په‌كه‌كێ و تركیێ ب ڤی ئاوایی پیرۆزباهییا جه‌ژنێ ل گوندێن باشوور كر
باله‌فرێن جه‌نگ یێن ئارته‌شا داگیركار یا تركیێ، ئیرۆ ئاقارێ 2 گوندێن ناڤچه‌یا شێلادزێ و نه‌هلێ ل باشوورێ كوردستانێ بۆردۆمان كرن، پاش كو ته‌عقیبا حه‌ره‌كه‌تێن په‌كه‌كێ كرین.
ل گۆری چاڤكانیێن پێگه‌ها «داركا مازی» ل باشوورێ كوردستانێ، ئیرۆ رۆژا شه‌می 23/5/2020ان، باله‌فرێن جه‌نگ یێن ئارته‌شا تركیێ، ته‌عقیبا حه‌ره‌كه‌تێن پارتییا كاركه‌رێن كوردستانێ ل سینۆرێ پارێزگه‌ها دهۆكێ كرنه و ل ناڤچه‌یا نێروه رێكان و نه‌هلێ بۆردۆمان كرنه.
چاڤكانیێن «داركا مازی» ده‌ست نیشان كرن، ل ده‌مژمێر 11:00 سپێدێ باله‌فران مۆشه‌كه‌ك ل شكه‌فته‌كا باكورێ گوندێ «هیزانكێ» یێ گرێدای ناڤچه‌یا چه‌مانكێ ل ده‌ڤه‌را نه‌هلێ دایه.
پشتره و ل دمژمێر 11:30 سپێدێ باله‌فرێن تركیێ مۆشه‌كه‌كه دن ل «ده‌ریێ بێسه‌پێ» ل ئاقارێ گوندێ «بێسه‌پێ» یێ گرێدای ناڤچه‌یا شێلادزێ ل ده‌ڤه‌را نێروه رێكان خستییه.
چاڤكانیێن پێگه‌ها «داركا مازی» ل باشوورێ ولات كو دیمه‌نێن ڤیدیۆیی یێن ڤێ بۆردۆمانێ شاندنه، ئاماژه ب وێ یه‌كێ دان كو ئه‌ڤ بۆردۆمان بوویه سه‌ده‌ما ترسا هه‌مولاتیێن سڤیل یێن گوندێن ناڤبووری، خه‌لكێ ناڤچه‌یێ دخوازه گه‌ریلایێن په‌كه‌كێ خوه نێزی گوندێن وان نه‌كن ژ بۆ كو نه‌كه‌ڤن به‌ر ئێریشێن باله‌فران.
