ھونەرمەندێ کورد سەعید گاباری ئیرۆ ل نەخوەشخانەیەکە باژارێ ھەولێرێ ژیانا خوە ژ دەست دا.
ھونەرمەند سەعید گاباری ھەفتەیەکە ژ بەر تێکچوونا رەوشا وی یا تەندورستی ژ بەر نەخوەشیا پەنجەشێرێ ل نەخوەشخانەیێ د بن چاڤدێریێ دە بوو، لێ ئیرۆ سەرێ سبێ کۆچا داویێ کر.
بریار بوو، ل سەر راسپەردەیا سەرۆکێ ھکوومەتا ھەرێما کوردستانێ، ئیرۆ سەعید گاباری ژ بۆ وەرگرتنا چارەسەریێن بزیشکی، ب فرۆکەیەکێ ژ بۆ ئالمانیایێ بھاتا ڤەگوھاستن.
لێ بەلێ ل گۆری ئاگاھیێن رۆپەلا دارکا مازی؛ سەعید گاباری ل سەرێ سبێ د سائەت ٠٤:٤٥ان دە ل نەخوەشخانەیا سەردەم یا باژارێ ھەولێرێ ژیانا خوە ژ دەست دایە.
ھونەرمەندێ کورد سەعید گاباری د ١٣ێ نیسانا ١٩٥٦ان دە ل گوندێ خربێ کەژێ یێ باژارێ ھەسەکێ یێ رۆژاڤایێ کوردستانێ ژدایک بوویە.
ھونەرمەند سەعید گاباری ژ بەر زەختێن سیاسی نەچار ما کو دەرکەڤە ئەورۆپا. د ڤان سالێن داوی دە سەعید گاباری گەلەک جاران ل باشوورێ کوردستانێ دما.
د ١٩٦٦ان دە سەعید گاباری ھەلبەستڤانێن کورد جەگەرخوین و سەعیدایێ تیرێژ ناس کرن و ب ھەلبەستێن وان دەست ب موزیکێ کر و ھەلبەستێن ھەر دو ھەلبەستڤانان کرن ستران.
د سالا ١٩٧٠ان دە ژ بەر سترانەکە شۆرەشگەری ل کۆنسەرەکە مەزن ل قامشلۆکێ ھاتە گرتن، وی پر ئەشکەنجە و زەھمەتێن ب ئێش دیتن و گۆتنێن ستران و ئاوازێن کوردی لێ قەدەخە کرن. لێ سەعید گاباری خوە ت جاری ژ ستران و ئاواز و گۆتنێن کوردی دوور نەکر.
سەعید گاباری د ھەشت سالیا خوە دە دەست ب ھونەرا کوردی کریە و وەک ھەر کوردەکی د وی وەختی دە ژیانا خوە د بن زلم و زۆرێ دەرباس کریە.
گاباری کو چاڤێن وی نەددیت زێدەیی ٤٠ سالان بوو خزمەتا موزیکا کوردی دکر.
بریارە ئیرۆ تەرمێ ھونەرمەند سەعید گاباری ب بەشداریا ھەژمارەک ژ رایادارێن ھەولێرێ، ئالیێن سیاسی، ھونەرمەند و ھەزکریێن وی ل گوندێ مەلا ئۆمەرا سەر ب ھەولێرێ ڤە ب خاکێ وەرە سپارتن.
