چەکدارێن سەر ب ترکیێ ڤە سەرامیکێن گۆرستانەکا ئەفرینێ دزین
ھەژمارەک چەکدارێن گرێدایی ترکیێ و ئەرەبێن ھاوردە سەرامیکێن گۆرستانا باژارۆکێ جندرێسێ دزین.
رێخستنا مافێن مرۆڤان ل ئەفرینێ د راپۆرتەکێ دە بەلاڤ کر، گرووپەکە چەکدار لگەل ھەژمارەک ژ کۆچبەرێن ل ئەفرینێ ھاتنە بجھکرن، رۆژا گۆرێن گۆرستانا باژارۆکێ جندرێسێ شکاندنە و کەڤر و کێلێن سیرامیکن ژی دزیانە.
ل گۆر ھەمان رێخستنێ، چەکدار و ئەرەبێن ھاوردە سەرامیکێن کو دزینە فرۆتنە بەلێندەرەکی ل ناڤ باژارۆکێ جندرێسێ دا کو بازرگانیێ ب وان بکن.
ئەڤ نە جارا یەکەمە کو گرووپێن چەکدار گۆر و جھێن دیرۆکی و شوونواران دشکینن و ددزن، د مەھا ئادارا بووری دە ژی، گرووپا چەکدارا ب ناڤێ ئەمشات بن مزگەفتا باژارۆکێ شیێ کۆلاندبوو و د ئەنجامێ دە منارەیا مزگەفتێ و بەشەک ژ ئاڤاھیا مزگەفتێ ژی ھلوەشیابوو.
ژ دەما کو ئارتێشا ترکیێ و گرووپێن چەکدارێن ئۆپۆزسیۆنا سووریێ دەست دانینە سەر ھەرێما ئەفرینێیا رۆژاڤایێ کوردستانێ، ب دەھان گۆرستان ل سەر دەستێ گرووپێن چەکدار ھاتنە تێکدان.
ژ بلی کوشتن و رەڤاندنا وەلاتیێن ئەفرینێ و دەستدانینا سەر مال و ملکێن وان، گرووپێن چەکداریێن ژ ئالیێ ترکیێ ڤە تێنە پشتەڤانیکرن، شوونوارێن ئەفرینێ و گۆرستانان دشکینن و ددزن.
ژ دەما داگیرکرنا ئەفرینێ ژ ئالیێ ئارتێشا ترکیێ و گرووپێن چەکدار ڤە و ل گۆر زانیاریێن رێخستنا مافێن مرۆڤان ل ئەفرینێ، گرووپێن چەکدار ل بەر چاڤێ سەربازێن ترکیێ ھەتا نھا زێدەتر ژ ٤٢ جھێن شوونواری، گرێن دیرۆکی و مەزارگەھێن ئۆلی کۆلانە و وێران کرنە و زێدەتر ژ ٢٠ ھەزار پەرچەیێن ئەنتیکان دزینە و ڤەگوھاستنە ترکیێ.
ل ئەفرینێ گەلەک جھێن دیرۆکی ھەنە، ژ بلی کەلەھا ھۆری، کەلەھا سامانێ، شکەفتا دودەری، کەنیسەیا مارمارۆن، مەزارگەھێن ئۆلییێن موسلمان و ئێزدیان، نێزیکی ٢٥ گرێن دیرۆکی ھەنە، پرانیا وان د بەر چەمێ ئەفرینێ رە رێزکری نە، کو دیرۆکا وان ڤەدگەرە ھەزار ھەتا ٢ ھەزار سال بەری زایینێ.
