ھەرێمێ یهنهكه و لاھۆر شێخ جەنگی کربانه ئارمانج دا وێ دەمی حکوومەتا ھەرێمێ دا ھێتە ژ ناڤ برن و ل شوونا سیستەما فەدەرال دا ئیدارهیا پارێزگەھان ھێتە ساز کرن، حکوومەتا ھەرێما کوردستانێ نە ب ھەستێن خوە ب ئهزموون و زانین ئەڤ پیلانە ئاستەنگ کر.
مستەفا سەلیمی ژ ئالیێ کەس و گرۆپێن دۆستێن ئیرانێ ڤە ھاتە رادەست کرن
