سۆران هات ته‌رۆر كرن

سۆران هات ته‌رۆر كرن

جینایه‌ته‌كه‌ دن یا په‌كه‌كێ ل رۆژهلاتا كوردستانێ

سۆران ده‌ست گرێدایی بوو، د ره‌وشه‌ك پڕ خه‌راب دە بوو، ده‌ست و لنگێن وی شكاندنبوون، ئەو ب 6 گوللـه‌یان هات كوشتن و جه‌سه‌دێ وی ئاڤێتن چۆلێ

پارتییا كاركه‌رێن كوردستانێ، هه‌گه‌ر چ هه‌یا نها نكارییه‌ هه‌نگاڤه‌كه‌ خێرێ د رێیا بزاڤا رزگاریخوازییا كوردی ده‌ بهاڤێژە و ب راستی ژی قه‌ت باوه‌ری ب بزاڤەک ب ڤی ئاوایی نه‌بوویه‌، لێ به‌لێ ژ بۆ كو پاشناڤێ كوردستانیبوونا خوه‌ د جینایه‌ت، كوشتن و مالوێرانیێ ده‌ ب سه‌لمینیت، چ په‌رچه‌یێن كودستانێ بێ به‌ش نه‌كریه‌، داوی جار ل ناڤچه‌یا هه‌ورامانێ یا رۆژهلاتێ كوردستانێ جوانه‌كی كورد ب هۆڤانەترین ئاوا كوشتییه‌.

ئه‌ڤێ جینایه‌تا په‌كه‌كێ ‌ كارڤه‌دانێن پڕ مەزن ل جەم نه‌ته‌وه‌یا كورد ل رۆژهلاتا ولات ل په‌ی خوه‌ ئانین، هەرچەند كو گەل ژ تێكلیێن ستراتیجی یێن په‌كه‌كێ/پژاكێ ل گه‌ل سپایێ ته‌رۆریستی یێ ب ناڤێ پاسداران و سازییا ئیتیلاعاتێ یا ئیرانێ پشتراستن، لێ د تۆرێن جڤاكی ده‌، هاوارێن وان به‌رز بوونه‌ و ب ئه‌شكه‌ره‌ باس ل وێ زولمێ دكن یا كو په‌كه‌كێ ب ئالیكارییا ره‌ژیما ته‌هرانێ ب سه‌رێ گه‌لێ كورد ئانی.

گونه‌ها سۆران ته‌نێ ئه‌و بوو كو رازی نەبوو باجێ بدە په‌كه‌كه‌/پژاكێ دەما وان داخوازا په‌ره‌یان ژ سۆران كربی، سۆران ب وان گۆتبوو كو من په‌ره‌ نینه‌ و داهاتێ من ب زه‌حمه‌ت تێرا دەبارا ژیانا من و مالباتا من دكه‌، ئەز نکارم باجێ بدم

د داوی جیانه‌یتا په‌كه‌كێ ده‌، ل شه‌ڤا دوشه‌می یا رابووری 2/6/2020ان، ب پلاینه‌كه‌ قرێژ و ترسنۆك، جوانه‌كی گوندێ «روار» یێ ناڤچه‌یا هه‌ورامانێ یا گرێدای باژارێ مه‌ریوانێ ل رۆژهلاتا كوردستانێ، ب ناڤێ «سۆران ئه‌خته‌ر سه‌مه‌ر»، ژ بۆ سینۆرێ گوند تێ گازی كرن و تێ كوشتن، دەما كو جه‌سه‌دێ وی تێ دیتن، ئه‌شكه‌ره‌ بوو كو ده‌ستێن وی هاتبوون گرێدان و لنگێن وی هاتبوون شكاندن و 6 گوللـه‌ ل جەسەدێ وی دابوون، جه‌سه‌دێ وی ل ده‌ردوورا گوند هاتبوو ئاڤێتن.

گونه‌ها سۆران ته‌نێ ئه‌و بوو كو په‌كه‌كێ‌/پژاكێ داخوازا باجێ ژێ كربوو و سۆران ژی ب وان رە گۆتبوو كو من په‌ره‌ نینه‌ و داهاتێ من ب زه‌حمه‌ت بەشا دەبارا ژیانا من و مالباتا من دكه‌

سۆران ئه‌خته‌ر سه‌مه‌ر ب تو ئاوا هات كوشتن؟

دلشاد عینایه‌تی یه‌ك ژ روونشتڤانێن ناڤچه‌یا مه‌ریوانێ یه‌، پاش چه‌ند رۆژان ژ ته‌عقیبا ئاوایێ كوشتنا سۆران، وی  ل پێگه‌ها خوه‌ یا فه‌یسبووكێ راپۆره‌ك وه‌شاندییه‌ و تێده‌ هۆرگلیێن بوویه‌رێ شیرۆڤه‌ كرنه‌، ئه‌ڤ راپۆر ژ ئالیێ رێژه‌یه‌كه‌ هه‌ری زۆر یا چالاكڤانێن جڤاكا سڤیل و گه‌لێ ناڤچه‌یا هه‌ورامانێ هاتییه‌ پشت راست كرن.

دلشاد عینایه‌تی نڤیساندییه‌: «ل شه‌ڤا دوشه‌م سه‌ر سێشه‌مییا رابووری 2/6/2020ان ل ده‌مژمێر 12 شه‌ڤ، ل هه‌ورامانێ و ب تایبه‌ت ل كوێستانێن كۆسالان ل نێزی رووارێ، جوانه‌كی كورد ب ناڤێ سۆران ئه‌خته‌ر سه‌مه‌ر ب ده‌ست چه‌ته‌یێن پژاكێ ب ئاوایه‌كێ هۆڤ و بێ ویژدانانه‌ هاتییه‌ كوشتن».

دلشاد د درێژیێ ده‌ ب ڤی ئاوا باس ل بوویه‌رێ دكه‌: «وها دیاره‌ كو جه‌ماعه‌تێن برایه‌تییا گه‌لان پژاكێ، هه‌ڤالرێیه‌كێ سۆران ب ناڤێ رامین كو شڤان بوو و ل به‌ر په‌زی بوو، وه‌كه‌ دیل گرتبوو و كلاشینكۆف ل سەر سەرێ وی دانیە و ژێره‌ گۆتییه‌ زوو په‌یوه‌ندیێ ب سۆران بكه‌ و ژێره‌ ببێژه‌ خوارنا تێشتێ ژ بۆ ته‌ بینە، سۆران ژی وه‌كه‌ وه‌فاداری، ل گه‌ل هه‌ڤاله‌كێ خوه‌ یێ دن سواری ئه‌ره‌به‌یێ دبن و به‌ر ب ناڤچه‌یا ژۆنی ب رێ دكه‌ڤن ژ بۆ كو خوارنێ ژ بۆ رامین ببن».

«ب گۆتنا هه‌ڤالێ سۆران كو د گه‌ل ده‌ بوو، به‌را ئه‌ره‌به‌یا وان بگهیژە‌ ناڤچه‌یا ژۆنی، پژاكێ د رێ ده‌ ئه‌و راگرتن، ژ ئه‌ره‌به‌یێ ده‌رخستن، تێله‌فوونێن وان ژێ سته‌ندن و ب هه‌ڤالێ سۆران ره‌ گۆتن كو تو ل ڤر بمینه‌، كاره‌كی مه‌ ب سۆران هه‌یه‌ و نها ئه‌وێ ڤه‌گه‌رە جه‌م ته»‌.

6 گوللـه‌ ل سۆران دان

دلشاد عینایه‌تی هه‌روه‌ها دبێژه‌: پاش ده‌رباسبوونا چه‌ند ساعەتان ژ برنا سۆران، ب هه‌ر ئاوایی ئه‌و رێیا خوه‌ ژبۆ ناڤچه‌یا ژۆنی ده‌وام دكه‌، ژ بۆ كو داخوازا ئالیكاریێ و د هاوار چوونا سۆرانی ژ گه‌لێ ناڤچه‌یێ بكه‌ داكو ژ ده‌ست چه‌ته‌یێن پژاكێ رزگار بكن.

لێ به‌لێ جیێ داخێ یه‌، وه‌ختا كو خه‌لك تێ جیێ بوویه‌رێ، دبینن كو سۆران ده‌ست گرێدایی و د ره‌وشه‌كه‌ پر خه‌راب دایه‌، لنگێن وی هاتنه‌ شكاندن و شوونا 6 گوللـه‌یا ل سه‌ر جه‌سه‌دی وی هه‌نه‌، پشترە خه‌لكی جه‌سه‌دێ سۆران برن مه‌ریوانێ ژبۆ پزیشكیێ دادیێ.

پرانییا گه‌لێ رۆژهلاتێ ولات ب تایبه‌ت خه‌لكێ ناڤچه‌یا مه‌ریوانێ، نه‌ جارا یه‌كه‌مینه‌ كو جینایه‌تێن ب ڤی ئاوایی یێن په‌كه‌كێ/پژاكێ ب چاڤێن سەرێ خوە میزە دکن، ئه‌و دبێژن: نابه‌ پارتییه‌ك ب ناڤێ خه‌بات كرنێ ژ بۆ ئازادییا كوردستانێ، جینایه‌تێن ب ڤی ئاوایی بكه‌.

پژاك مژوولی چه‌ته‌گه‌ریێ نه‌

گه‌لێ ناڤچه‌یێ زانیاری و راپۆرا دلشاد عینایه‌تی سه‌ر راست كرن دەما نڤیساندی‌: ژ ئه‌نجاما ته‌عقیب و له‌كۆلینێ ئه‌شكه‌ره‌ بوو كو سۆران جوانه‌كی كاسب ژ مالباته‌ك هه‌ژار بوو، تێكلییا وی ب ئالییه‌كی ڤه‌ تونه‌ بوو، تو کەس ژی ئازار نەدابوو، وی ب به‌له‌مێ ل سه‌ر رووبارێ سیروان بۆ به‌نداڤا داریان كه‌سابه‌تا خوه‌ دكر و كه‌لوپه‌لێن خه‌لكێ ناڤچه‌یێ ڤه‌دگوهاستن.

جه‌ماعه‌تێن پژاكێ وه‌كه‌ كارێ خوه‌ یێ هه‌رجار، ل ناڤچه‌یێن رۆژهلاتا كوردستانێ، ب تایبه‌ت ل مه‌ریوان و هه‌ورامانێ، مژوولی چه‌ته‌گه‌ریێ و ده‌سته‌سه‌ر كرنا ب زۆر یا كاسبكارێن ناڤچه‌یێ نه‌، په‌ره‌یان ژ بۆ خه‌باتا براتییا گه‌لان كۆم دكن، وها دیاره‌ وان چه‌ند جاران داخوازا په‌ره‌یان ژ سۆران كربوو و سۆران ب وان گۆتبوو كو من په‌ره‌ نینه‌ و ئهز كه‌سه‌ك كاسبم‌ و كه‌سابه‌تا وی بەشا دەبارا ژیانا مالباتا وی ناكه‌، لێ به‌لێ جیێ داخێ یه‌ كو ڤان بێ ویژدانا نە كه‌رامه‌ت و نە مرۆڤاتی د ناخێ وان ده‌ نینه‌، ل سه‌ر ڤێ به‌رسڤا سۆران، گه‌فان لێ دكن و پیلانا كوشتنێ ژ بۆ دانان.

دلشاد د به‌شه‌كه‌ دن یا راپۆرێ ده‌ دبێژه‌: «ئه‌ز ب خوه‌ شاهدێ راست یێ ڤان كریارێن قرێژ یێن پژاكێ مه‌، من بەلگە و شاهد هه‌نه‌ كو گەلەک جاران پەژاکێ گه‌ف ل من ژی کرینە، ل ناڤچه‌یا شامیان وان داخوازا په‌ره‌یان ژ من كر‌، وان گه‌فا زرار گهاندنێ ب تەرشووکەوالێ من و كوشتنا من كریە»‌.

تشتێ دیار ئه‌ڤه‌ كو ته‌ڤاهییا خه‌لكێ مه‌ریوان و هه‌ورامان و ناڤچه‌یا شامیان ب باشی دزانن كو پژاك ل ناڤچه‌یێ یه‌ و دزانن كانێ پێگه‌ها وان ژی ل كو ده‌رێ یه‌، تو كه‌سێ ژی كار ب وان نینه‌، ئه‌و ته‌نێ مژوولی ئازاردانا خه‌لكن و ب ناڤێ خه‌باتا ژ بۆ كوردستانێ، ده‌هان جاران زارۆیێن خه‌لكێ ب دیل گرتنه‌ و هه‌یا كو په‌ره‌ نه‌داینێ ئازاد نه‌دكرن.

دلشاد دبێژه‌: هه‌گه‌ر ده‌ركه‌تنا من هه‌به‌ و بكارم ل جیه‌كێ بێ ئالی و مه‌دیایه‌كا ئازاد بئاخڤم، دێ شاهدێن خوه‌ ژی ل گه‌ل خوه‌ ببم، لێ به‌لێ په‌كه‌كه‌/پژاكێ وها ل گه‌ل كرنه‌ كو ژ ترسا كوشتنێ نكارن هه‌ر تشتی ببێژن.

جوامێر کۆسالان: ره‌ژیما ته‌هرانێ بە ئه‌شکه‌ره‌ ئالیكارییا په‌كه‌كێ دكه‌

جوامێر كۆسالان یه‌ك ژ هه‌ڤال و خزمێن سۆرانه‌ و وی ژ نێزیك ناس دكه‌، دبێژه‌: «سۆران ژ ئالیێ چه‌ته‌یێن پژاكێ هات كوشتن، سووند ب مرۆڤاتیێ كو سۆران تو تێكلییه‌ك ب ره‌ژیمێ و تو ئالییه‌كی نه‌بوو، ته‌نێ مژوولی كه‌ساباتا خوه‌ بوو، ده‌ما 10 سالانه‌ پژاك/په‌كه‌كه‌ ب ئه‌شكه‌ره‌ ل ناڤچه‌یا هه‌ورامانێ یه‌ و ره‌ژیم ئالیكارییا وان دكه‌ و ئه‌و ژی خه‌لكێ ناڤچه‌یێ تالان دكن».

كاوه‌ مورادی یه‌كه‌ ژ چالاكڤانێن جڤاكا سڤیل ل ناڤچه‌یا مه‌ریوانێ، ئەو ده‌نگێ خوه‌ دخه‌ پال ده‌نگێ دلشاد و هه‌زاران كه‌سێن دن یێن ناڤچه‌یا مه‌ریوانێ و دبێژه‌: «پژاك/په‌كه‌كه‌ وه‌كه‌ رێگر و چه‌ته‌یان ته‌ڤ دگه‌رن، به‌ریا چه‌ند شه‌ڤان رێیا من گرت و ئه‌م پشكنین كرن و وه‌ختا كو زانی تو په‌ره‌ و تشته‌ك ب من ره‌ نینه‌، ل من دا و ئه‌ز ئاڤێتم».

پژاكێ بێهنا خه‌لكێ ناڤچه‌یا مه‌ریوانێ و هه‌ورامانێ ته‌نگ كرییه‌

كاوه‌ مورادی د درێژاهییا نڤیسا خوه‌ ده‌ دبێژه‌: «داخوازێ ژ رێخستنێن سڤیل دكین بێهنه‌ سه‌ر خه‌ت، پژاكێ بێهنا گه‌لێ ناڤچه‌یێن مه‌ریوان و هه‌ورامانێ ته‌نگ كرییه‌، ره‌حمێ ب شڤان و خودانێن په‌زی و یێن گوندێن شاهۆ و كۆسالان نابن، ئەو خوە هنگڤێ هه‌نگه‌ڤانان ژی تالان دکن».

كاوه‌ دبێژه‌: ل سه‌ر رێیا ده‌له‌مه‌رزێ ل ناڤچه‌یا ژاوه‌رۆیێ ل مه‌ریوانێ، چەکدارێن پژاكێ رێ ل كۆلبه‌ران دگرن و په‌ره‌یان ژ وان دستینن.

خه‌لكێ هه‌ورامانێ ژ بۆ پژاكێ: ئێدی به‌سه‌، هه‌ورامان نە جیێ کەسێن مینا وە خائینێن گه‌ل و نشتیمانە

دلشاد عینایه‌تی و چالاكڤانێن ناڤچه‌یا مه‌ریوانێ ل دوایێ هنه‌ك پرسان ئاراسته‌ی پژاكێ/په‌كه‌كێ دکن:

  • هه‌یا كه‌نگێ دڤێ گەلێ هه‌ژار و بێ ده‌ستهلات، باجا بێ فامی و ناڤچه‌گه‌رییا هه‌وه‌ بدە؟

  • ما قه‌ی هوون پێداچوونێ د خوه‌ ده‌ ناكن؟ ما قەی ئه‌ڤ جوانێ ب دەستێ وە هاتی كوشتن و ئه‌و كه‌سێن كو هوون په‌ره‌یان ب زۆرێ ژێ دستینن، نە برایێن هه‌وه‌نه‌؟

  • گەلۆ هه‌یا كه‌نگی هوونێ گوللـه‌یێن خوه‌ ل جیێ ل سینگا دوژمن بدن وێ ل سینگا جوانێن كورد یێن بەلەنگاز بدن؟

  • گه‌ر هوون خوه‌ ب شۆرش گێر و خه‌باتكار دزانن، چما هوون ناچن ئەو کەسێن وەلات داگیركری سزا بدن؟

  • رۆژانه‌ ب ده‌هان و سه‌دان خۆفرۆش و رایەدارێن پله‌ بلند ل به‌ر سینگا ‌وه‌ ره‌ دەرباس دبن، لێ هوون ب كار وێ یه‌كێ ژی نایێن كو یه‌ك گوللـه‌ ژی تێ به‌ردن؟

  • به‌س بكن ئێدی هه‌ورامان ‌جیێ ‌وه‌ یێن خائینێن گه‌ل و نشتیمان نینە

تێ زانین كو باره‌گه‌هێن پارتییا كاركه‌رێن كوردستانێ ب ئه‌شكه‌ره‌ ل ناڤچه‌یا هه‌ورامانێ یا رۆژهلاتا كوردستانێ هاتنه‌ دانان و ب شه‌ڤ رۆژ گه‌ریلایێن په‌كه‌كێ و پژاكێ ب ئازادانه‌ هاتوچوویێ دكن و باجێ ژ گەلێ هه‌ژار دستینن، دۆمانا ئاگرێ ل هه‌ڤهاتنا كۆمارا ئیسلامییا ئیرانێ و په‌كه‌كێ دچه‌ چاڤێ گەلێ كوردستانێ و پر جاران په‌كه‌كێ زارۆیێن گەلی ناڤچه‌یێ ره‌ڤاندنه‌، دەما ئه‌ڤ خه‌لك ژی قه‌ستا حكوومه‌تا ئیرانێ دكن ژ بۆ كو سكالایێ ل سه‌ر په‌كه‌كێ تۆمار بكن، ژ ئالیێ كاربده‌ستێن ئیرانێ تێن بن چاڤ كرن و بێ رێز كرن.

پژاك/ په‌كه‌كه‌ وه‌كه‌ شاخه‌كا سپایێ تەرۆریستی یێ پاسداران ته‌ڤ دگه‌ره‌

ب كورتێ، ئه‌ڤا كو تێ دیتن د سه‌لمینه‌ كو په‌كه‌كه‌/پژاك، نه‌ك ب ته‌نێ دۆست به‌لكو وه‌كه‌ شاخه‌كه‌ سپایێ پاسدارێن ئیرانێ ته‌ڤ دگه‌ره‌، ئه‌ڤێ یه‌كێ ژی كوردێن رۆژهلات ژ پێشه‌رۆژا خوه‌ دلگران كرنه‌، ژبه‌ركو رۆژهلات ژی ل سایا نه‌رینا ئاپۆچێتیێ و ده‌سته‌واژه‌یا پووچ و بێ ئه‌ساس و کۆلە یا ب ناڤێ براتییا گه‌لان و ژبۆ كو ب ده‌ردێ رۆژئاڤا نه‌چه‌ و زێده‌تر راستی سته‌م و مالوێرانی و داگیركارییا هنه‌ك ئالییان نه‌به‌، داخوازا ده‌رخستنا په‌كه‌كێ ژ رۆژهلاتا كوردستانێ دكن، روونشتڤانێن ناڤچه‌یا هه‌ورامانێ ژی د نڤیسێن خوه‌ دا روو ل په‌كه‌كێ/پژاكێ كرنه‌ و ژ بۆ وان پشت راست كرنه‌ كو: «هه‌ورامان ب درێژاهییا دیرۆكا خوه‌ یا پر شاناز، پێگه‌ها مێر و شێره‌ ژنێن شۆرشگێرێن راست بوویه‌، ئه‌ڤ ئاڤ و خاكه‌ ئێدێ جیێ وه‌ نابه‌، پشت راست بن، گه‌لێ هه‌ورامانێ وێ هه‌وه‌ سزا بده»‌.