کالکان دەهۆلا شەرێ براکوژیێ لێ ددە

 کالکان: دەهۆلا شەرێ براکوژیێ لێ ددە

دۆران کالکان ئەندامێ کۆمیتەیا برێڤەبەرا پەکەکێ راگهاند: «جێگیر کرنا هێزێن پەدەکێ ل وەرتێ ب ت ئاوا قەبوول ناکین، ئەڤ یەک وێ ببە پارچەیەک ژ ئێریش و پلانا ژناڤبرن و تێکشکاندنا پەکەکێ، پەکەکە ڤێ یەکێ قەبوول ناکە و وێ ب هەموو ئاوایەکێ ل دژی ڤێ پێنگاڤێ شەر بکە».

دۆران کالکان د دیدارەک مەدیایی دە د بەرنامەیێ “ئولکەدەن” ئێ مەدیا “هەبەر تیڤی” بەشدار بوو و ل سەر ڤیروسا کۆرۆنا و بەلاڤبوونا وێ د جیهانێ دە هەروەها کێنجا ڤێ ڤیروسێ ل سەر زندانان و رەوشا ئۆجالانێ سەرۆکێ پارتیا کارکەرێن کوردستانێ دە ئاخڤی هەروەها باس ل داوی پێشهاتێن ل چیایێ “زینێ وەرتێ” کر و گەف ل هکوومەتا باشوورێ کوردستانێ خوارن.

ئا سەرنجراکێش د ڤێ دیدارا مەدیایی یا دۆران کالکان دە ئەڤ بوو کو د هەر ئاخافتنەکا خوە دە ئەڤ یەک دوبارە دکر کو ئەمێ رەوشا وەرتێ قەبوول نەکین و شەر ل دژی پەدەکێ بکین، ئەڤ یەک د دەمەک وەهادایە کو ب ت ئاوا هێزێن پێشمەرگە یێن سەر ب پەدەکێ ڤە ل وێ ناڤچەیێ نینە بەلکو هێزا ل وێ دەرێ هێزەکە پەروەردەکری ژ ئالیێ هەڤپەیمانیا ناڤدەولەتی ب سەرۆکاتیا ئامەریکایێ یە کو سەر ب وەزارەتا پێشمەرگە یا کوردستانێ یە.

کالکان د ڤێ دیدارا مەدیایی دە داخواز ژ دەولەتا ترکیێ کر کو ل سەر رەوشا ئۆجالان زانیاریان پارڤە بکن و زۆر ب ئەدەب ناڤێ ئاردۆگانێ سەرۆکێ دەولەتێ دئانی و ئەو ب سەرۆک کۆمار ب ناڤ دکر، لێ بەلێ دەما دگهیشت رایەدار باشوورێ کوردستانێ ناڤێ هەر رایەدارەکێ ب تەنێ دئینا وەکە جورەک ژ ئیهانەکرنێ و ب ت ئاوا رێز ل رایەدارێن هەرێما باشوورێ کوردستانێ نەگرت و ئەو وەکە کەسێن حیزبی ب ناڤ دکرن.

کالکان کو ب یەک ژ سەرکردەیێن گرۆپا ئەنقەرێ د ناڤا پەکەکێ دە تێ ناسکرن راگهاند کو ئەڤ دەهان هەزار جارە ئەم دبێژین و وێ جارەکە دن ببێژین گەر بریار بە ئاشتیەک دناڤبەرا ترک و کوردان دە بێ ئاڤاکرن، تاکە کەس کو دکارە ڤێ یەکێ بکە ئۆجالانە، کالکان ب رەنگەک وەها ئەڤ یەک دگۆر کو کەسەک نەشارەزا بە دا وەها فکر کت کو ژ بلی ئۆجالان ت سەرۆک و سەرکردەیەک دناڤا کوردان دە نینە و گەر ئۆجالان نەمینە وێ دۆزا رەوا یا گەلێ کورد ژی ژناڤ بچە و نەمینە.

ل سەر داوی پێشهاتن ل چیایێ وەرتێ چێبووی ناڤبووری گەف ل پەدەکێ خوارن و ئەڤ یەک ب پیلانا ئامەریکایێ و ترکیێ بناڤ کر و راگهاند ئەڤ ناڤچە د دەستێ پەکەکێ دانە و پێش نها ل سالا 2 هەزارێ دە پەکەکێ ئەڤ ناڤچە ب شەر وەرگرتیە و ب مولکێ خوە دانە و هەبوونا ت هێزەکە دن ل ڤێ ناجڤچەیێ نایێ قەبوولکرن، کالکان ل ڤڕ وەکە سەرکردەیەکی داخوەیانی ددە کو ل سەر دەمێ عوسمانیان ژیان کربە و بچە جیەکێ ژ خوە رە داگیر بکە، ب ت ئاوایان کالکان وەکە کەسەکە سەردەم نائاخڤە، بەلکو د هەموو ئاخافتنێن خوە دە باس ل خوین و کوشتن و دەستهەلاتێ دکە.

هەرچەند کالکانێ سەرکردەیێ پەکەکێ باش دزانە کو ئەو هێزا ل وەرتێ هاتیە بجی کرن نە هیزا پەدەکی یە، بەلکو هیزەکە سەر ب وەزارەتا پێشمەرگە یا کوردستانێ کو سازیەکە فەرمیە د هکوومەتا هەرێمێ دە لێ داکو بەهانەیەکێ ژ خوە رە چێبکە دبێژە ئەو هێزا پەدەکێ یە و ب ت ئاوایان هەبوونا وان ل وەرتێ قەبوول ناکین و گەر ب زووترین دەمێ ئەڤ هێز نەیێ ڤەکشاندن ئەمێ شەر بکین و ب شەر وان ل وەرتێ دەربکین. ئەو ب خوە دبێژە “وەرتێ جیەک نیە کو بکەڤە سەر سینۆرێ کوردستانی بەلکو جیەکە دکەڤە ناڤا خاکا باشوورێ کوردستانی”، ل ڤڕ ئەڤ پرسیە سەر هل ددە گەلو گەر نە ناڤجەیەکە سینۆریە پەکەکە ل وڕ چ دکە و چما رێ بێ هکوومەتا هەرێمێ نادە هێزێ بشینە ور؟! گەلو ل کو دەرێ دنێ چێبوویە کو هکوومەتێ هەق نەبە هیزێ ل گۆرەی پیلان و ستەراتەژیا خوە بینە و ببە؟!

ل سەر شەر کرن دگەل باشوورێ کوردستانێ دە کالکان راگهاند کو ب ت ئاوا بەرپرساتیا شەر ناکەڤە سەر ملێن مە وەک پەکەکە بەلکو ئەڤ بەرپرساتی دکەڤە سەر ملێن پەدەکێ، پێتڤی دکە د زووترین دەم دە هێزێن پێشمەرگە ل وەرتێ بهێن ڤەکشاندن ژبەرکو ت تشتەکێ پەدەکێ ل وێ دەرێ نینە!

ناڤبووری باس ل پەیوەندیێن پەکەکێ و یەنەکێ ژی کرن و ئەشکەرە کر د چارچۆڤەیا پەیوەندیێن پەکەکێ و یەنەکێ دە، پەکەکێ رێ ب یەنەکێ دایە کو هنەک هێزێن خوە ل وێ ناڤچەیێ بجی بکن، ئەڤ یەک ژی ت گۆمانان د راپۆرا مە “پێگەها دارکا مازی” یا پێش نها دا ناهێلە کو مە تێدە باس ل سەدەمێن ئالۆزیێن وەرتێ کری و ب زەلالی مە بوورهان کری کو یەنەکە و پەکەکە ب ئەمرێ راستە راست یێ ئیرانێ ل وەرتێ بجی بوونە.