ئەنجوومەنا نشتمانی یا کوردی ل سووریێ ئەنەکەسە، د جڤینەکە ڤیدیۆ کۆنفەرانس دە گرینگییا یەکرێزییا کوردی ئانی زمان و د چارچۆڤەیا ئاڤاکرنا سووریەکە دەمۆکراتیک و فەدەرال كو مافێن رەوایێن گەلێ کورد تێده گارانتی كری بن و ژ بۆ ھەولێن ئامەریکا، ھەڤپەیمانێن وێ و ھەرێما کوردستانێ یێن پێکانینا یەکرێزییا کوردان سپاسی ل وان کر.
ئەمیندارییا گشتی یا ئەنەکەسێ راگھاند، وان رۆژا 12ێ گولانێ جڤینەک ب ڤیدیۆ کۆنفەرانسێ گرێدایە و تێدە ھەولێن یەکرێزییا کوردی ھاتن گوفتووگۆ کرن و تەکەزی ل سەر گرینگییا یەکرێزییا کوردی ھات کرن، ب ئاوایەکی کو بکەڤە خزمەتا دۆزا کوردی ل سووریێ و مافێن گەلێ کورد یێن رەوا د چارچۆڤەییا سووریایەکه فەدەرال، دەمۆکراتیک و فرەئالی ئا نەتەوی و ئۆلی دە ب چەسپینە.
ھەروھا ئەنه‌کسێ بانگ ل ئالیێن ناڤدەولەتی کر، فشارێ ل رەژیما سووریێ بکە، ژ بۆ كو دەست ب پرۆسەیا سیاسی بکە، ھەر وھا داخواز ژ وان ئالیێن ناڤدەولەتی کر، چارەسەرییەکە سیاسی ژ کریزێ رە ببینن، ژ بەر کو ھینا ره‌ژیما سووریێ ب بژاردەیا سەربازی سەرەدەریێ ب رەوشێ رە دکە و ئێش و ئازارا سوورییان زێدە دکە.
د جڤینا ئەنەکەسێ دە ل سەر ناکۆکیێن د ناڤبەرا ھێزێن ئۆپۆزیسیۆنا سووریێ دە ھات راوەستاندن، ئه‌نه‌كه‌سێ داخواز ژ ئالییان کر، یەکرێز بن و ب رۆلا خوە یا چالاک رابن، ژ بۆ ئارمانجا گەلێن سووریێ پێکانینا سیستەمەکە دەمۆکراتی بجھ بینن، کو مافێن ھەموو پێکھاتەیان و مافێن گەلێ کورد وەک گەلەکی رەسەن د چارچۆڤەیا دەولەتا سووریێ دە بێن پاراستن.
ھەروھا ئەنه‌که‌سێ بنپێکرنێن ل ئەفرینێ یێن ژ ئالیێ کۆمێن چەکدار ڤە تێنە کرن شەرمەزار کر و داخواز ژ ئالیێن پێوەندیدار کر، رێ ل بەر وان بنپێکرنان بگرە، تاوانباران سزا بدە، وەلاتییان و مولک و مالێن وان بپارێزن و کۆچبەر و دەربدەران ژی ب ریەکە ئەولە و ئارام ڤەگەرینن.
ئەنەکەسێ د داوییا داخویانییا خوە دە سپاسی ژ بۆ ھەولێن ئامەریکا و ھەڤپەیمانێن وێ و پشتەڤانییا سەرکرداتییا ھەرێما کوردستانێ کر کو ژ بۆ ئاڤا کرنا یەکرێزییا کوردی د چارچۆڤه‌یا ئۆپۆزسیۆنا نیشتیمانی دە ھەولێ ددن.
