«باشوورێ كوردستانێ نه‌ جهێ كار و چالاكیێن PKKێ یه‌»

سه‌رۆكێ باشوورێ كوردستانێ، ئیرۆ ل ده‌ربارا رۆژه‌ڤا باشوور، ڤایرۆسا كۆرۆنایێ و كریزا «زینی وه‌رتێ» داخویانی دا و ده‌ست نیشان كر كو پێویسته‌ په‌كه‌كه‌ خوه‌ ژ دروست كرنا گرفتان ژ بۆ باشوورێ كوردستانێ دوور بێخیت.

نێچیرڤان بارزانی، ئیرۆ رۆژا دوشه‌می 20/4/2020ێ، پاش جڤینا ده‌سته‌یا سه‌رۆكاتییا باشوورێ كوردستانێ، د كۆنفه‌ره‌نسه‌كێ مه‌دیایی دا هنه‌ك بابه‌تێن كو د رۆژه‌ڤا باشوور دا نه‌ زه‌لال كرن و گۆت: «حكوومه‌تا باشوورێ كوردستانێ كاره‌كێ هه‌ری باش د پرسا به‌رهنگاربوونا ڤایرۆسا كۆرۆنایێ دا كرییه‌ و دونیا ژ بۆ ڤی كاری شاهده»‌.

ل ده‌ربارا ئالۆزبوونا ره‌وشێ ل ناڤبه‌را پارتییا ده‌مۆكرات یا كوردستانێ و یه‌كێتییا نیشتیمانی یا كوردستانێ دت و كریزا وه‌رتێ ئه‌شكه‌ره‌ كر كو ئه‌ڤ هێزا ژ بۆ وه‌رتی هاتییه‌ شاندن هێزه‌كا‌ تایبه‌ته‌ ب حكوومه‌تا باشوورێ كوردستانێ ڤه‌ و چ په‌یوه‌ندییا وێ ب په‌ده‌كێ و یه‌نه‌كێ ڤه‌ نینه‌، هێز ژ بۆ ئه‌ركه‌كا ده‌ست نیشان كری و ده‌مه‌ك ده‌ست نیشان كری هاتییه‌ شاندن».

پشتراست بن كێشه‌یێن ل گه‌ل یه‌نه‌كێ دێ چاره‌سه‌ر بن

هه‌روه‌ها گۆت: «كێشه‌ هنده‌ مه‌زن نینه‌ كو چاره‌سه‌ر نه‌بیت، به‌ره‌ڤ چاره‌سه‌ریێ دچین، هه‌موو هێزێن سیاسی ب تایبه‌ت د ڤی ده‌می دا كو كێشه‌یا كۆرۆنایێ و كریزا دارایی ل كوردستانێ و ئیراقێ هه‌یه‌، دڤێت یه‌كرێزیێ بپارێزن، ئه‌مێ ل گه‌ل پۆلیتبیرۆیا یه‌نه‌كێ بجڤین، یه‌نه‌كه‌ هه‌ڤبه‌شا سه‌ره‌كی یا په‌ده‌كێ یه‌ د ئاڤا كرنا حكوومه‌تێ دا».

به‌رده‌وام كر كو په‌ده‌كه‌ و یه‌نه‌كه‌ دێ جڤینه‌كێ پێكئینن و گۆت: «ئه‌م هه‌وه‌ دلنیا دكین كو كێشه‌ دێ هێنه‌ چاره‌سه‌ر كرن».

هه‌بوونا په‌كه‌كێ ل باشوورێ كوردستانێ نه‌شه‌رعی یه‌

ل ده‌ربارا پارتییا كاركه‌رێن كورردستانێ، سه‌رۆكێ باشوورێ كوردستانێ دبێژیت‌: «پێدڤییه‌ په‌كه‌كه‌ كو هێزه‌كا‌ ده‌رڤه‌ی باشوورێ كوردستانێ یه‌، خوه‌ ژ دروست كرنا كێشه‌یان ژ بۆ باشوور دوور بێخیت، ژ به‌ر كو باشوورێ كوردستانێ نه‌ جهێ كار و چالاكیێن په‌كه‌كێ یه»‌.

نێچیرڤان بارزانی، هه‌روه‌ها ده‌ست نیشان كر كو ئه‌و هه‌بوونا په‌كه‌كێ ل باشوورێ كوردستانێ، ب نه‌شه‌رعی دزانن.

سه‌رۆكێ باشوورێ كوردستانێ د به‌شه‌كێ دی یێ گۆتنێن خوه‌ دا به‌حسا كه‌مپا مه‌خموورێ كر و گۆت: «كه‌مپا مه‌خموورێ ل ژێر ده‌ستهلاتا مه‌ نینه‌، هه‌گه‌ر ژی ئه‌ڤ كه‌مپ یا سڤیلانه‌‌، نابیت بێهته‌ سه‌ربازی كرن و پێدڤییه‌ حكوومه‌تا فه‌ده‌رال چاره‌یه‌كێ ژ بۆ بكه‌ت».

چ په‌یوه‌ندییا هاریكاریێن باشوور بۆ رۆژئاڤا كوردستانێ ب سیاسه‌تێ ڤه‌ نینه‌

د مژاره‌كا دی دا نێچیرڤان بارزانی به‌حسا هاریكاریێن پزیشكی یێن باشوورێ كوردستانێ ژ بۆ رۆژئاڤا كوردستانێ كرن و گۆت: «ئه‌ڤ هاریكاری مرۆڤاتی نه‌ و چ په‌یوه‌ندییه‌كا وێ ب سیاسه‌تێ ڤه‌ نینه»‌.

پارتییا كاركه‌رێن كوردستانێ د كریزا «زینی وه‌رتێ» دا وه‌ك‌ هه‌ر كریزه‌كا د به‌رێ دا ل باشوورێ كوردستانێ چێبووی، ب ده‌رفه‌ت ژ بۆ خۆ زانی و ده‌ست هاڤێت دروست كرنا گرفتان و ئالۆز كرنا ره‌وشێ، وه‌ك‌ هه‌وه‌ێن دژوار یێن مه‌دیایی ل دژی په‌ده‌كێ كو ب هاریكارییا ئیرانێ نووچه‌یێن ل دژی په‌ده‌كێ د وه‌شاندن، پاش ئارام بوونا ره‌وشێ، دۆران كالكان ئه‌ندامێ كونسه‌یا برێڤه‌به‌ر یا په‌كه‌كێ گۆت كو په‌كه‌كه‌ رێ ناده‌ت په‌ده‌كه‌ هێزان بشینه‌ وه‌رتێ و په‌كه‌كه‌ دێ شه‌ری بكه‌ت.