باله‌فرێن جه‌نگ یێن ده‌وله‌تا داگیركار یا تركیێ، ئیرۆ ئێریشا ده‌ڤه‌رێن دۆسكی و به‌روارییا ل باشوورێ كوردستانێ كر و هنه‌ك مۆشه‌ك ل نێزی گوندێن «كانی به‌لاڤێ و بێلیزانێ» دان.
چاڤكانیێن پێگه‌ها «داركا مازی» ل باشوورێ كوردستانێ دیار كرنه، ئیرۆ رۆژا چارشه‌می 15/4/2020ێ باله‌فرێن جه‌نگ یێن تركیێ، ئێریشا ده‌ڤه‌رێن دۆسكی و به‌روارییا ل سینۆرێ پارێزگه‌هییا دهۆكێ كر، ب هێجه‌تا ته‌عقیب كرنا لڤین و حه‌ره‌كه‌تێن گه‌ریلایێن په‌كه‌كێ.
هه‌روه‌ها ده‌ست نیشان كرن، ئه‌ڤ ئێرش ل نیڤرۆژا ئیرۆ چێبوویه، وه‌ختا كو باله‌فران 2 مۆشه‌ك ل ده‌مژمێر 2:15 ئاقارێ گوندێ «كانی به‌لاڤێ» یێ گرێدای ناحیا بامه‌رنێ و هه‌روه‌ها هنه‌ك مۆشه‌كێن دن ل سینۆرێ گوندێ «بێلیزانێ» ل ده‌ڤه‌را به‌روارییا دان.
مۆشه‌كێن كو ل ئاقارێ گوندێ كانی به‌لاڤێ داینه، ل نێزی جادده‌یا سه‌ره‌كی یا وێ ناڤچه‌یێ بوونه.
تێ زانین ل رۆژا 31/3/2020ێ، باله‌فرێن تركیێ ده‌ڤه‌را دۆسكیان بۆردۆمان كربوو، وه‌ختا مۆشه‌كه‌ك ل ئاقارێ گوندێ «گوند كۆسه» دای، پشتره و ل 6/4/2020ێ ناڤچه‌یا ب ناڤێ «ده‌ریێ بێسه‌پێ» ل ئاقارێ گوندێ «بێسه‌پێ» ل ده‌ڤه‌را نێروه رێكان بۆردۆمان كر.
گه‌ریلایێن په‌كه‌كێ پاش ته‌باخا سالا 2019ێ لڤینێن خوه ڤه‌گوهاستنه ناڤا گوندان و ئه‌ڤ یه‌كه بوویه جیێ نه‌رازیبوونا خه‌لكێ ده‌ڤه‌رێ و ئه‌و دخوازن په‌كه‌كه ژ گوندێن وان دوور بكه‌ڤه ژ بۆ كو ژ ئێرشێن ده‌وله‌تا تركیێ دوور بن.
