د پەڤچوونەکێ دە ل رۆژهلاتێ کوردستانێ د ناڤبەرا گرۆپەک چەکدار یێن پارتییه‌كه كوردستانی و هیزێن سپایێ پاسدارێن ده‌وله‌تا داگیركار یا ئیرانێ ده، دو که‌س هاتن کوشتن و چار کەسێن دن بریندار بوون.
هات راگهاندن کو ئەڤ پەڤچوون ل سینۆرێ گوندێن «ڕەشەدێ و دوویسە» ل نێزی باژارێ مەریوانێ روودایە کو د ڤێ پەڤچوونێ دە، گرۆپەک 8 کەسی ژ چەکدارێن پارتییه‌كه كوردستانی یا دژی ئیرانێ، دگەل سپایێ پاسداران ل هەڤ خست و د ئەنجامێ ده، دو چەکدارێن سەر ب وێ گرۆپێ جانێ خوه ژ ده‌ست دان.
ل سەر ڤێ یەکێ سپایێ پاسدارێن ئیرانێ زەلالکرن دا و راگهاند د پەڤچوونەکێ دە دگەل گرۆپەکێ دە کو وان ب “تەرۆریست و دژە شۆرشا ئیسلامی” دانە ناساندن ل باژارێ مەریوانێ دو کەس ژ وێ گرۆپێ هاتنە کوشتن و چار کەسێن دن بریندار بوونە.
د زەلالکرنا سپایێ پاسداران دە ب تو ئاوا باس ل زرارێن سپایێ پاسداران نایێ کرن کانێ چەند پاسدار هاتنە کوشتن یان برینداربوونە.
چاڤكانیێن پێگه‌ها داركا مازی ل رۆژهلاتا كوردستانێ ئه‌شكه‌ره كرن كو ئه‌ڤ په‌ڤچوون ئێڤارا دوهـ رۆژا سێشه‌می 19/5/2020ان چێبوویه و د وێ په‌ڤچوونێ ده 2 له‌شكرێن سپایێ پاسداران هاتنه كوشتن و یه‌كێ دن ژی بریندار كه‌تییه.
هه‌یا ئیرۆ ژی چ پارتییه‌كه كوردستانی به‌رپرسیارییا ئه‌ڤێ په‌ڤچوونێ نه‌هلگرتنه، لێ به‌لێ سپایێ پاسداران ب ئاوایه‌كی به‌رفره‌هـ ل ناڤچه‌یا شه‌ر به‌لاڤه‌بوونه و كوێستانێن مه‌ریوانێ بۆردۆمان كرن.
